އިނގިރޭސި ވިލާތުގައި މިހާރު ކުރިއަށްދާ ވޯލްޑް ކަޕް ކްރިކެޓް މުބާރާތުގައި އިއްޔެ ކުޅުނު މެޗްގައި އިންޑިއާ އިން އެންމެ ފަހުގެ ޗެމްޕިއަން އޮސްޓްރޭލިއާ ބަލިކޮށްފިއެވެ. މި މެޗްގައި އޮސްޓްރޭލިއާގެ މައްޗަށް އިންޑިއާ އިން ކުރި ހޯދީ 36 ލަނޑުންނެވެ.
އިއްޔެގެ މެޗްގައި ޓޮސް ދިމާވުމުން އިންޑިއާ އިން ގަސްދުކުރީ ކުޅުމަށެވެ. އެޓީމުން ކުޅެން އަރައި 50 އޯވަރުގެ ތެރޭގައި 5 ކުޅުންތެރިން ނުބައިވެގެން 352 ލަނޑު ހެދިއެވެ. މިއީ ވޯލްޑް ކަޕް މުބާރާތެއްގައި މިހާތަނަށް އޮސްޓްރޭލިއާ އާ ދެކޮޅަށް ޓީމަކުން ހެދި އެންމެ މަތީ ސްކޯއެވެ. އިންޑިއާ އިން މި މެޗްގައި އެންމެ ރަނގަޅަށް ކުޅެފައިވަނީ 117 ލަނޑު ހެދި ޝިކަރު ދަވާންއެވެ. މި މެޗްގައި އިންޑިއާގެ ކެޕްޓަން ވިރާތް ކޯލީ ވަނީ 82 ލަނޑު ހަދައިފައެވެ.
ޖަވާބުގައި އޮސްޓްރޭލިއާ އިން ކުޅެން އަރައި 50 އޯވަރު ހަމަވިއިރު ހުރިހާ ކުޅުންތެރިން ނުބައިވެގެން ހަމަކުރެވުނީ 316 ލަނޑެވެ. މި މެޗްގައި އޮސްޓްރޭލިއާގެ ޓީމުން އެންމެ ރަގަޅަށް ކުޅެފައިވަނީ 69 ލަނޑު ހެދި ސްޓީވް ސްމިތްއެވެ.
އިންޑިއާ އިން އެންމެ ރަނގަޅަށް މި އިނިންގްސްގައި އުކައިފައިވަނީ 50 ލަނޑަށް 3 ވިކެޓް ނެގި ކުމާރު އެވެ. އިންޑިއާ އިން މި މުބާރާތުގައި ކުޅޭ ތިން ވަނަ މެޗްގައި އަންނަ ބުރާސްފަތި ދުވަހު ނިއު ޒީލޭންޑާއި ވާދަކުރާއިރު އޮސްޓްރޭލިއާ އިން މުބާރާތުގައި ކުޅޭ ތިންވަނަ މެޗްގައި ބުދަ ދުވަހު ނުކުންނާނީ ޕާކިސްތާނާ ދެކޮޅަށެވެ.