ފްރާންސްގެ ޕެރިހުގައި ކުރިއަށްދިޔަ ފްރެންޗް އޯޕަން ޓެނިސް މުބާރާތުގެ ފިރިހެން ބައިގެ ސިންގަލްސް ޗެމްޕިއަންކަން ސްޕެއިންގެ ރަފައެލް ނަޑާލް 12ވަނަ ފަހަރަށް ހޯދައިފިއެވެ.
އިއްޔެ ކުޅުނު ފައިނަލް މެޗްގައި މުބާރާތުގެ ހަތަރު ވަނަ ސީޑް އޮސްޓްރޭލިއާގެ ޑޮމިނިކް ތިއެމް އާ ވާދަކޮށް ނަޑާލް ކާމިޔާބު ހޯދީ 1-3 އިންނެވެ. ފައިނަލް މެޗްގެ ސެޓްތައް ނަޑާލް ގެންދިޔައީ 3-6، 7-5، 1-6، 1-6 އިންނެވެ. މިއީ ނަޑާލް ފްރެންޗް އޯޕަން ޓެނިސް މުބާރާތް ކާމިޔާބުކުރި 12 ވަނަ ފަހަރެވެ.
ދުނިޔޭގެ ރޭންކިންގެ ދެ ވަނައިގައި މިވަގުތު އޮތް ނަޑާލް ވަނީ އެންމެ ފަހުން ބޭއްވި ފްރެންޗް އޯޕަން 3 މުބާރާތް ވެސް ކާމިޔާބުކޮށްފައެވެ. މިދިޔަ އަހަރު އޮތް ފްރެންޗް އޯޕަން ޓެނިސް މުބާރާތުގެ ފައިނަލް މެޗް ވެސް ނަޑާލް ކާމިޔާބުކޮށްފައިވަނީ ތިއެމް އާ ވާދަކޮށްގެންނެވެ.އެކަމަކު މިއަހަރުގެ ފައިނަލާ ހިލާފަށް އެފަހަރު ނަޑާލް މެޗް ކާމިޔާބުކުރީ ސީދާ ތިން ސެޓުންނެވެ.
އިއްޔެ ނިމުނު މިއަހަރުގެ ދެ ވަނަ ގްރޭންޑް ސްލޭމް ޓެނިސް މުބާރާތުގައި ނަޑާލް ހޯދި ކާމިޔާބާއެކު ގްރޭންޑް ސްލޭމް މުބާރާތް އެންމެ ގިނަ ފަހަރު ހޯދައިފައިވާ ސްވިޒަލެންޑްގެ ރޮޖާ ފެޑެރާގެ ރެކޯޑާ އަރާ ހަމަކުރުމަށް އޭނާއަށް ދެން ކާމިޔާބުކުރަން ބޭނުންވަނީ ދެ މުބާރާތެވެ. މިފަހަރުގެ ފައިނަލަށް ނަޑާލް ދަތުރުކޮށްފައިވަނީ ސެމީ ފައިނަލްގައި ފެޑެރާ ބަލިކުރުމަށްފަހުގައެވެ.