13 އަހަރުވަންދެން ކުޅުންތެރިއެއްގެ ގޮތުގައި ޚިދުމަތްކުރި ޗެލްސީގެ ކޯޗުކަމާއި ކުރީގެ ކެޕްޓަން ފްރެންކް ލަމްޕާޑް ހަވާލްވެއްޖެއެވެ.
ޗެލްސީގެ ކޯޗުކަމާއި ލަމްޕާޑް ހަވާލްވީ އެ މަގާމުގައި ކުރިން ހުރި މައުރީސިއޯ ސަރީ ޔުވެންޓަސްއާއި ހަވާލުވުމާއި ގުޅިގެންނެވެ. ލަމްޕާޑަކީ ސަރީގެ ބަދަލުގައި އެ މަގާމަށް ގެންނަން ކުލަބުގެ ވެރިން އެންމެ ބޭނުންވި މީހާއެވެ. 41 އަހަރުގެ ލަމްޕާޑް ޗެލްސީގެ ކޯޗުކަމާއި ހަވާލްވީ 3 އަހަރުގެ އެއްބަސްވުމެއްގެ ދަށުންނެވެ.
ކޯޗެއްގެ ގޮތުގައި ލަމްޕާޑް ކެރިއަރުފެށި މިދިޔަ އަހަރު އިނގިރޭސި ދެވަނަ ޑިވިޝަންގެ ޑަރބީ ކައުންޓީއާއިއެކުގައެވެ. އެކުލަބަށް ޕްރޮމޯޝަން ޕްލޭއޮފް މެޗުން ފުރުސަތު ހޯދައިދިން ލަމްޕާޑު މަގާމާއި ހަވާލުވުމަށްފަހު ބުނީ ޗެލްސީގެ ކޯޗުކަމާއި ހަވާލުވުމަކީ ހުވަފެނެއް ހަގީގަތަކަށްވުންފަދަ ކަމެއްކަމަށެވެ.
ޗެލްސީގެ ކޯޗަކަށް ލަމްޕާޑް ހަމަޖެއްސިކަން އިއުލާން މިކުރީ ޗެލްސީއާއި ވާހަކަދެއްކުމަށް އޭނާގެ ކުރީގެ ކުލަބު ޑަރބީން ލަމްޕާޑަށް ހުއްދަދިންތާ ނުވަ ދުވަސް ފަހުންކަން ފާހަގަކޮށްލެވެއެވެ.
ކުޅުންތެރިއެއްގެ ގޮތުގައި ލަމްޕާޑަކީ ޗެލްސީގެ އެންމެ ކާމިޔާބު މިޑްފިލްޑަރެވެ. 211 ގޯލާއިއެކު ލަމްޕާޑަކީ ކުލަބުގެ ތާރީޚުގައި އެންމެ ގިނަ ގޯލް ޖެހި ކުޅުންތެރިޔާ.އެވެ އެކުލަބާއިއެކު 11 ތައްޓެއް ލަމްޕާޑް ހޯދިއިރު، އޭނާވަނީ އެކުލަބަށް 648 މެޗު ކުޅެދީފައެވެ. 2014ވަނަ އަހަރު ޗެލްސީ ދޫކޮށްލި ލަމްޕާޑް ފުޓްބޯޅަ ކުޅުން ހުއްޓާލީ 2017ވަނަ އަހަރުގައެވެ.