ކުރީގެ ނާއިބު ރައީސް އަޙަމަދު އަދީބު ޓަގު ބޯޓެއްގައި ފިލައިގެން ދާން މަސައްކަތްކޮށްފައިވަނީ އެމްއެމްޕީއާރުސީގެ ޚިޔާނާތުގެ މައްސަލާގައި އިއްޔެ ފުލުސް އޮފީހަށް ހާޒިރު ވުމަށް އަންގާފައިވަނިކޮށްކަމަށް ފުލުހުން ބުނެފިއެވެ.
އަދީބު ހައްޔަރުކޮށްފައިވަނީ ރާއްޖެއިން ފިލައިންގެ ޓަގު ބޯޓެއްގައި ދަނިކޮށް އިންޑިއާގެ ސޫތުކުޅިންނެވެ. ފުލުހުން ބުނީ އެކުވެރި ޤައުމުތަކާއި ގުޅިގެން އަދީބު ރާއްޖެ ގެނައުމުގެ މަސައްކަތް ކުރަމުންދާކަމަށެވެ. އަދި އަދީބު ފިލުވުމުގައި ބައިވެރިވެ އެހީތެރިވި ފަރާތްތަކުގެ މައްސަލަ ތަޙްޤީޤްކޮށް އެފަރާތްތަކާމެދު ފިޔަވަޅު ޤާނޫނީ ފިޔަވަޅު އަޅާނެކަމުގެ އިންޒާރުވެސް ފުލުހުންވަނީ ދީފައެވެ.
ފުލުހުން ޢާންމުކުރި ނޫސްބަޔާނެއްގައި ބުނެފައިވަނީ އަދީބުގެ ޕާސްޕޯޓް ހިފެހެއްޓުމަށް ސުޕްރީމް ކޯޓުން ޢަމުރުކޮށްފައިވަނިކޮށް ފިލައިގެން ކަނޑުމަގުން ރާއްޖެއިން ބޭރަށްދިޔަ މަގުމަތީގައި ހިފަހައްޓާފާއިވާކަމަށެވެ.
ކުރީގެ ނާއިބު ރައީސް އަޙަމަދު އަދީބު ޓަގު ބޯޓެއްގައި ފިލައިގެން ދަނިކޮށް އިންޑިއާގެ ސޫތުކުޅިން ހައްޔަރުކުރީ އެއްވެސް ރަސްމީ ލިޔެކިއުމެއް ނެތި އިންޑިއާއަށް އެތެރެވާން އުޅުމުންކަމަށް އިންޑިއާގެ ސަރުކާރުގެ އޮފިޝަލަކު ވަނީ ވދާޅުވެފައެވެ. އިންޑިއާގެ ބައެއް މީޑިއާ ރިޕޯޓްތައް ބުނާގޮތުން އަދީބު އިންޑިއާއަށް އެތެރެވާން އުޅެފައިވަނީ އިންޑޮނޭޝިއާއިން މިމަހުގެ 27 ވަނަ ދުވަހު ފުރައިގެން އިންޑިއާއަށް އެތެރެވަނިކޮށް ކަނޑުމަތިން އެބޯޓު ފާސްކުރުމުގެ ތެރޭގައި ކަމަށެވެ. އަދި އަދީބު ބޯޓްގައި ހުރިކަން އެނގުނީ އެބޯޓްގެ ފަޅުވެރިއަކު ބުނުމުންކަމަށްވެސް މީޑިއާއިން ވަނީ ރިޕޯޓު ކޮށްފައެވެ.
އިންޑިއާގެ ބައެއް މީޑިއާތަކުން ރިޕޯޓުކުރާގޮތުގައި އަދީބު އިންޑިއާއަށް ދިޔައީ މިގެ ތިންދުވަސް ކުރިންނެވެ. އޭނާ އެތެރެވީ ޓަގު ބޯޓެއްގެ ކުރޫއެއްގެ ގޮތުގައި އޮޅުވާލައިގެންކަމަށްވެސް މައުލޫމާތު ލިބިފައިވެއެވެ.
އަދީބް ދަތުރު ކުރީ "ސްނޯޝިޕިން" ކުންފުނިން އެޖެންޓްކަންކުރާ "ވަރގޯ 9" ނަމަކަށް ކިޔާ ޓަގު ބޯޓެއްގައިކަމަށް ބައެއް މީޑިއާތަކުން ރިޕޯޓުކުރެއެވެ. އަދީބު ހައްޔަރު ކުރީ އިތުރު 9 މީހުންނާއެކު ދަތުރުކުރަނިކޮށް، އެސަރަހައްދުގެ ފުލުހުން ހިންގި ޚާއްސަ އޮޕަރޭޝަނެއްގައިކަމަށް މަޢުލޫމާތުލިބެއެވެ.
އަދީބުގެ ޕާސްޕޯޓް ހިފެހެއްޓުމަށް ރާއްޖޭގެ ސުޕްރީމްކޯޓުން މޯލްޑިވްސް އިމިގްރޭޝަންގެ މައްޗަށް އޮތީ އަމުރުކޮށްފައެވެ. ސުޕްރީމްކޯޓުން އަދީބުގެ ޕާސްޕޯޓް ހިފެހެއްޓުމަށް އިމިގްރޭޝަންގެ މައްޗަށް އަމުރުކޮށްފައިވަނީ، އަދީބުގެ މައްޗަށް ސާބިތުވި ޚިޔާނާތުގެ ޙުކުމެއް ހައިކޯޓުން ބާތިލްކުރުމުން، އެމައްސަލަ ދައުލަތުން ސުޕްރީމްކޯޓުގައި އިސްތިއުނާފްކުރުމުންނެވެ.
ސުޕްރީމްކޯޓުން ނެރުނު އަމުރުގައި ބުނެފައިވަނީ ދައުލަތުން އިސްތިއުނާފްކުރި މައްސަލަ އެކޯޓުން ބަލައިގަތުމަށް ނިންމާފައިވާކަމަށެވެ. އަދި އެ މައްސަލާގައި ގޮތެއް ކަނޑައަޅަންދެން، އަޙްމަދު އަދީބުގެ ޕާސްޕޯޓް ހިފެހެއްޓުމަށް މޯލްޑިވްސް އިމިގްރޭޝަންގެ މައްޗަށް އަމުރުކުރާކަމަށެވެ.
އަދީބަކީ ރައީސް ޢަބްދުﷲ ޔާމީންގެ މައްޗަށް މިހާރު ކުރިއަށްދާ މަނީ ލޯންޑަރިންގެ މައްސަލައިގެ ޝަރީޢަތުގައި ހެކިބަސްދިނުމަށް ދައުލަތުން ހުށަހަޅާފައިވާ ހެކިންގެތެރެއިން ހެއްކެކެވެ.