ސިނަމާލެ ބުރިޖުން މާލެއަށް ދުއްވާފައި އައި ކާރެއް ކޮންޓްރޯލް ނުވެގެންގޮސް މެރިން ރިސާރޗް ސެންޓަރުގެ ފާރުގައި ޖެހި ނުރައްކާތެރި އެކްސިޑެންޓެއް ހިނގައިފި އެވެ.
ފުލުހުން ބުނީ ރޭ ދަންވަރު 1:47 އެހާކަންހާއިރު ހިނގި މި އެކްސިޑެންޓްގައި ކާރު ދުއްވަން އިން 34 އަހަރުގެ މީހާއަށް އަނިޔާވެ ސެނަހިޔާ ހޮސްޕިޓަލްގައި ފަރުވާ ދެމުން ގެންދާކަމަށެވެ. އެމީހާއަށް ލިބުނީ ކިހާވަރެއްގެ އަނިޔާތަކެއް ކަމެއް ފުލުހުން ނުބުނެއެވެ.
ޢެކްސިޑެންޓްވި ކާރުގައި ކާރު ދުއްވަން އިން މިހާގެ އިތުރުން އެއްވެސް މީހަކު ނެތްކަމަށާއި ކާރު ދުއްވަން އިނީ ދިވެއްސެއްކަމަށްވެސް ފުލުހުން ބުނެއެވެ. މި ކާރަކީ އެހެން ޒޯނެއްގައި ރަޖިސްޓްރީ ކޮށްފައިވާ ކާރެއްކަމަށްވެސް ފުލުހުން ބުނެއެވެ.
ރޭ ހިނގި މި އެކްސިޑެންޓްގައި ކާރުގެ ކުރީކޮޅު ވަނީ ފުނޑުފުނޑުވެފައެވެ. ކާރު ދުއްވަން އިން މީހާގެ ލައިސަންސް ހިފަހައްޓާފައިވާކަމަށްވެސް ފުލުހުން ބުނެއެވެ.
ކާރެއް ދުއްވަން އިން ޑްރައިވަރަށް ނިދި ޖެހި ނުރައްކާތެރި އެކްސިޑެންޓެއް އިއްޔެވެސް ވަނީ ހިނގާފައެވެ. ހުޅުމާލޭގައި އިއްޔެ ހަވީރު ހިނގި މި އެކްސިޑެންޓްގައި ކާރުގައި ތިބި 3 މީހުންނަށް އަނިޔާވެ ކާރަށް ވަނީ ބޮޑެތި ގެއްލުންތަކެއް ލިބިފައެވެ.
ފުލުހުން ހަފްތާއަކު އެއްފަހަރު އާއްމުކުރާ ތަފާސް ހިސާބުތައް ދައްކާ ގޮތުން މިދިޔަ ހަފްތާގައި އެކަނިވެސް މާލޭ ސަރަހައްދުގައި 64 އެކްސިޑެންޓް ހިނގާ 17 މީހަކަށް ވަނީ އަނިޔާވެފައެވެ.