ސަރުކާރު ހިންގުމުގައި ދައުލަތުގެ އެހެން އެއްވެސް މުއައްސަސާއެއްގެ ނުފޫޒެއް ނެތްކަމަށާ، ސަރުކާރު ހިންގަމުންދަނީ ރައީސުލް ޖުމްހޫރިއްޔާ ކަމުގައި ރައީސް އޮފީހުން ވިދާޅުވެއްޖެއެވެ.
ރައީސް އޮފީހުގެ ތަރުޖަމާނު އިބްރާހީމް ހޫދު ވިދާޅުވީ ސަރުކާރު ހިންގުމުގައި އެހެން މުވައްސަސާތަކުގެ ނުފޫޒާއި ބާރު ފޯރުވާކަމަށް ބުނެ އިދިކޮޅު ފަރާތްތަކުން ދައްކަވާ ވާހަކަތަކަކީ އެއްވެސް ހަގީގަތެއް ނެތް ވާހަކަތަކެއް ކަމަށެވެ. ސަރުކާރު ހިންގަމުންދަނީ ރައީސުލް ޖުމްހޫރިއްޔާ ކަމަށާއި، އަދި ސަރުކާރު ހިންގުމުގައި ކެބިނެޓްގެ ވަޒީރުންގެ ލަފަޔާއި މަޝްވަރާ އެމަނިކުފާނު އަބަދުވެސް ހޯއްދަވާ ކަމަށް ހޫދު ވިދާޅުވިއެވެ.
ދައުލަތުގެ ތިންބާރުގެ ތެރެއިން ޤާނޫނު ހެދުމުގެ ބާރުން ސަރުކާރު ހިންގުމުގައި ނޫފޫޒު ފޯރުވާކަމަށް މަޖިލީހުގައި ހިމެނޭ އިދިކޮޅު ބައެއް މެމްބަރުން ވަނީ ވިދާޅުވެފައެވެ. މަޖިލީހުގެ އިއްޔެގެ ޖަލްސާގައި ވާހަކަދައްކަވަމުން ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވީ ސަރުކާރު ހިންގަމުންދަނީ މަޖިލީހުން ކަމަށާ، މަޖިލީހުން ސަރުކާރު ހިންގުމަށް ޖާގަ ދޭންޖެހޭކަމަށެވެ.
ޤާނޫނު އަސާސީގެ ހަތަރުވަނަ ބާބުގައި ވެރިކަން ހިންގުމުގެ ބާރުތައް ލިބިގެންވަނީ ރައީސުލް ޖުމްހޫރިއްޔާއަށް ކަމަށާ، ދައުލަތާއި، ސިފައިންނާއި، ސަރުކާރުގެ އެންމެމަތީ ވެރިޔަކީވެސް ރައީސުލް ޖުމްހޫރިއްޔާ ކަމުގައި ވަނީ ކަނަޑައަޅާފައެވެ.