ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މިނިވަން ދުވަހުގެ ތަހްނިޔާ ފޮނުއްވަވައިފިއެވެ.
މިއަދު ފާހަގަކުރާ ރާއްޖޭގެ 54ވަނަ މިނިވަން ދުވަހުގެ މުނާސަބަތުގައި މަޖިލީހުގެ ރައީސް ފޮނުއްވެވި ޚިތާބުގައި އެމަނިކުފާނުގެ އަމިއްލަ ނަންފުޅުގައިއާއި މަޖިލީހުގެ އެންމެހައި މެމްބަރުންނާއި މަޖިލީހުގެ މުވައްޒަފުންގެ ނަމުގައި ދުވަހުގެ ތަހްނިޔާ ރާއްޖޭގެ ހުރިހާ ރައްޔިތުންނަށް އަރިސް ކުރެއްވިއެވެ.
އެމަނިކުފާނުވަނީ ރާއްޖެއަށް މިނިވަންކަން ލިބުނު ގޮތުގެމައްޗަށް ތާރީޚީ ނަޒަރަކުން ބައްލަވާލައްވާފައެވެ. އަދި އިނގިރޭސި ސަރުކާރާއެކު ރާއްޖެއިން ވެފައިވާ ޙިމާޔަތުގެ އެއްބަސްވުމަށް ގެނައި ބަދަލުތަކާއެކު މިނިވަން ދުވަސް ފާހަގަ ކުރަމުން އައިސްފައިވާ ކަމަށާއި އެގޮތުން އެންމެ ފުރަތަމަ މިނިވަން ދުވަސް ރާއްޖޭގައި ފާހަގަ ކުރީ 24 އޭޕްރީލް 1948ގައި ކަމަށް ރައީސް ނަޝީދު ވިދާޅުވިއެވެ.
"އެ ދުވަހަކީ ޙިމާޔަތުގެ އެއްބަސްވުމަށް ބަދަލުތަކެއް އައި ދުވަހެއް. އެދުވަހުގެ ބަދަލުތަކުގެ ސަބަބުން ދިވެހި ސަރުކާރުން، ދިވެހި ދައުލަތުން އިނގިރޭސީންނަށް ދެމުން އައި ޖިޒީ ދެވުން ހުއްޓާލެވުނު،" ނަޝީދު ވިދާޅުވި އެވެ.
ނަޝީދުގެ ޚިޠާބުގައި ވަނީ، 1965ގައި އަނެއްކާވެސް ޙިމާޔަތުގެ އެއްބަސްވުމަށް ބަދަލުގެނެވުނުކަން ފާހަގަކުރައްވައި، އެފަހަރު ރާއްޖެއަކީ މިނިވަން ޤައުމެއްގެގޮތުގައި ސާފުކޮށް އިނގިރޭސީން ބަލައިގަނެ ގެޒެޓްކޮށްފިކަމަށް އޮތް ކަމަށް ވެސް ފާހަގަ ކުރައްވާފައެވެ. އަދި މިއަދު ފާހަގަ ކުރަމުން މިގެންދަނީ ސިޔާސީ މިނިވަންކަން ކަމަށާ، އަދި ބޭރުގެ އިސްތިއުމާރުގެ ދަށުގައި ރާއްޖެ ނެތްކަން ކަމުގައިވެސް އެމަނިކުފާނު ވިދާޅުވިއެވެ.
އެހެން ނަމަވެސް ރާއްޖެއިން ބޭރުގެ ޤައުމުތަކާއި ލާމެހިކުރަމުންދާ މަސައްކަތަކީ މިނިވަން ކަން މިނެކިރަންވީ ކަމެއް ނޫންކަމަށާ ރާއްޖޭގެ މިނިވަންކަން ގެއްލުވާލުމަށް ރާއްޖޭގެ ރައްޔިތުން ނުދޭނެ ކަމުގެ ކަށަވަރުކަން އެބައޮތް ކަމަށްވެސް ރައީސް ނަޝީދު ވިދާޅުވިއެވެ.