ސުޕްރީމް ކޯޓުން އިލެކްޝަންސް ކޮމިޝަނުގެ މެންޑޭޓްގެ ތެރެއަށް ވަދެފައިވާކަމަށް އިލެކްޝަންސް ކޮމިޝަނުގެ ރައީސް އަހްމަދު ޝަރީފް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިނިވަން މުވައްސަސާތަކާ ބެހޭ ކޮމެޓީން އިލެކްޝަންސް ކޮމިޝަންގެ މެމްބަރުންނާއެކު މިއަދު ބޭއްވެވި ބައްދަލު ކުރެއްވުމުގައި ޝަރީފް ވަނީ މީގެ ކުރިން އިލެކްޝަންސް ކޮމިޝަނަށް ލިބިދީފައިވާ ބާރުތަކަށް ސުޕްރީމް ކޯޓުން އަރައިގެންފައިވާ ކަމަށް ވިދާޅުވެފައެވެ.
އެގޮތުން 2013ވަނަ އަހަރުގެ ރިޔާސީ އިންތިޚާބުގެ ދުވަސްވަރު ސުޕްރީމް ކޯޓުން ގައިޑްލައިނެއް ހަދައިގެން ޢަމަލު ކުރަން ކަނޑައަޅާފައިވާ ކަންކަމަކީ ހަމައެކަނި އިލެކްޝަންސް ކޮމިޝަނުން ކަނޑައަޅަން ޖެހޭ ކަންކަންކަމަށް އޭނާ ފާހަގަ ކުރެއްވިއެވެ.
ޝަރީފް ވިދާޅުވީ ވޯޓު ކަރުދާސްތައް ވަކި ތާރީޙެއްގެކުރިން ކަނޑައެޅުމާއި އެނޫންވެސް ކަންކަމަށް ތާރީޚުތައް ކަނޑައެޅުމަކީ ސުޕްރީމް ކޯޓަށް ލިބިދީފައި އޮންނަ ބާރެއް ނޫންކަމަށް ޝަރީފް ވިދާޅުވިއެވެ. އެހެން ނަމަވެސް އިލެކްޝަންސް ކޮމިޝަނުން ސުޕްރީމް ކޯޓުގެ އަމުރަށް ތަބާވުމުގެގޮތުން އެކަންކަން އެގޮތައް ކުރަންޖެހުނު ކަމަށާ، އޭގެސަބަބުން އެކޮމިޝަނުގެ މުވައްޒަފުން 24 ގަޑިއިރު ކަހަލަ ގޮތަކަށް މަސައްކަތް ކުރަން ޖެހުނު ކަމަށްވެސް ޝަރީފް ވިދާޅުވި.
މީގެ އިތުރުން އިލެކްޝަންސް ކޮމިޝަނުގެ ފަރާތުން ޝަރީފްވަނީ އެކޮމިޝަނަށް ބޭނުންވާ ބައެއް ކަންކަން މިނިވަން މުވައްސަސާތަކާ ބެހޭ ކޮމެޓީއާ ޙިއްސާ ކުރައްވާފައެވެ. އެގޮތުން އިލެކްޝަންސް ކޮމިޝަނަށް ޚާއްސަ އޮފީހެއް ވަކި އިމާރާތެއްގައި ކަނޑައެޅިފައި ނެތުމާއި ވަސީލަތްތައް ތަރައްގީ ކުރުމަށާއި މުވައްޒަފުންނަށް ޕްރޮމޯޝަން ދިނުމަށާއި ރިސްކް އެލަވަންސް ދިނުމަށް ބޭނުންވާ ފައިސާ ބަޖެޓްގައި ކަނޑައެޅިފައި ނެތުން އޭނާ ފާހަގަކުރެއްވިއެވެ.