ތިން ރަށެއްގެ އަޅަން ނިންމާފައިވާ ފުޓްބޯޅަ ދަނޑުގެ "ސަބް-ބޭސް" އެޅުމަށް ސިފައިންގެ ވެލްފެއާ ކުންފުނި (ސިވެކް)އާއި ހަވާލްކުރައްވައިފިއެވެ.
ސަރުކާރުގެ ވަޢުދުތަކުގެ ތެރޭގައި ހިމެނޭ ރާއްޖޭގެ އެކި ކަންކޮޅުތަކުގައި ފެންވަރު ރަނގަޅު ފުޓުބޯޅަ ދަނޑު އެޅުމުގެ ވައުދުތަކުގެ ތެރެއިން ޅ.ހިންނަވަރާއި ނ.ކެނދިކުޅުދޫ އަދި ނ.ހޮޅުދޫގައި އަޅަން ނިންމާފައިވާ ދަނޑުތަކުގެ "ސަބް-ބޭސް" އެޅުމުގެ އެއްބަސްވުމުގައި ޔޫތް މިނިސްޓްރީގެ ފަރާތުން ސޮއިކުރެއްވީ އެ ވުޒާރާގެ ވަޒީރު އަޙުމަދު މަޙުލޫފެވެ. ސިވެކްގެ ފަރާތުން ސޮއިކުރެއްވީ ކާނަލް އަހްމަދު ޒުބައިރެވެ.
މި އެއްބަސްވުމުގައި ސޮއިކުރެއްވުމަށްފަހު ޔޫތް މިނިސްޓަރ އަޙުމަދު މަޙުލޫފު ވިދާޅުވީ ތިން ރަށުގައި މި އަޅާތިން ދަނޑުގެ "ސަބް-ބޭސް"އަށް ގާތްގަނޑަކަށް އަށް މިލިއަން ރުފިޔާ ޚަރަދުވާނެކަމަށެވެ. މިނިސްޓަރ ވިދާޅުވީ ގާތްގަނޑަކަށް އަށް ފެންވަރު ރަނގަޅު ދަނޑުތައް އެޅުމަށް ސަރުކާރުން މިކުރާ މަސައްކަތުގައި ސިވެކް ބައިވެރިކުރަން ނިންމި މައިގަނޑު ސަބަބަކީ ކަނޑައެޅާފައިވާ މުއްދަތުގެ ތެރޭގައި މި މަސައްކަތް ނިންމަވާނެކަމަށް ސިވެކުންދެއްވި ޔަގީންކަންކަމަށެވެ.
މިއަދުގެ އެއްބަސްވުމުގައި ވާގޮތުން މަސައްކަތް ފަށާތާ 45 ދުވަހުގެ ތެރޭގައި ތިން ރަށުގައިވެސް އަޅާ ދަނޑުގެ "ސަބް-ބޭސް" މަސައްކަތް ނިންމާލެވޭނެއެވެ. އެއްބަސްވުމުގައި ސޮއިކުރުމުގެ ރަސްމިއްޔާތުގައި ރައްޔިތުންގެ މަޖިލީހުގެ ހިންނަވަރު ދާއިރާގެ މެމްބަރު ޖީހާން މަހުމޫދު، ހޮޅުދޫ ދާއިރާގެ މެމްބަރު ޔޫނުސް އަލީ އަދި ކެނދިކުޅުދޫ ދާއިރާގެ މެމްބަރު އަޙުމަދު އީސާވެސް ބައިވެރިވެވަޑައިގެންނެވިއެވެ.