އިންފޮމޭޝަން ކޮމިޝަނަރުގެ މަޤާމަށް ކުރިމަތިލެއްވި ބޭފުޅުންގެތެރެއިން 4 ނަމެއް ރައީސުލްޖުމްހޫރިއްޔާ މަޖިލީހަށް ފޮނުވައިފިއެވެ.
ރައްޔިތުންގެ މަޖިލީހަށް ރައީސުލްޖުމްހޫރިއްޔާ ފޮނުއްވި 4 ނަންފުޅަކީ އިންފޮމޭޝަން ކޮމިޝަނަރުގެ މަޤާމަށް ކުރިމަތިލެއްވި 9 ބޭފުޅުންގެ ތެރެއިން ރައީސުލް ޖުމްހޫރިއްޔާއަށް ފެނިވަޑައިގަންނަވާ 4 ބޭފުޅެއްގެ ނަންނަފުޅެވެ. މި ނަންފުޅުތަކުގެ ތެރޭގައި ހިމެނެނީ ހުސެއިން ފިޔާޒު މޫސާ އާއި، އަޙްމަދު ފަޔާޒާއި، އަޙްމަދު އާހިދް ރަޝީދުގެ އިތުރުން ފާތިމަތު ސައުޝަންގެ ނަމެވެ. މިބޭފުޅުންގެ ނަންތައް ދިރާސާކުރުމަށް މަޖިލީހުގެ މިނިވަން މުވައްސަސާތަކާއިބެހޭ ކޮމިޓީއަށް ވަނީ ފޮނުވާފައެވެ.
މައުލޫމާތު ހޯދައި ލިބިގަތުމުގެ ޤާނޫނުގެ ދަށުން 2014 ވަނަ އަހަރުގެ އޮގަސްޓް މަހުގެ 13 ވަނަ ދުވަހު އިންފޮމޭޝަން ކޮމިޝަނަރުގެ މަޤާމަށް އެންމެ ފުރަތަމަ އައްޔަން ކުރައްވާފައިވަނީ އަބްދުލް އަޒީޒް ޖަމާލު އަބޫބަކުރެވެ. އޭނާގެ މަޤާމުގެ މުއްދަތު ހަމަވާނީ މިމަހުގެ 22 ވަނަ ދުވަހު ވަނީ ހަމަވެފައެވެ.
އިންފޮމޭޝަން ކޮމިޝަނަރުގެ އޮފީހަކީ ޤާނޫނު އަސާސީގެ 29 ވަނަ މާއްދާއާއި މައުލޫމާތު ހޯދާ ލިބިގަތުމުގެ ޙައްޤުގެ ޤާނޫނުގެ 43 ވަނަ މާއްދާގައިވާ ގޮތުގެ މަތީން މަޖިލީހުގެ ލަފާގެމަތީން ރައީސުލް ޖުމްހޫރިއްޔާ އައްޔަން ކުރައްވާ އިންފޮމޭޝަން ކޮމިޝަނަރުގެ މަސްއޫލިއްޔަތު އަދާކުރުމަށްޓަކައި 13 ޖުލައި 2014 ވަނަ ދުވަހު އުފައްދާފައިވާ އޮފީހެކެވެ.