ރާއްޖޭގައި ވިޔަފާރި ކުރާ ތަންތަނާއި އެނޫންވެސް މަސައްކަތްކުރާ ތަންތަނުގައި މުސާރައާއި އުޖޫރައިގެ ގޮތުން އެންމެ ކުޑަމިނުން ދެވޭނެ އަދަދެއް ކަނޑައެޅުމަށް ބޭނުންވާ މަޢުލޫމާތު އެއްކުރުމަށްޓަކައި 'އެންޓަރޕްރައިސް' ސާރވޭއެއް ހިންގުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓުން ނިންމައިފިއެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ މުސާރައާއި އުޖޫރައާ ގުޅޭގޮތުން ލަފާދޭ ބޯޑުން ނެރެފައިވާ އިޢުލާނުގައިވާ ގޮތުން މިސާވޭ ކުރުމަށް ހަމަޖެހިފައިވަނީ ރާއްޖޭގެ ދެކުނާއި އުތުރުގެ ރަށްތަކުގައެވެ. އެގޮތުން ދެކުނުގައި ސާރވޭ ކޮށްދޭނެ ފަރާތަކާއި އުތުރުގައި ސާރވޭ ކޮށްދޭނެ ފަރާތެއް ނެގުމަށް ވަނީ ހަމަޖެހިފައެވެ.
މިމަސައްކަތްކުރުމަށް ޝައުޤުވެރިވާ ފަރާތްތަކުން މިމަހުގެ ބާރަވަނަ ދުވަހުގެ މެންދުރު 12:30 އަށް މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ބޮޑުތަކުރުފާނު މަގުގައި ހުންނަ އިމާރާތަށް ހާޟިރުވެ އަންދާސީ ހިސާބު ހުށަހެޅުމަށް އިކޮނޮމިކް މިނިސްޓްރީން އެދެއެވެ.
ވަޒީފާ އަދާކުރާ މީހުންނަށް އުޖޫރައިގެ ގޮތުގައި ދެވޭނެ އެންމެ ކުޑަ މިންވަރެއް ކަނޑައެޅުމަކީ ރައީސް އިބްރާހިމް މުޙައްމަދު ޞާލިޙުގެ ރިޔާސީ ވައުދުތަކުގެ ތެރޭގައި ހިމެނޭ މުހިއްމު ވަޢުދެކެވެ.