އަދީބުގެ ބަންދުގެ މުއްދަތު އިތުރުކޮށްނުދީ ކޯޓުން އޭނާ ދޫކޮށްލިތާ ހަތަރު ގަޑިއިރުފަހުން ކޯޓް ޢަމުރެއްގެ ދަށުން އަނެއްކާވެސް ކުރީގެ ނާއިބު ރައީސް އަޙްމަދު އަޙްމަދު އަދީބު ޙައްޔަރުކޮށް ދޫނިދޫއަށް ގެންގޮސްފިއެވެ.
ޓަގު ބޯޓެއްގައި ފިއްލަވައިގެން އިންޑިއާގެ ސޫތުކުޅިއަށް އެތެރެވާން މަސައްކަތްކުރުމުން އިންޑިއާއަށް އެތެރެވިޔަނުދީ އަނބުރާ ފޮނުވާލުމުން އޭނާރާއްޖެގެނެސް ފުރަތަމަ ގެންދިޔައީ ފުލުހުންގެ މައިމަރުކަޒު ޝަހީދު ޙުސައިން އާދަމް ބިލްޑިންގއަށެވެ. އެއަށްފަހު ބަންދުގެ މުއްދަތު ޖެހުމަށް އޭނާ ރޭދަންވަރުވަނީ ކްރިމިނަލް ކޯޓަށް ޙާޒިރުކޮށްފައެވެ. މުއްދަތުގެ މަޖިލިސް ވަނީ ރޭދަންވަރު ވަރަށް ދިގުދެމިގެންގޮސްފައެވެ.
އަދީބު ޙައްޔަރުކޮށްފައިވަނީ ބައިނަލްއަޤްވާމީ ކަނޑުގެ ސަރަޙައްދުން ޤަވާއިދާ ޚިލާފަށްކަމަށް ބުނެ އަދި އަދީބު ޙައްޔަރުކުރި ބޯޓަކީ ރާއްޖޭގައި ރަޖިސްޓްރީ ކޮށްފައިވާ ބޯޓެއް ނޫންކަމުން، ކޯޓުން އަދީބުގެ މުއްދަތު ޖަހާދީފައެއްނުވެއެވެ. 3 ގަޑިއިރަށް ދިގުދެމިގެންދިޔަ މުއްދަތު މަޖިލީހުގައި ފުލުހުންވެސްވަނީ އަދީބު ހައްޔަރުކޮށްފައިވަނީ ބައިނަލްއަޤްވާމީ ކަނޑުގެ ސަރަޙާއްދުންކަމަށް ޢިއުތިރާފްވެފައެވެ. އަދި އަދީބު ޙައްޔަރުކުރީ އިންޑިއާގެ ދިދަ ޖެހި އުޅަނދެއްގައި ހުއްޓާކަމަށްވެސް ފުލުހުން ވަނީ ކޯޓުގައި ވިދާޅުވެފައެވެ.
އަދީބު ހައްޔަރުކުރީ ބައިނަލްއަޤްވާމީ ކަނޑުގެ ސަރަހައްދުންކަމަށްވެފައި، އެ ސަރަޙާއްދަކީ ރާއްޖޭގެ ޤާނޫނާއި ޤަވާއިދުތައް ނުހިނގާނެ ސަރަހައްދެއްކަމުން ކްރިމިނަލް ކޯޓްގެ ޤާޒީ ވަނީ އެކަން ފާހަގަކުރައްވާފައެވެ.
ޕްރޮސެކިއުޓަރ ޖެނެރަލްގެ އޮފީހުންވެސްވަނީ އަދީބު ހައްޔަރުކޮށްފައިވަނީ ރާއްޖޭގެ ކަނޑުގެ ސަރަޙައްދުން ނޫންކަމަށް އެއްބަސްވެވަޑައިގެންފައެވެ. އެހެންކަމުން އަދީބުގެ ބަންދުގެ މުއްދަތު ނުދިނުމުން އޭނާ ދޫކޮށޮލުމަށްފަހު އޭގެ ހަތަރު ގަޑިއިރުފަހުން ފުލުހުންވަނީ އަނެއްކާވެސް އަދީބު ހައްޔަރުކޮށްފައިވަނީ އޭނާދިރިއުޅުއްވާ ގެ، ގ.ހުމަށިގައި ހުއްޓާ ރޭފަތިހު 05:30 ހާއިރު ކޯޓުއަމުރެއްގެދަށުންވެ.
އޭނާ މިފަހަރު ހައްޔަރުކޮށްފައިވަނީ ސުޕްރީމް ކޯޓުގެ އަމުރެއްގެ ދަށުން އަދީބުގެ ޕާސްޕޯޓް ހިފަހައްޓާފައިވަނިކޮށް ފިއްލަވައިގެން ރާއްޖެ ދޫކޮށް ވަޑައިގެންނެވި މައްސަލާގައާއި، ޖިނާއީ މައްސަލައެއްގައި ކުށަށް އިޢުތިރާފުވެ ކޯޓަށް ޙާޒިރުވެ ހެކިބަސް ދެއްވުމަށް އެއްބަސްވެ ސޮއިކުރެއްވުމަށްފަހު ފިއްލެވި މައްސަލާގައި. އޭނާ ހައްޔަރުކޮށް މިއަދު ހެނދުނު ވަނީ ދޫނިދޫއަށް ގެންގޮސްފައެވެ.
އަދީބު މާލެ ގެނެސްފައިވަނީ ރޭ 10:30 ހާއިރުއެވެ. އަދީބު ރާއްޖެ ގެނެސްފައިވަނީ ކޯސްޓްގާޑް ޝިޕް ހުރަވީގައެވެ. އަދީބު ރާއްޖެ ގެނެސް ފުރަތަމަ ގެންގޮސްފައިވަނީ ފުލުހުންގެ މައިމަރުކަޒު ޝަހީދު ޙުސައިން އާދަމް ބިލްޑިންގއަށެވެ. ފުލުހުންގެ އިދާރާގައި ވަގުތުކޮޅަކު ބެހެއްޓުމަށްފަހު ބަންދާމެދު ގޮތެއް ނިންމުމަށް އަދީބް ކޯޓަށް ހާޒިރުކޮށްފައިވަނީ މިރޭ ބާރަ ޖަހާ އެހާކަންހާއިރުއެވެ.
އަދީބު ފިއްލައވައިގެން ވަޑައިގަތް ޓަގު ބޯޓު ރާއްޖެއިން ފުރާފައިވަނީ މި މަހުގެ 27ވަނަ ދުވަހު. ފުރިއިރު، އެ ބޯޓުގައި ރާއްޖެއަށް އައި 9 މީހުންގެ ބަދަލުގައި 10 މީހުން ތިއްބެވެ. 10ވަނަ މީހަކީ އަދީބެވެ. ރާއްޖެއިން އިތުރު މީހަކު އެ ބޯޓަށް އެރިކަން އެ ބޯޓުގެ އެޖެންޓަށް އެންގީ އެބޯޓުގައި ހުރި އިންޑިއާ ފަޅުވެރިޔާއެވެ. އެޖެންޓް މެދުވެރިކޮށް، އިންޑިއާގެ ކަސްޓަމާއި ކޯސްޓްގާޑާއި ޖާސޫސީ އިދާރާތަކަށް އެންގުނުއިރު ބޯޓު ރާއްޖެއިން ފުރާފައިވާކަމަށް ބެލެވެއެވެ. އިންޑިއާގެ ފުލުހުންނަށް ބޯޓު އަތުވެފައިވަނީ އިންޑިއާގެ ޓްޓިކޮރި ނުވަތަ ސޫތުކުޅި އާއި ހަމައަށް ދަތުރުކުރިފަހުންނެވެ.
ޓައިމްސް އޮފް އިންޑިއާއިން ބުނެފައިވަނީ އަދީބް ދަތުރުކޮށްފައިވަނީ ސިންގަޕޫރުގައި ރެޖިސްޓްރީކޮށްފައިވާ ވަރގޯ-9 ނަމަކަށް ކިޔާ ޓަގު ބޯޓެއްގައިކަމަށެވެ. މި އުޅަނދަކީ މިދިޔަމަހުގެ 11ވަނަ ދުވަހު ހިލަވެލި ބަރުކޮށްގެން ރާއްޖެ އައިސްފައިވާ އުޅަނދެކެވެ.
ފިއްލަވައިގެން ސޫތުކުޅިއަށް ވަޑައިގަތުމަށްފަހު އަދީބުވަނީ އިންޑިއާގެ ސިޔާސީ ހިމާޔަތަށްވެސް އެދިވަޑައިގެންފައެވެ. އިނގިރޭސިވިލާތުގެ ވެރިރަށް ލަންޑަނުގައި މަރުކަޒުވެފައިވާ އަދީބްގެ ބައިނަލްއަޤްވާމީ ޤާނޫނީ ވަކީލުންގެ ޓީމުން ބުނީ އޭނާ ޤައުމު ދޫކޮށް ދިޔައީ ފުރާނައަށް ނުރައްކާވުމުންކަމަށެވެ. އެހެންނަމަވެސް އިއްޔެގެ ވަގުތެއްގައި އިންޑިއާއިންވަނީ އަޙްމަދު އަދީބު އަބްދުލްޣަފޫރަށް ސިޔާސީ ޙިމާޔަތްދިނުމަށް ދެކޮޅުހަދައި އިންޑިއާއިން ވަނީ އަދީބު އަނބުރާ ރާއްޖެ ފޮނުވާލާފައެވެ.
އަޙްމަދު އަދީބު ހައްޔަރުކޮށްފައިވަނީ ޤާނޫނާއި ޚިލާފަށްކަމަށްބުނެ އެ މައްސަލަ އދ.އަށް ހުށައަޅަން އަދީބުގެ ބައިނަލްއަޤްވާމީ ޤާނޫނީ ޓީމުން ވަނީ އދ.އަށް ހުށައަޅާން ނިންމާފައެވެ.