ކުރީގެ ސަރުކާރުގައި ސިޔާސީ ގުޅުން ކަނޑާލާފައި އޮތް ޤަތަރާއި އެހެނިހެން ގައުމުތަކާވެސް ސިޔާސީ ގުޅުން ޤާއިމު ކުރުމަށްޓަކައި ކުރަންޖެހޭ މަޝްވަރާތައް މިހާރު ކުރަމުންދާކަމަށް ފޮރިންމިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
ފޮރިން މިނިސްޓަރ މިހެން ވިދާޅުވީ އެމަނިކުފާނު ރައްޔިތުންގެ މަޖިލީހަށް ޙާޒިރުކޮށް ދެންނެވި ސުވާލަށް ޖަވާބު ދެއްވަމުންނެވެ.
ގަތަރާއެކު އަލުން ގުޅުން ގާއިމުކުރުމަށް މަސައްކަތް ކުރައްވަމުން ގެންދަވާތޯއާއި އެކަން ކުރެއްވުމަށް ކުރައްވާފައިވަނީ ކޮން މަސައްކަތެއްތޯ ސާފު ކުރުމަށް ރައްޔިތުންގެ މަޖިލީހަށް ހުށަހެޅުއްވީ ކާށިދޫ ދާއިރާގެ މެމްބަރު އަބްދުﷲ ޖާބިރެވެ. އެ ސުވާލަށް ދެއްވި ޖަވާބުގައި މިނިސްޓަރ ޝާހިދު ވިދާޅުވީ މިސަރުކާރުން އިސްލާމީ ޤައުމުތަކާއި އެހެނިހެން ގައުމުތަކާއެކުވެސް ސިޔާސީ އަދި އިގުތިސާދީ ގުޅުން ޤާއިމު ކުރުމަށް މަސައްކަތްކުރާނެކަމަށެވެ.
ރައީސް ޔާމިންގެ ސަރުކާރުގައި ޤަތަރާއެކު ގުޅުން ކަނޑާލީ "ލާހުރޭ ސިޔާސަތުގެ"ދަށުން އެވަގުތު އެހެން ހިތަށް އެރީމަ ކަމަށް މިނިސްޓަރ ޝާހިދު ސިފަކުރެއްވިއެވެ.
މި ސަރުކާރާ އެ ބޭފުޅުން ހަވާލުވެވަޑައިގަތްއިރު ރާއްޖެއޮތީ ބައިނަލްއަޤްވާމީ ގޮތުން ވަރަށް ބޮޑަށް ބިކަވެ، ބާކީވެފައި ކަމަށް މިނިސްޓަރ ވިދާޅުވިއެވެ. އަދި ރައީސް އިބްރާހީމް މުޙައްމަދު ޞާލިހް ރާއްޖޭގެ ވެރިކަމާ ޙަވާލުވެ ވަޑައިގަތުމަށްފަހު އެންމެ އިސްކަމެއް ދެއްވީ ރާއްޖެއަށް ހައްޤު ޝަރަފާއި ޤަދަރު ހޯއްދަވައިދެއްވުމަށް ކަމަށްވެސް މިނިސްޓަރ ވިދާޅުވިއެވެ.
ގުޅުން ބަދަހި ކުރެއްވުމަށް އެހެން ޤައުމުތަކަށް ވަޑައިގަންނަވާހެން ޗައިނާއަށް ވަޑައިނުގަންނަވަނީ ކީއްވެތޯ މިނިސްޓަރާ ކުރެއްވި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ ޗައިނާއަށްވެސް ވަރަށް އަވަހަށް ވަޑައިގަންނަވާނެކަމަށެވެ. އަންނަ އަހަރުގެ ޖޫންމަހު ރުވާންޑާގެ ވެރިރަށް ކިގާލީގައި ބާއްވާ ހެޑް އޮފް ސްޓޭޓުންގެ ޖަލްސާގެ ކުރިން ދިވެހިރާއްޖެ ކޮމަންވެލްތްގެ ފުރިހަމަ މެންބަރަކަށް ވެވޭނެ ކަމަށްވެސް މިނިސްޓަރ ޝާހިދު ވިދާޅުވިއެވެ.
މީގެ އިތުރުން ޝާހިދު ވަނީ ރާއްޖެއިން ބޭރަށް ކުރައްވާ ދަތުރުތަކަށް ހޭދަކުރާ މިންވަރާ ގުޅޭގޮތުން މެމްބަރަކު ކުރެއްވި ސުވާލަކަށް ތަފްސީލް ގޮތެއްގައި ޖަވާބު ދެއްވާފައެވެ.
މިނިސްޓަރ ވިދާޅުވީ ކުރީގެ ރައީސް އަބްދުﷲ ޔާމިންގެ ސަރުކާރުން ރާއްޖެއިން ބޭރަށް ކުރި ދަތުރުތަކަށް ހޭދަކުރި ވަރެއް އަދި އެއިން ލިބުނު ފައިދާއެއް ފެންނަންވެސް ނުހުންނާނެކަމަށެވެ. އެހެންނަމަވެސް މި ސަރުކާރުގައި އެމަނިކުފާނު ފޮރިން މިނިސްޓަރުކަމާ ޙަވާލުވެވަޑައިގެންނެވި ފަހުން 19 ޤައުމަކަށް ރަސްމީ ދަތުރު ކުރައްވާފައިވާއިރު ހަތް ޤައުމެއްގެ ރައީސުންނާއި 6 ޤައުމެއްގެ ބޮޑުވަޒީރުންނާއި 32 ޤައުމެއްގެ ފޮރިން މިނިސްޓަރުންނާއި 48 ޤައުމެއްގެ އެމްބަސިޑަރުންނާއި ބައްދަލު ކުރައްވާފައިވާ ކަމަށް މިނިސްޓަރ ޝާހިދު ވިދާޅުވިއެވެ. އަދި ޔޫރަޕިއަން ޔޫނިއަންގެ ވައިސް ޕްރެޒިޑެންޓް އަންނަ މަހު ރާއްޖެ ވަޑައިގަތުމަށް ހަމަޖެހިފައިވާ ކަމަށްވެސް މިނިސްޓަރ ޝާހިދުވަނީ ވިދާޅުވެފައެވެ.