ޕީއެސްއެމްގެ ކުރީގެ ވެރިންގެ މައްސަލަތައް އޭސީސީގެ މިހާރުގެ ވެރިނަށް އިންސާފުވެރިކޮށް ނުބެލޭނެ - ޕީއެސްއެމް
ޕީއެސްއެމްގެ ކުރީގެ މެނޭޖުމަންޓުން ކޮރަޕްޝަނަށް މަގުފައިވާގޮތަށް ކޮށްފައިވާ ބައެއްކަންކަން ރަނގަޅަށްކަމަށް އޭސީސީން ލަފާ ދެއްވާފައިވާކަމަށާ، އޭސީސީ ހިންގެވުމާ މިހާރު ޙަވާލުވެ ތިއްބެވި ވެރިންގެ މަޞްލަޙަތު ފުށުނާރާނެ ގޮތަކަށް މިމައްސަލަތައް އިންސާފުން ނުބެލޭނެކަމަށް ޕީއެސްއެމްއިން ވިދާޅުވެއްޖެއެވެ.
ޕީއެސްއެމްގެ ފަރާތުން މިހެން ވިދާޅުވީ ރައްޔިތުންގެ މަޖިލީހުގެ ސްޓޭޓް އެންޓަޕްރައިޒް ކޮމިޓީ (އެސްއޯއީ) އަށް ޙާޒިރުވެ ޕަބްލިކް ސަރވިސް މީޑިއާ (ޕީއެސްއެމް)އާ ގުޅޭގޮތުން އެންޓި-ކޮރަޕްޝަން ކޮމިޝަން (އޭސީސީ)ގެ މެމްބަރުން ދެއްކެވި ވާހަކަތަކަށް ރައްދުދެއްވައި ނެރުއްވި ބަޔާނެއްގައެވެ.
އެބަޔާނުގައިވަނީ ޕީއެސްއެމް ހިންގުން މިސަރުކާރުގް ޢައްޔަންކުރެއްވި އާ މެނޭޖްމަންޓާ ޙަވާލުވިއިރު، ކުރީގެ މެނޭޖްމަންޓުން ހިންގަން ފަށާފައިވާ ބައެއް މަސައްކަތްތައް ހިންގުމުގައި، ކޮރަޕްޝަނަށް މަގުފަހިވާގޮތަށްހުރި ބައެއް ކަންކަން ފާހަގަކުރެވުނުކަމަށާ، ވިއްސަށްވުރެ ގިނަ މައްސަލަ އޭސީސީއަށް ހުށަހަޅާފައިވާތާ ފަސް މަސްދުވަހަށްވުރެ ގިނަދުވަސް މިހާރު ވެފައިވާކަމަށެވެ. އެއެމައްސަލަތައް އޭސީސީއަށް ހުށަހަޅަން ޕީއެސްއެމްގެ މިހާރުގެ މެނޭޖުމަންޓުން ނިންމީ ކުންފުނީގެ އެތެރޭގައި އެކަންކަން ބަލައި އިދާރީ ތަޙުޤީގެއް ކުރުމަށްފަހު އިތުރަށްބަލަންޖެހޭ ސީރިއަސް މައްސަލަތަކެއް ހުރިކަން ފާހަގަ ކުރެވިގެން، ކުންފުނީގެ ބޯޑުން އެގޮތަށް ނިންމުމާ ގުޅިގެންކަމަށްވެސް ޕީއެސްއެމްގެ ބަޔާނުގައި ވިދާޅުވެފައިވެއެވެ.
އަދި މިމައްސަލަތައް އޭސީސީއަށް ހުށަހެޅުމުން އެކޮމިޝަނުގެ ތަޙްޤީޤް ޓީމުތަކުން ޕީއެސްއެމްއަށްގޮސް އޭސީސީން ބޭނުންވީ ކޮންމެ ލިޔުމެއް އެމައްސަލައަކާއި ގުޅުންހުރި ޑިޕާރޓްމަންޓްތަކުން ހޯދައިގެން ގެންދެވޭނޭ އިންތިޒާމް ޕީއެސްއެމްއިން އޮތީ ހަމަޖައްސާފައިކަމަށް އެބަޔާނުގައިވެއެވެ. އަދި މިމައްސަލަތަކާގުޅިގެން ޕީއެސްއެމްގެ ކަމާ ގުޅޭ މުވައްޒަފުންގެ ކޮމްޕިއުޓަރތަކުގެ ހާރޑްޑިސްކްތަކާއި، އީމެއިލް މެދުވެރިކޮށް ކޮށްފައިވާ މުޢާމަލާތްތައްވެސް އޭސީސީގެ ތަޙްޤީޤްގެ ބޭނުމަށް ގެންގޮސްފައިވާކަން ޕީއެސްއެމްއިން ހާމަކުރައްވާފައިވެއެވެ.
އެހެންނަމަވެސް ޕީއެސްއެމްއިން ހުށަހަޅާފައިވާ މި މައްސަލަތަކާގުޅިގެން ކުންފުނީގެ ފަރާތުން އެކޮމިޝަނަށް އެއްވެސް ލިއުމެއް ނުލިބޭކަން ޕީއެސްއެމްއާ ޙިއްޞާ ނުކޮށް، އޭސީސީގެ މެމްބަރުން ރައްޔިތުންގެ މަޖިލީހުގެ ކޮމެޓީއަކަށް ދެއްވި މަޢުލޫމާތުގައި، ޕީއެސްއެމްއިން ހުށަހަޅާފައިވާ މައްސަލަތަކާ ގުޅުންހުރި ބައެއް ލިޔެކިއުންތައް ފެންނަން ނެތްކަމަށާއި، އަދި އެކޮމިޝަނަށްވެސް ލިބިފައި ނެތުމުގެ ސަބަބުން އެކޮމިޝަނުން ކުރަމުންދާ ތަޙުޤީޤަށް ހުރަސް އެޅުނުކަމަށް ހާމަކުރުމަކީ ޕީއެސްއެމްއިން އޭސީސީއަށް ހުށަހެޅި މައްސަލަތައް ނުބަލައި ފައިލް ކުރުމުގެ ނިޔަތުގައި އެކޮމިކޝަނުން ކުރެއްވި ކަމެއްކަމަށް ޤަބޫލުކުރުމުގެ ފުރުޞަތު އެބައޮތްކަމަށް ޕީއެސްއެމްގެ ބަޔާނުގައި ވިދާޅުވެފައިވެއެވެ.
އަދި ޕީއެސްއެމްގެ ކުރީގެ މެނޭޖުމަންޓުން ގިނަ މަޝްރޫޢުތަކެއް ޤާނޫނާއި ޤަވާޢިދާ ޚިލާފަށް ވަކިބަޔަކަށް ނާޖާއިޒު ފައިދާ ލިބޭގޮތަށް އަދި ކޮރަޕްޝަނަށް މަގުފައިވާގޮތަށް ކުރިޔަށް ގެންދިއުމަށް ކުންފުނީގެ އޭރުގެބޯޑާއި، މެނޭޖްމަންޓުން ނިންމާފައިވާ ނިންމުން އެންމެ ރަނގަޅުކަމަށް، އޭސީސީން ލަފާ ދެއްވާފައިވާކަމަށްވެސް ޕީއެސްއެމްއިން ވިދާޅުވެއެވެ.
އެހެން ކަމުން މިހާރު އޭސީ ހިންގެވުމާ ޙަވާލުވެ ތިއްބެވި ވެރިންގެ މަޞްލަޙަތު ފުށުނާރާނެ ގޮތަކަށް މިކަން އިންސާފުގެ މަގުން އެއްކިބާނުވެ، ޕީއެސްއެމްއިން ހުށަހަޅާފައިވާ މައްސަލަތައް ބެލިދާނެކަމަކަށް ނުދެކޭކަމަށްވެސް ޕީއެސްއެމްގެ ބަޔާނުގައި ވިދާޅުވެފައިވެއެވެ.