ދިވެހިރާއްޖޭގެޤައުމީ ޔުނިވަރސިޓީގެ ކައުންސިލަށް ރައީސުލްޖުމްހޫރއިްޔާ ޢައްޔަންކުރައްވާ މެންބަރުންގެ ޢަދަދު މަދުކުރުމަށް ޤައުމީ ޔުނިވާސިޓީއާއި ބެހޭ ޤާނޫނަށް ހުށަހެޅި އިޞްލާޙު މަޖިލީހުން ފާސްކޮށްފިއެވެ.
މަޑަވެލި ދާއިރާގެ މެންބަރު ޙުސައިން ފިރުޝަން ހުށައެޅުއްވި އިޞްލާހު ފާސްވީ ވޯޓްގައި ބައިވެރިވެވަޑައިގެންނެވި 65 މެންބަރުންގެ އަޣްލަބިއްޔަތުންނެވެ. މިހާރު ޔުނިވާސިޓީގެ ކައުންސިލްގައި ގިނައިން ތިއްބަވަނީ ރައީސުލްޖުމްހޫރިއްޔާ ޢައްޔަނުކުރައްވާ މެންބަރުންނެވެ. އެގޮތުން ޔުނިވާސިޓީގެ ކައުންސިލްގައި ހިމެނިވަޑައިގަންނަވާ 13 މެންބަރުންގެ ތެރެއިން 9 މެންބަރުންނަކީ ސީދާ ރައީސުލްޖުމްހޫރިއްޔާ ޢައްޔަންުކުރައްވާ މެންބަރުންނެވެ.
ފިރުޝާން ހުށައެޅުއްވި އިޞްލާޙުގައި ވަނީ ޔުނިވަރސިޓީގެ ކައުންސިލްގައި ހިމެނޭ މެމްބަރުންގެ ތެރެއިން ރައީސުލްޖުމްހޫރިއްޔާ ޢައްޔަންކުރައްވާ ބޭފުޅުންނަކީ ހަމައެކަނި ޗާންސެލާ އަށް ހެދުމަށެވެ. ޑެޕިއުޓީ ވައިސް ޗާންސެލަރު އައްޔަނުކުރާނީ ޔުނިވަސިޓީގެ މަޖިލިހުން ކަމަށް އިސްލާޙުގައި ބަޔާންކޮށްފައިވެއެވެ. އަދި 16 މެންބަރުން ޢައްޔަންކުރާނީވެސް އެ ކައުންސިލުންކަމަށްވެސް ފިރުޝަން ހުށައެޅުއްވި އިޞްލާޙުގައިވެއެވެ.
މި އިޞްލާޙުގައި ވާގޮތުން ޗާންސެލަރާއި ވައިސް ޗާންސެލަރުގެ މަޤާމުގެ މުއްދަތަކީ 5 އަހަރު ދުވަހެވެ. ނަމަވެސް ޑެޕިއުޓީ ވައިސް ޗާންސެލަރުންގެ މަގާމުގެ ދައުރާއި މަސްއޫލިއްޔަތު ކަނޑައަޅާނީ ޔުނިވަސިޓީގެ މަޖިލިހުންކަމަށްވެސް އެ އިޞްލާޙުގައި ބަޔާންކޮށްފައިވެއެވެ.