ގއ. ކަނޑުހުޅުދޫ އަށް ދިޔަ ފެރީއަކުން މަސްތުވާތަކެތި ގެންދާކަން އެނގިގެން، އެ ރަށުގައި ފުލުހުން ހަރަކާތްތެރިވާކަމުގެ މައުލޫމާތު ލިބުމުން ފެރީން ކަނޑަށް ފުންމާލި މީހާ ހޯދާ، ފުލުހުންގެ ބެލުމުގެ ދަށަށް އެމީހާ ގެންގޮސްފިއެވެ.
ފުލުހުން މިއަދު ވިދާޅުވީ ރޭ ގއ. ކަނޑުހުޅުދޫއަށް ދަތުރުކުރަމުން ދިޔަ ފެރީއަކުން ފުލުހުންނަށް ފިލަން ފުއްމާލި މީހާ އެ އަތޮޅު މާވަރުލު ވަޅެއްގެ ތެރޭގައި ފިލާ އޮއްވާ މިއަދު ހެނދުނު ހޯދާފައިވާ ކަމަށެވެ. އޭނާ ހޯދުނީ މިއަދު 9:00 ހާއިރު ކަމަށްވެސް ފުލުހުން ވިދާޅުވިއެވެ.
ފުލުހުން ވިދާޅުވީ އޭނާ ފުލުހުންގެ ބެލުމުގެ ދަށަށް ގެނައިއިރު އޭނާގެ އަތުގައި އެއްވެސް އެއްޗެއް ފެނިފައި ނުވާ ކަމަށެވެ. އޭނާ ހޯދުމުގައި މާވަރުލުގައި މަސައްކަތް ކުރާ ފަރާތްތަކުގެ އެހީތެރިކަން ފުލުހުންނަށް ލިބިފައިވާތީ އެކަމަށް ފުލުހުން ވަނީ ޝުކުރު އަދާކޮށްފައެވެ.
އެމީހާ ކަނޑަށް ފުއްމާލުމުން އޭނާ ހޯދަން ޑިންގީއެއްގައި ފަލިޖަހާފައި ތިން މީހަކު ގޮސްގެން އުޅެނިކޮށް އެ ޑިންގީ ވަނީ ބަންޑުން ޖަހާލައިފައެވެ. ފުލުހުން ވިދާޅުވީ ޑިންގީ ބަންޑުންޖަހާލި ހާދިސާގައި ކަނޑުވި މީހުންގެ ތެރެއިން އެކަކު ފަތާފައި މާވަރުލަށް އެރިކަމަށާއި އަދި އެކަކު ކަނޑުހުޅުދޫގެ ދޯންޏަކަށް އަރާފައިވާކަމަށެވެ.