ކަކުލަށް ލިބިފައިވާ އަނިޔާ ރަނގަޅު ކުރުމަށް ޔުވެންޓަސްގެ ކެޕްޓަން ޖޯޖިއޯ ކިއެލީނީ އޮޕަރޭޝަންކުރަން ނިންމައިފިއެވެ. އުމުރުން 35 އަހަރުގެ ކިއެލީނީއަކީ 570އަށްވުރެ ގިނަ މެޗު ޔުވެންޓަސްއަށް ކުޅެދީފައިވާ އިޓަލީގެ އެންމެ ތަޖުރިބާކާރު އެއް ޑިފެންޑަރެއެވެ.
އޭނާއަށް އަނިޔާވެ އޮޕަރޭޝަން ކުރަން ޖެހިފައިވަނީ 2020ވަނަ އަހަރުގެ ޔޫރޯ ކޮލިފައިންއަށް އިޓަލީގެ ޤައުމީ ޓީމަށްވެސް ނަގާފައިވަނިކޮށެވެ.
ކިއެލީނީ ނެތުމުން އެ މަޤާމަށް ޔުވެންޓަސްގެ ކޯޗު މައުރީސިއޯ ސާރީ ކުޅުވާނީ އަޔެކްސްއިން ގެނައި ޒުވާން ޑިފެންޑަރު މަތިއަސް ޑިލައިޓެވެ. އުމުރުން 19 އަހަރުގެ ކުޅުންތެރިޔާއަކީ ނިމިދިޔަ ސީޒަނުގައި ޔޫރަޕުގައި އެންމެ މޮޅަށް ކުޅުނު އެއް ޑިފެންޑަރެއެވެ.
ކިއެލީނީއަށް އަނިޔާވެ ގިނަ ދުވަސްތަކަކަށް ކުޅުމާއި ދުރަށްދާންޖެހިފައވާއިރު، މި ސީޒަނަށްފަހު އޭނާ ރިޓަޔަރކުރުންވެސް ގާތްކަމަށް އިޓަލީގެ މީޑިޔާތަކުން ރިޕޯޓްކުރެއެވެ.