ޖުޑީޝަލް ސަރވިސް ކޮމިޝަން ( ޖޭއެސްސީ)އަށް ވަކީލުންގެ ތެރެއިން ބޭފުޅަކު ހޮވުމަށް ބާއްވާ އިންތިޚާބަށް ކުރިމަތިލެއްވި ޢަބްދުލްޙަންނާން އަޙްމަދުގެ ކެންޑިޑެންސީ ބާތިލް ކޮށްފިއެވެ.
ބާ ކައުންސިލުން ވިދާޅުވީ ހަންނާންގެ ކެންޑިޑެސީ ބާޠިލްކުރީ އޭނާ އެމަޤާމަށް ކުރިމަތިލުމަށް ހުށައެޅުއްވި ފޯމުގައިވާ މަޢުލޫމާތާއި ފޯމާއެކު ހުށަހަޅާފައިވާ ލިޔެކިޔުންތައް އެކައުންސިލުން އިތުރަށް ބެލި ބެލުމުން، ޤާނޫނުއަސާސީގެ 161 ވަނަ މާއްދާގެ (ހ)އިން، ޢަބްދުލްޙަންނާން އަޙްމަދު ޖުޑީޝަލް ސަރވިސް ކޮމިޝަނުގެ މެންބަރުކަމަށް އިތުރުދައުރަކަށް ޢައްޔަންކުރުމަށް ހުރަސްއެޅޭތީއެވެ.
ޖޭއެސްސީގައި މިހާރު އާންމުންގެ މެމްބަރެއްގެ ގޮތުގައި އިންނަވަނީ ވެސް އަބްދުލްހަންނާނު އަހުމަދެވެ. ހަންނާންގެ ކެންޑިޑެންސީ ބާތިލް ކުރި ނަމަވެސް މިއިންތިޚާބުގައި ވާދަ ކުރާ އެހެން ކެންޑިޑޭޓުންގެ ކެންޑިޑޭޓް ނަންބަރުތަކަށް ބަދަލު ނާންނާނެކަންކަމަށް އިލެކްޝަންސް ކޮމިޝަނުން ވަނީ އިއުލާންކުރައްވާފައެވެ.
ޖުޑީޝަލް ސަރވިސް ކޮމިޝަނަށް ޤާނޫނީ ވަކީލަކު ހޮވުމަށް ބާއްވާ އިންތިޚާބު އޮންނާނީ މާދަމާއެވެ. ހަންނާންގެ ކެންޑިޑެންސީ ބާޠިލް ކުރުމާއެކު ދެން މި އިންތިހާބުގައި ވާދަކުރައްވާނީ ފަސް ބޭފުޅެކެވެ. އެއީ އަލީ ރަޝީދާއި އަބްދުލްމާނިއު ހުސައިނާއި އަހުމަދު ރަޝީދު ހުސައިނާއި ކުރީގެ އިންފޮމޭޝަން ކޮމިޝަނަރު އަބްދުލްއަޒީޒް ޖަމާލް އަބޫބަކުރާއި ހަނީފާ ޚާލިދެވެ.