މެލޭޝިއާގައި މިހާރު ކުރިއަށްދާ "މާޓާ ފެއަރ"ގެ ރާއްޖޭގެ ސްޓޭންޑު ކައިރީގައި އަލިފާނުގެ ޙާދިސާއެއް ހިނގައިފި
މެލޭޝިއާގައި މިހާރު ކުރިއަށްދާ "މާޓާ ފެއަރ"ގައި ރާއްޖޭގެ ސްޓޭންޑު ކައިރީގައި އަލިފާނުގެ ޙާދިސާއެއް ހިނގައިފިއެވެ.
މަޢުލޫމާތު ލިބިފައިވާގޮތުގައި އަލިފާނުގެ ޙާދިސާ ހިނގާފައިވަނީ ރާއްޖޭގެ ސްޓޭންޑްގެ ފުރަގަހުގައި ހުރި ބަދިގެއެއްގައެވެ. މިޙާދިސާގައި ރާއްޖޭގެ ސްޓޭންޑަށް ގެއްލުމެއްވީކަމުގެ މަޢުލޫމާތެއް އަދި ނުލިބެއެވެ. މި ޙާދިސާ ހިނގުމާއެކު ފެއަރ ކުރިއަށްދާ ބިލްޑިންގއިންވަނީ މީހުން ހުސްކޮށްފައެވެ.
މާޓާ ފެއަރ ކުރިއަށްދާނީ މެލޭޝިޔާގެ ކުއާލަލަމްޕޫރްގައި މިސެޕްޓެމްބަރުމަހުގެ ހަޔަކުން ފެށިގެން ނުވައެއްގެ ނިޔަލަށެވެ. އެމް.އެމް.ޕީ.އާރު.ސީ އާއިއެކު ދިވެހިރާއްޖޭގެ ފަތުރުވެރި ކަމުގެ ސިނާޢަތުގައި ހަރަކާތްތެރިވާ 9 ކުންފުންޏަކުން މި ފެއަރގައި ވަނީ ބައިވެރިވެފައެވެ.
މިފެއަރގައި ރާއްޖޭގެ ޤުދުރަތީ ރީތި މަންޒަރުތައް ދައްކުވައިދޭ ގޮތަށް 54 އަކަމީޓަރުގެ ސްޓޭންޑެއްގައި ރާއްޖެ ތަމްސީލްކުރެވިގެންދާނީ ފަތްމިނި ބޮޑުބެރު ގްރޫޕްގެ ދިވެހި ސަޤާފީ ބޮޑުބެރު ލަވަތަކާއި އެކުގައެވެ. މީގެ އިތުރުން ދިވެހި ރަހަތައް ތަޖްރިބާ ކޮށްލުމުގެ އިންތިޒާމް ސްޓޭންޑްގައި ހަމަޖެހިފައި ހުންނާނެއެވެ.
މާޓާ ފެއަރއަށް ޒިޔާރާތްކުރާ ފަރާތްތަކަށް ރާއްޖޭގެ ކަނޑުއަޑީގެ ރީތި މަންޒަރުތަށް ވަރޗުއަލް ރިއަލިޓީ މެދުވެރިކޮށް ދައްކާލުމަށް ހަމަޖެހިފައިވާކަމަށްވެސް އެމްއެމްޕީއާރުސީން މައުލޫމާތުދެއެވެ.