ނެޝަނަލް ޓެންޑަރ ބޯޑުން އެވޯޑްކުރުމަށް ނިންމާ މަޝްރޫޢުތަކުގެ ތަފްސީލްތައް ފިނޭންސް މިނިސްޓްރީން އާއްމުކުރަން ފަށައިފިއެވެ.
ފިނޭންސް މިނިސްޓްރީން ބުނީ ނެޝަނަލް ޓެންޑަރ ބޯޑުން އެވޯޑްކުރުމަށް ނިންމާ މަޝްރޫޢުތަކުގެ މަޢުލޫމާތު ޤަވާއިދުން ހާމަކުރަން ފަށާފައިވަނީ މިމަހުގެ 5 ވަނަ ދުވަހުން ފެށިގެންކަމަށެވެ.
ނެޝަނަލް ޓެންޑަރ ބޯޑުން އެވޯޑްކުރުމަށް ނިންމާ މަޝްރޫޢުތަކުގެ ތަފްސީލް ފިނޭންސް މިނިސްޓްރީން އާއްމުކުރަން ފަށާފައިވާއިރު، މިހާތަނަށް 87 މަޝްރޫޢެއްގެ ތަފްސީލް ވަނީ ހިމަނާފައެވެ. ފިނޭންސް މިނިސްޓްރީން އާއްމުކުރާ ތަފްސީލްތަކުގެ ތެރޭގައި މަޝްރޫޢުގެ ތަފްސީލާއި، ހަވާލުކުރާ ފަރާތާއި، މަސައްކަތުގެ އަގާއި މަސައްކަތް ނިންމަންޖެހޭ ތާރީޚް ހިމެނެއެވެ. މީގެ އިތުރުން މަޝްރޫޢު ހަވާލުކުރާ ތަރީޚާއި މަޝްރޫޢު ހަވާލުކުރި މިނިސްޓްރީވެސް ފިނޭންސް މިނިސްޓްރީން ދަނީ އާއްމުކުރަމުންނެވެ.
ފިނޭންސް މިނިސްޓްރީން ބުނީ މިއީ ސަރުކާރުން ގެންގުޅޭ ދެފުށް ފެންނަ ސިޔާސަތުގެ ދަށުން ފެށްޓެވި މަސައްކަތެއްކަމަށެވެ.
ޓެންޑަރ ބޯޑުން އެވޯޑްކުރާ ޕްރޮޖެކްޓްތަކުގެ މަޢުލޫމާތު ފިނޭންސް މިނިސްޓްރީން އާއްމުކުރަން ފަށާފައިވާއިރު، ފިނޭންސް މިނިސްޓްރީން މިހާރުވެސް ދަނީ ހަފްތާއަކު އެއް ފަހަރު ދައުލަތުގެ ޚަރަދާއި އާމްދަނީއާ ގުޅޭ ތަފްސީލްތައްވެސް ހާމަކުރަމުންނެވެ.