ބްރޯޑްކާސްޓިން ކޮމިޝަންގެ މެމްބަރުކަމުން އެ ކޮމިޝަނުގެ ރައީސް މުހައްމަދު ޝަހީބާއި ނާއިބު ރައީސް ފާތިމަތު ޒައިނާ ވަކިކުރަން މަޖިލީހުގެ ތަޅުމަށް ފޮނުވަން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީން ފާސްކޮށްފިއެވެ.
އެ ދެ މެމްބަރުން ވަކި ކުރުމަށް މިނިވަން މުވައްސަސާތަކާ ބެހޭ ކޮމެޓީން ނިންމީ އެ ކޮމެޓީގެ ހުރިހާ މެމްބަރުންގެ އިއްތިފާގުންނެވެ. ބްރޯޑްކާސްޓިންގ ކޮމިޝަނުގެ މެމްބަރުން ގާނޫނީ ޒިންމާ އުފުލަމުން ނުދާ ކަމަށް ބުނާ މައްސަލަ ބެލުމަށް އެކުލަވާލި ސަބް ކޮމެޓީން ނިންމި ރިޕޯޓަށް ރިއާޔަތްކުރުމަށްފަހު ކޮމިޝަނުގެ ރައީސާއި ނައިބު ރައީސް ވަކިކުރުމަށް މަޖިލީހުގެ ތަޅުމަށް ފޮނުވަން ފާސްކުރުމަށް ހުށައެޅުއްވީ ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު މުޙައްމަދު އަބްދުﷲ ޝަފީގެވެ. އެ މެމްބަރުން ކޮމިޝަނުން ވަކިވާނީ މަޖިލީހުގެ ތަޅުމުން އެގޮތައް ފާސް ކުރުމުންނެވެ.
މިނިވަން މުވައްސަސާތަކާ ބެހޭ ކޮމެޓީގައި މިއަދު ބޭއްވި ބައްދަލުވުމުގައި ވަނީ ގާނޫނުން އެ ކޮމިޝަނުގެ މެމްބަރުންނާ ހަވާލުކޮށްފައިވާ ޒިންމާތައް އަދާކޮށްފައިނުވާކަމަށްބުނާ މައްސަލަ ދިރާސާ ކުރުމަށް ފަހު ސަބް ކޮމެޓީން އެކުލަވާލި ރިޕޯޓް ހުށައަޅާފައެވެ. އެ ރިޕޯޓުގައިވާ ގޮތުން މިހާރު އެ ކޮމިޝަނުގައި ތިއްބެވި މެމްބަރުން، ޤާނޫނުން އެ މެމްބަރުންގެ މައްޗަށް ހަވާލުކޮށްފައިވާ މަސްޢޫލިއްޔަތު އަދާކުރައްވާފައެއް ނުވެއެވެ. އަދި އެ ރިޕޯޓުގެ މައްޗަށް ބައްލަވާ މިނިވަން މުވައްސަސާތަކާ ބެހޭ ކޮމެޓީގައި މެމްބަރުން ވަނީ ކަންބޮޑުން ފާޅުކުރައްވާފައެވެ.
ބްރޯޑްކާސްޓިންގ ކޮމިޝަނުން ވަކި ވަކި މެމްބަރުން ގެންނަވައި ސުވާލު ކުރެއްވުމަށްފަހު ސަބް ކޮމެޓީން އެކުލަވާލި ރިޕޯޓްގައި އޮތީ މިނިވަން މުވައްސަސާތަކާ ބެހޭ ކޮމެޓީން އެ މެމްބަރުންނާމެދު އަމަލު ކުރައްވާނެ ގޮތެއް ކަނޑައެޅުމަށެވެ. އަދި އެ ރިޕޯޓުގައި ކޮމިޝަނުގެ މެމްބަރުންގެ ތެރެއިން މިހާރު އެ ކޮމިޝަނުގެ ނައިބު ރައީސް ޒައިނާ ސިޔާސީ ހަރަކާތެއްގައި ބައިވެރިވެވަޑައިގެންނެވި ކަމާއި އަދި ހަމަހަމަ ކަމެއްނެތް ގޮތައް ވަކި މީޑިޔާއަކާ ގުޅޭ މައްސަލަތަކެއް ކޮމިޝަނަށް ހުށައަޅުއްވައިގެން ފާސްކުރައްވަން މަސައްކަތްކުރައްވާފައިވާކަން އެނގޭ ކަމަށްވެސް އެ ރިޕޯޓްގައި ފާހަގަކޮށްފައިވެއެވެ. އަދި އެ ނޫސްވެސް ގޮތް ގޮތުން ކޮމިޝަނުގެ މެމްބަރުން ޤާނޫނީ ޒިންމާ އަދާކުރުމުގައި ފަސް ޖެހިފައިވާކަމަށް ރިޕޯޓްގައި ވަރަށް ބޮޑަށް ފާހަގަކޮށްފައިވެއެވެ.
ބްރޯޑްކާސްޓިންގ ކޮމިޝަނުގައި މިހާރު ތިއްބެވި ފަސް މެމްބަރުންގެ ތެރެއިން ޒީނާ ޒާހިރު ފިޔަވާ ދެން ތިއްބެވި ހަތަރު މެމްބަރުން ވަކި ކުރުމަށް ވެސް މިނިވަން މުވައްސަސާތަކާ ބެހޭ ކޮމެޓީއަށް މިއަދު ހުށައެޅިއެވެ. ނަމަވެސް ގަމު ދާއިރާގެ މެމްބަރު މުޙައްމަދު ވިސާމް ހުށައެޅުއްވި އެ ހުށައެޅުން ފާހެއްނުވިއެވެ. އެ ހުށައެޅުމަށް ތާއިދުނުކުރާ ބައެއް މެމްބަރުން ވިދާޅުވީ ކޮމިޝަނުގައި ތިއްބެވި ގިނަ މެމްބަރުން ތަކެއް އެއްފަހަރާ ވަކިކޮށްފިނަމަ ޤާނޫނީ ހުސްކަމެއްގެ ތެރެއަށް ގޮސްދާނެ ކަމަށެވެ. އަދި އެ ކޮމިޝަނުގެ މެމްބަރު ޒީނާއާ ސަބްކޮމެޓީގައި ސުވާލު ކުރެވިފައިނުވާތީ އޭނާއާ ސުވާލު ކުރުމަށްފަހު ބާކީ ދެން ތިބި މެމްބަރުންނާމެދު އަމަލު ކުރާނެ ގޮތަކާމެދު ފަހުން ގޮތެއް ނިންމުމަށްވެސް ކޮމިޝަނުގެ މެމްބަރުން ވަނީ އިއްތިފާގުވެފައެވެ.
ޒީނާގެ އިތުރުން ބްރޯޑްކާސްޓިންގ ކޮމިޝަނުގައި ދެން ހިމެނެނީ އައިމިނަތު ސަރާޙަތު އިއްޒަތާއި އަމްޖަދު ވަހީދެވެ.
ބްރޯޑްކާސްޓިންގ ކޮމިޝަނުގެ މެންބަރުންގެ މައްސަލަތައް މަޖިލީހުގެ ކޮމިޓީން ބަލަމުން އަންނަނިކޮށް އެ ކޮމިޝަންގެ މެންބަރު އިސްމާޢީލް ޞަފްވާނާއި، ޙަސަން ނަބާޙު ވަނީ މެންބަރުކަމުން އިސްތިއުފާދެއްވާފައެވެ. ޞަފްވާން މަޤާމުން އިސްތިއުފާދެއްވާފައިވަނީ ގިނަ ދުވަސްތަކެއް ވަންދެން ވަޒީފާއަށް ނިކުމެވަޑައިނުގެން މުސާރަ ނެންގެވުމަށްފަހުއެވެ. ޝަހީބާއި ޒައިނާ ބްރޯޑްކާސްޓިން ކޮމިޝަންގެ މެމްބަރަކަށް އައްޔަން ކޮށްފައިވަނީ 5 އޭޕްރީލް 2016 ގައެވެ. ޝަހީބު ބްރޯޑް ކާސްޓިން ކޮމިޝަނުގެ ރައީސްކަމުގައި ހުންނަވާ މިއީ ދެ ވަނަ ދައުރެވެ.