ގައުމީ ބިލިއާޑް ޓީމަށް ބިދޭސީ ކޯޗަކު ފުރަތަމަ ފަހަރަށް ހަމަޖައްސައިފިއެވެ.
ސަރުކާރުގެ އެހީތެރިކަމާއިއެކު ރާއްޖޭގެ ޤައުމީ ޓީމްގެ ކޯޗަކަށް ހަމަޖައްސާފައިވަނީ ވޯލްޑް ޕޫލް އެސޯސިއޭޝަނުގެ ލައިސަންސްވެސް އޮންނަ ފިލިޕީންސްގެ ވެލަރިއާނޯ ޕަޖުއޭ ޖޫނިއަރއެވެ. ޕަޖުއޭ ޖޫނިއަރއަކީ ކުޅުންތެރިއެއްގެ ގޮތުގައިވެސް އެގައުމުގައި ރަނގަޅު ކާމިޔާބީތަކެއް ހޯދާފައިވާ ކޯޗެކެވެ. ކުޅުންތެރިއެއްގެ ގޮތުގައި އޭނާ އެންމެ ފަހުން ހޯދި އެންމެ ބޮޑު ކާމިޔާބީއަކީ މިއަހަރު ފިލިޕީންސްގައި ބޭއްވި މެލޭޝިއާ ޗައިނީސް އެއިޓް ބޯލް ޕޫލް މާސްޓަރ މުބާރާތުގެ ޗެމްޕިއަންކަން ހޯދުމެވެ. ކުރިއަށް އޮތް ހަތަރު މަހަށް ޤައުމީ ޓީމަށް ގެންނަން ނިންމާފައިވާ ކޯޗު ޕަޖުއޭ ޖޫނިއަރގެ މުސާރައާއި އެހެނިހެން ޚަރަދުތައްވެސް ބަލަހައްޓާނީ ސަރުކާރުންނެވެ.
ޕަޖުއޭ ޖޫނިއަރގެ ކޯޗުކަމުގެ ދަށުން ޤައުމީ ޓީމް ވާދަކުރާނެ އެންމެ ފުރަތަމަ މުބާރާތަކީ އަންނަ ނޮވެމްބަރު މަހު އޮންނަ ވޯލްޑް 9 ބޯލް ޗެމްޕިއަންޝިޕް. ބިލިއާޑް ޤައުމީ ޓީމަށް ފުރަތަމަ ފަހަރަށް ބިދޭސީ ކޯޗެއް ސަރުކާރުން ހަމަޖައްސަވައިދެއްވިއިރު، ބޮޑީބިލްޑީންގ ގައުމީ ޓީމަށްވެސް ދާދިފަހުން ސަރުކާރުންވަނީ ފުރަތަމަ ފަހަރަށް ބިދޭސީ ކޯޗެއް ހަމަޖައްސަވާފައެވެ.