ސުޕްރީމް ކޯޓްގެ ފަނޑިޔާރުކަމަށް މަހާޒް ޢައްޔަންކުރުމާމެދު ޖޭ.އެސް.ސީގެ ލަފަޔަކަށް ރައީސް އެދިވަޑައިގެންފި
ސުޕްރީމް ކޯޓްގެ ފަނޑިޔާރުކަމަށް ގދ.މަޑަވެލި އަލްއުސްތަޛް މަހާޒް ޢަލީ ޒާހިރު ޢައްޔަންކުރުމާމެދު ޖުޑީޝަލް ސާރވިސް ކޮމިޝަން، ޖޭއެސްސީގެ ލަފާފުޅަކަށް ރައީސުލްޖުމްހޫރިއްޔާ ހުށައަޅުއްވައިފިއެވެ.
ސުޕްރީމް ކޯޓްގެ ފަނޑިޔާރުގެ މަޤާމު ހުސްވެފައިވަނީ ފަނޑިޔާރުކަމުގެ މަޤާމުން އަލްއުސްތާޛް ޢަބްދުﷲ ދީދީ ވަކިކުރުމަށް ރައްޔިތުންގެ މަޖިލީހުން ފާސްކުރުމުންނެވެ. ސުޕްރީމް ކޯޓަށް ޢައްޔަންކުރުމަށް ލަފާފުޅަކަށް ރައީސުލްޖުމްހޫރިއްޔާ ފޮނުއްވާފައިވާ މަހާޒް ޢަލީ ޒާހިރު މިހާތަނަށް ހުންނެވީ ޑްރަގް ކޯޓްގެ ފަނޑިޔާރުކަމުގެ މަޤާމުގައެވެ.
ފަނޑިޔާރުންގެ ޤާނޫގައި ބުނެފައިވަނީ ސުޕްރީމް ކޯޓުގެ ފަނޑިޔާރުކަމަށް ކުރިމަތިލާ މީހުންގެ ތެރެއިން އެމަޤާމުގެ ޝަރުތު ފުރިހަމަވާ މީހުންނާ، ޖުޑީޝަލް ސަރވިސް ކޮމިޝަނުން އިންޓަރވިއު ކުރުމަށްފަހު ޝަރުތު ފުރިހަމަވާ އެންމެންގެ ނަންތަކާއި ސުޕްރީމް ކޯޓުގެ ފަނޑިޔާރުކަމަށް އައްޔަންކުރުމަށް އެ ކޮމިޝަނަށް ފެންނަ މީހުންގެ ނަންތައް، ވަކިން އެނގޭގޮތަށް ރައީސުލްޖުމްހޫރިއްޔާއަށް ހުށަހަޅަންވާނެ ކަމަށެވެ. ސުޕްރީމް ކޯޓްގެ ފަނޑިޔާރުގެ މަޤާމަށް ޢައްޔަންކުރައްވާ ބޭފުޅުންގެ ތެރޭގައި ފަނޑިޔާރު ކަމުގައި ނުވަތަ ވަކީލް ކަމުގައި މަދުވެގެން ހަތް އަހަރު މަސައްކަތްކުރައްވާފައިވާ ފަރާތަކަށް ވާންޖެހެއެވެ.
މަހާޒް ވަނީ 2014 ވަނަ އަހަރު ޕްރޮސެކިއުޓަރ ޖެނެރަލްގެ މަޤާމަށްވެސް ކުރިމަތިލައްވާފައެވެ. ނަމަވެސް މަހާޒްގެ ނަންފުޅު ރުހުން ހޯއްދެވުމަށް ރައީސުލްޖުމްހޫރިއްޔާ އޭނާގެ ނަންފުޅު މަޖިލީހަށް ފޮނުއްވާފައެއްނުވެއެވެ. ސުޕްރީމް ކޯޓްގެ ފަނޑިޔާރުކަމުގެ މަޤާމަށް މަހާޒް ޢައްޔަންކުރުމަށް ރައީސުލްޖުމްހޫރިއްޔާ ޖޭއެސްސީގެ ލަފާފުޅަކަށް އެދިވަޑައިގެންފައިވާއިރު ހުސްވެފައިވާ ސުޕްރީމް ކޯޓްގެ ފަނޑީޔާރުގެ މަޤާމަށް ކުރިމަތިލުމަށް ހުޅުވާލި ފުރުޞަތު މިއަދު ވަނީ ހަމަވެފައެވެ. އަދި އެ މަޤާމަށް ހައިކޯޓުގެ ފަނޑިޔާރު ޢަލީ ސަމީރު އާއި ކުރީގެ ޑެޕިއުޓީ ޕްރޮސެކިއުޓާ ޖެނެރަލް މަރިޔަމް ނިހާޔަތު ވެސް ވަނީ ކުރިމަތިލައްވާފައެވެ.
ސުޕްރީމް ކޯޓްގެ ފަނޑިޔާރުންގެ ޢަދަދު 7 ފަނޑިޔާރުންނަށް އިތުރުކުރުމަށް ކޯޓްތަކާއި ބެހޭ ޤާނޫނަށް ގެނައި އިޞްލާހުގެ ދަށުން އެ ކޯޓަށް ރައީސުލްޖުމްހޫރިއްޔާ ވަނީ ދެ ފަނޑިޔާރަކު އައްޔަންކުރައްވާ މަޤާމުގެ ލިޔުން ހަވާލުކުރައްވާފައެވެ. އެ މަޤާމަށް ޢައްޔަންކުރައްވާފައިވަނީ ޑރ.އަޒްމިރާދާ ޒާހިރާއި، އަލްއުސްތާޛާ އައިޝާ ޝުޖޫން މުޙައްމަދެވެ.