ޔުއެފާ ނޭޝަންސް ލީގުގެ ފުރަތަމަ މުބާރާތް ޕޯޗުގަލްއަށް ކާމިޔާބުކުރެވުމަކީ އެޤައުމުގެ ރައްޔިތުންނަށް ލިބުނު ވަރަށް ބޮޑު ޝަރަފެއް ކަމަށް ޕޯޗުގަލްގެ ކޯޗު ފެނާންޑޯ ސަންތޯސް ބުނެފިއެވެ.
ނެދަލޭންޑްސް ބަލިކޮށް ނޭޝަންސް ލީގުގެ ތަށި ޕޯޗުގަލްއަށް ހޯދައިދިނުމަށްފަހު ނޫސްވެރިންނާއި ވާހަކަދައްކަމުން ސަންތޯސް ބުނީ، މި މުބާރާތުގެ ޗެމްޕިއަންކަން ފުރަތަމަ ފަހަރަށް ހޯދި ޤައުމުގެ ޝަރަފް ޕޯޗުގަލްއަށް ލިބުމުން ވަރަށް ހިތްހަމަ ޖެހޭކަމަށާއި، މިއީ އެ ޤައުމުގެ ކުޅުންތެރިންނާއި ރައްޔިތުންނަށް ލިބުނު ފަޙުރެއްކަމަށެވެ.
ކޯޗު ބުނީ ދެން މަސައްކަތްކުރަންވީ ކުރިޔަށްއޮތްތަނުގައި އޮތް މުބާރާތްތަކުން އިތުރު ކާމިޔާބީތައް ހޯދަންކަމަށެވެ.
ފައިނަލް މެޗުގެ މޮޅު ކުޅުންތެރިޔާގެ މަގާމް ހޯދި ބެނާޑޯ ސިލްވާ ބުނީ މި ސީޒަނީ އެތައް ގޮތަކުން އޭނާއަށް ކާމިޔާބު ސީޒަނެއް ކަމަށާއި، މި ފުރުސަތުގައި ޕޯޗުގަލްގެ ރައްޔިތުންނަށް ޝުކުރު އަދާކުރާކަމަށެވެ. އަދި ކުރިޔަށްއޮތް ސީޒަން މި ސީޒަނަށްވުރެއް ކާމިޔާބު ސީޒަނަކަށް ހެދުމަށް މަސައްކަތްކުރާނެކަމަށްވެސް ސިލްވާ ބުންޏެވެ.