އިންޑިއާ ކަނޑުގެ ޞުލްޙަ މަސަލަސްކަން ކަށަވަރުކުރުމަށް މި ސަރުކާރުން ޚާއްޞަ އިސްކަމެއްދޭނެ- ރައީސް

އިންޑިއާ ކަނޑުގެ ޞުލްޙަ މަސަލަސްކަމާއި ހަމަޖެހުން ކަށަވަރުކުރުމަކީ މި ސަރުކާރުން އަބަދުވެސް ޚާއްޞަ އިސްކަމެއްދޭ ކަމެއްކަމުގައި ރައީސުލްޖުމްހޫރިއްޔާ އިބްރާހީމް މުޙައްދު ޞާލިޙް ވިދާޅުވެއްޖެއެވެ.

އިންޑިއާގެ ބޮޑުވަޒީރު ނަރެންދްރަ މޯދީއާއި ރަޢީސް އިބްރާޙިމް މުޙައްމަދު ސޯލިޙް ކުރިއަށްގެންދެވި ބައްދަލުވުމަށްފަހު، ދެއްވި ގުޅިފައިވާ ބަޔާނުގައި ރައީސް އިބްރާޙިމް މުޙައްމަދު ސާލިޙް ވިދާޅުވީ އެމަނިކުފާނު ވެރިކަމާއި ޙަވާލުވެވަޑައިގެންނެވި ދުވަހުން ފެށިގެން، ދިވެހި ސަރުކާރުން މަސައްކަތް ކުރަމުން މިއަންނަނީ ދެޤައުމުގެ ދެމެދުގައިވާ ގުޅުން އަލުން އިޢާދަކޮށް ބަދަހިކުރުމާއެކު، އަވައްޓެރި އެހެން ޤައުމުތަކާއެކު ވެސް އިތުރަށް ގުޅުން ބަދަހިކުރުމަށްކަމަށެވެ.

މީގެއިތުރުންވެސް ބައިނަލްއަޤްވާމީ މައިދާނުގައި ދިވެހިރާއްޖެއިން އަޑުއުފުލާ ކަންކަމަށް އެއްބާރުލުންދިނުމާއި އަދި އިންޑިއާއިން ކުރަމުންދާ މަސައްކަތުގައިވެސް އެއްބާރުލުން ދެއްވާނެކަމަށް ރައީސް ވިދާޅުވިއެވެ. އަދި ޓެރަރިޒަމާއި ދެކޮޅަށް ކުރާ މަސައްކަތާއި، މޫސުމީ ހިރާސްތައް ކުޑަކުރުމަށް ރާއްޖެއިން ކުރާ މަސައްކަތުގައި އިތުރަށް އެހީތެރިވެދީ އެއްބާރުލުން ދިނުމާއި ގުޅޭގޮތުން އިންޑިއާއާއިއެކު މަޝްވަރާކޮށްފައވިާކަމަށް ރަޢިސް ވިދާޅުވިއެވެ.

"މަސައްކަތް ކުރަމުން މިދަނީ އަލުން ގުޅުންތައް އިޢާދަކުރުމަށް. އަވަށްޓެރި އެހެން ޤައުމުތަކާއިއެކުވެސް ގުޅުން ބަދަހިކުރާނަން. ރާއްޖޭގެ ސުލްޙަ ދެމެހެއްޓުމަށް ސަރަޙައްދުގެ ހަމަޖެހުން މުހިންމު." ރައީސް ވިދާޅުވިއެވެ.

ރައީސް ވިދާޅުވީ އިންޑިއާގެ ބޮޑުވަޒީރުގެ މި ދަތުރުފުޅާއި، ދެ ޤައުމުގެ ދެމެދުގައި ޤާއިމުކުރި މި އެއްބަސްވުންތަކަަކީ، އިންޑިއާއިން ރާއްޖޭގެ ތަރައްޤީއަށް ދެމުންއަންނަ މުހިންމުކަމާއި، އެއްބާރުލުން ވަރަށް ބޮޑަށް ފާހަގަވެގެންދާކަމެއް ކަމަށެވެ. އަދި މިކަމަށްޓަކައި، ދިވެހި ސަރުކާރާއި ރައްޔިތުންގެ ނަމުގައި ރައީސް ވަނީ ބޮޑުވަޒީރު މޯދީއަށާއި، މުޅި އިންޑިއާ ސަރުކާރަށްވެސް ޝުކުރު ޢަދާކުރައްވާފައެވެ.

މީގެ އިތުރުން އިންޑިއާއާއެކު ޤާއިމުކުރި އެއްބަސްވުންތަކުގެ ތެރެއިންވެސް ރާއްޖޭގެ ކަނޑުގެ ސަރަޙައްދުގެ ރައްކާތެރިކަން އިތުރުކުރުމާއި، ސިއްޙީ ނިޒާމު ފުޅާކުރުމަށް އިންޑިއާއިން ދެއްވާ އެހީއާއި، ދަތުރުފަތުރުގެ ނިޒާމުގެ ވިއުގަ ހަރުދަނާކުރުމާއި، އަދި ޚިދުމަތްތަކުގެ ފެންވަރު ރަނގަޅުކުރުމަށް އެކި ދާއިރާތަކުން މީހުން ބިނާކުރުމަށް ދެއްވާ އިސްކަން ވަރަށް ބޮޑަށް ފެނިގެންދިޔަކަމަށް ރައީސް ވިދާޅުވިއެވެ. އިންޑިއާއިންވަނީ އެކިދާއިރާތަކުން މި ފަސްއަހަރު 1000މީހުން ބިނާކުރުމުގެ ފުރުސަތު ދިވެހިރާއްޖެއަށް ދޭނަކަންވެސް އިޢުލާންކޮށްފައެވެ. އަދި މި ވެވުނު އެއްބަސްވުންތަކުގެ ޢަމަލީ މަސައްކަތްތައް ވަރަށް އަވަހަށް ފަށާނެކަމަށްވެސް ރަޢީސް އިބްރާޙިމް މުޙައްމަދު ސޯލިޙް ވިދާޅުވިއެވެ.

އަދި ބަޖެޓް ސަޕޯޓްގެ ގޮތުގައި ދީފައިވާ ފައިސާގެ 800 މިލިއަން ރުފިޔާ، ރައްޔިތުންގެ އަސާސީ ޚިދުމަތުގެ ފެންވަރު ރަނގަޅު ކުރުމުގެ މަޝްރޫޢުތަކަށް ޚަރަދުކުރުމަށް ހަމަޖެހިފައިވާކަމަށް ރައީސް ވިދާޅުވިއެވެ.

"ސާފު ބޯފެން، ނަރުދަމާ، ބަނދަރުހެދުން، މަސްވެރިކަން، އަދި ވިޔަފާރީގެ ދާއިރާ ތަރައްޤީކުރުމަށް މި ފައިސާ ބޭނުންކުރާނީ. މިކަމުގެ ޢަމަލީ މަސައްކަތްތައް ވަރަށް އަވަހަށް ފަށާނަން" ރައީސް ވިދާޅުވިއެވެ.

ރަޢީސް ވިދާޅުވީ މޯދީއާއެކު ކުރިއަށްގެންދިޔަ ބައްދަލުވުމުގައި، ދެޤައުމުގެ ގުޅުން އިތުރަށް ބަދަހިކޮށް، ދެޤައުމު ގުޅިގެން އިތުރަށް ކުރިއަށްގެންދެވޭނެ މަސައްކަތްތަކާއި ގުޅޭގޮތުން މަޝްވަރާ ކުރައްވާފައިވާކަމަށެވެ. އެގޮތުން ޖުމްލަކޮށް އާއްމު ޚިދުމަތުގެ ހުރިހާ ދާއިރާތައް ތަރައްޤީކުރުމާއި ގުޅޭގޮތުން މަޝްވަރާކުރައްވާފައިވާކަން ރައީސް ފާހަގަކުރެއްވިއެވެ.

ރައީސް ވިދާޅުވީ އިންޑިއާއާއިއެކު އޮތް ގާތް ގުޅުން އެގޮތުގައި ދެމެހެއްޓުމަށް އަބަދުވެސް ދެ ޤައުމުން މަސައްކަތް ކުރައްވާނެކަމަށެވެ.