މިނިވަންކަމުގެ އިންތަކާއި މިންތައް ހުރަސް ނުކުރުމަށް ޕްރޮގުރެސިވް ކޯލިޝަނުން ސަރުކާރަށް ގޮވާލައިފި
އަމިއްލަ އެދުމާއި ސިޔާސީ މަންފާ ލިބިގަތުމަށްޓަކައި މިނިވަންކަމުގެ އިންތަކާއި މިންތައް ހުރަސް ނުކުރުމަށް ޕްރޮގުރެސިވް ކޯލިޝަނުން ސަރުކާރަށް ގޮވާލައިފިއެވެ.
ރާއްޖޭގެ 54 ވަނަ މިނިވަން ދުވަހާއި ގުޅިގެން އިދިކޮޅު ކޯލިޝަނުން ނެރެފައިވާ ބަޔާނުގައި ބުނެފައިވަނީ، މިފަދަ ދުވަހެއް ފާހަގަކުރަމުންދާއިރު މިނިވަންކަން ގެއްލިދާފަދަ އިޙްސާސްތައް ކުރަންޖެހުމަކީ ނުރައްކާތެރި ސިގުނަލެއް ކަމަށެވެ. އަދި ސިޔާސީ މަންފާތަކެއް ހާސިލް ކުުުރުމަށްޓަކައި ޤައުމުގެ މިނިވަންކަމުގެ އިންތައް ހުރަސް ކުރަންފަށައިފިނަމަ ނޭގިތިއްބާ އޭގެ ފޮނިމީރުކަން ހިގައިދާނެކަމަށްވެސް މިބަޔާނުގައި ބުނެފައިވެއެވެ.
މީގެ އިތުރުން ޤައުމުގެ އިޤްތިޞާދާއި ސިޔާސަތު ކަނޑައަޅާނީ ދިވެހިން ކަމަށާއި އެކަންކަން ނިންމުގެ ބާރު ބޭރުގެ އެއްވެސް ފަރާތެއްގެ އަތްމައްޗަށް ދޫކޮށްލެވިގެން ނުވާނެކަމަށާއި، ޤައުމުގެ ހުރިހާ ރައްޔިތުންގެ މެދުގައި އިންސާފާއި ހަމަހަމަކަން ޤާއިމްކޮށް މިނިވަންކަމާއިއެކު ޤައުމުގެ ކަންކަން ކުރިއަށް ގެންދިއުމަށް ބޭރުގެ ފަރާތްތަކަށް ދީލައި ނުލުމަށްވެސް މިބާނުގައި ސަރުކާރަށް ގޮވާލާފައިވެއެވެ.
ޕްރޮގްރެސިވް ކޯލިޝަނުން މިކަމަށް ގޮވާލާފައިވާއިރު، މިނިވަން ދުވަހުގެ މުނާސަބަތުގައި ޤައުމާއި މުޚާތަބް ކުރައްވައި ރައީސުލް ޖުމްހޫރިއްޔާ އިބްރާހިމް މުހައްމަދު ސާލިޙް ވަނީ ޤާނޫނު އަސާސީން ކަށަވަރުކޮށްދީފައިވާ އަސާސީ ހައްޤުތަކާއި މިނިވަންކަމުން ރައްޔިތުން މަޙްރޫމުވާ އެންމެ ހިނދުކޮޅެއްވެސް މިޤައުމަށް ކުރިމަތުވެގެންވާނެކަމަށް ޤަބޫލުފުޅުނުކުރައްވާކަމަށް ވިދާޅުވެފައެވެ. އަދި ރާއްޖެ ތަރައްޤީ ކުރުމަށްކަމަށްބުނެ ވަގުތީ މަންފާއަކަށްޓަކައި މި ލޮބުވެތި ދިވެހި ފަސްގަނޑުން ކިތަންމެ ކުޑަތަންކޮޅެއްގެ މިލްކުވެރިކަންވެސް ބޭރުގެ ބަޔަކަށް ދޫކޮށް ނުލައްވާނެކަމަށްވެސް އެމަނިކުފާނު ވިދާޅުވެފައިވެއެވެ. އަދި ދުނިޔޭގެ ސިޔާސީ އޮއިވަރަށް ދީލައިނުލާ ޖަޒީރާވަންތަ ޤައުމެއްގެ ގޮތުގައި ރާއްޖެ ތަރައްޤީ ކުރުމަކީ އެމަނިކުފާނުގެ ކޮނޑުގައި އެޅިފައިވާ އެންމެމަތީ ޤައުމީ ވާޖިބުކަމަށްވެސް ޤަައުމާއި މުޚާތަބު ކުރައްވައި ދެއްވި ޚިޠާބުގައި ރައީސުލް ޖުމްހޫރިއްޔާ ވަނީ ވިދާޅުވެފައެވެ.