މިއަހަރުގެ ޖުލައިމަހުގެ ނިޔަލަށް ރާއްޖެއިން މަސް އެކްސްޕޯޓްކުރި މިންވަރު މިދިޔަ އަހަރުގެ އެ މުއްދަތާ އަޅާބަލާއިރު އިތުރުވެއްޖެއެވެ.
މޯލްޑިވްސް މަނިޓަރީ އޮތޯރިޓީ، އެމްއެމްއޭއިން އާއްމުކޮށްފައިވާ ތަފާސް ހިސާބުތައް ދައްކާގޮތުން މިދިޔަ އަހަރުގެ ޖުލައިމަހުގެ ނިޔަލަށް ރާއްޖެއިން 36 ހާސް އަށް ސަތޭކަ މެޓްރިކް ޓަނުގެ މަސް އެކްސްޕޯޓްކޮށްފައިވެއެވެ. އަދި މިއަހަރުގެ ޖުލައިމަހުގެ ނިޔަލަށް ރާއްޖެއިން މަސް އެކްސްޕޯޓްކުރި މިންވަރު، 0.3 އިންސައްތަ އިތުރުވެ، އެކްސްޕޯޓްކުރި މަހުގެ އަދަދު 37 ހާސް މެޓްރިކް ޓަނަށް އަރާކަމަށް އެމްއެމްއޭގެ ތަފާސް ހިސާބުތަކުން ދައްކައެވެ.
މިއަހަރުގެ ޖުލައިމަހުގެ ނިޔަލަށް ރާއްޖެއިން 37 ހާސް މެޓްރިކް ޓަނުގެ މަސް އެކްސްޕޯޓްކޮށްފައިވާއިރު، އޭގެ ތެރޭގައި އެންމެ ގިނައީ ތާޒާ އަދި ފިނިކުރި ކަޅުބިލަ މަހެވެ. އެގޮތުން ތާޒާ އަދި ފިނިކުރި ކަޅުބިލަމަސް ހިމެނޭ ގޮތަށް 18 ހާސް ފަސް ސަތޭކަ މެޓްރިކް ޓަނުގެ ކަޅުބިލަ މަސް ވަނީ އެކްސްޕޯޓްކޮށްފައެވެ. ދެން އެންމެ ގިނައިން އެކްސްޕޯޓްކޮށްފައިވަނީ ރީނދޫ އުރަހަ ކަންނެއްޏެވެ. އެގޮތުން 10 ހާސް ފަސް ސަތޭކަ މެޓްރިކް ޓަނުގެ ރީނދޫ އުރަހަ ކަންނެލި ވަނީ މިއަހަރުގެ ޖުލައިމަހުގެ ނިޔަލަށް އެކްސްޕޯޓްކޮށްފައެވެ.
ނަމަވެސް ކަޅުބިލަމަހާއި ކަންނެލި ނުހިމެނޭ ގޮތަށް އެހެނިހެން ބާވަތްތަކުގެ މަސް އެކްސްޕޯޓްކުރި މިންވަރު ވަނީ މިދިޔަ އަހަރުގެ ޖުލައިމަހާ އަޅާބަލާއިރު 33.8 އިންސައްތަ ދަށްވެފައެވެ. އެގޮތުން މިދިޔަ އަހަރުގެ ޖުލައިމަހުގެ ނިޔަލަށް ކަޅުބިލަމަހާއި ކަންނެލި ނުހިމެނޭ ގޮތަށް، 1253 މެޓްރިކް ޓަނުގެ މަސް އެކްސްޕޯޓްކުރިއިރު، މިއަހަރުގެ ޖުލައިމަހުގެ ނިޔަލަށް އެ އަދަދު އުޅެނީ 830 މެޓްރިކް ޓަނުގައެވެ.
ރާއްޖެއިން އެކްސްޕޯޓްކުރާ މަހުގެ އެހެން ބާވަތްތަކަށް ބަލާއިރު، ދަޅުގައި ނުވަތަ ޕެކެޓްކޮށްފައި އެކްސްޕޯޓްކުރި މަހުގެ މިންވަރު ވަނީ 4 ހާސް ހަތަރު ސަތޭކަ މެޓްރިކް ޓަނުން 5 ހާސް ހަތް ސަތޭކަ މެޓްރިކް ޓަނަށް އިތުރުވެފައެވެ. އަދި އެކި ގޮތްގޮތަށް ޕްރޮސެސްކޮށްފައި އެކްސްޕޯޓްކުރި މަހުގެ މިންވަރުވެސް ވަނީ 808 މެޓްރިކް ޓަނުން 11 ސަތޭކަ މެޓްރިކް ޓަނަށް އިތުރުވެފައެވެ.