ޢީދު ބަންދާ ގުޅިގެން މާލެއާއި އެކި ރަށްރަށަށް ދަތުރުކުރާ ފަރާތްތަކުން ސަލާމަތާއި ރައްކާތެރިކަން ކަށަވަރުކުރުމަށްފަހު ނޫނީ ދަތުރު ނުކުރުމަށް ސަލާމަތީ ބާރުތަކުން އިލްތިމާސްކޮށްފިއެވެ.
ފުލުހުން ވަނީ، ޢީދު ޗުއްޓީ ހޭދަކުރުމަށާއި، ތަފާތު ހަރަކާތްތައް ހިންގުމަށް ރަށްރަށަށް ދަތުރުކުރާއިރު، މޫސުމަށް ޚާއްސަ ސަމާލުކަމެއް ދިނުމަށް އިލްތިމާސް ކޮށްފައެވެ. އަދި ރަށްރަށުން މާލެ އައިސް އުޅޭ އުޅުމުގައިވެސް ފައިސާއާއި އަތްދަބަސް ފަދަ ތަކެއްޗަށް ސަމާލުވުމާއި، އީދު ބަންދަށް ތަންތަންނަށް ފުރާއިރު ގެތަކުގެ ރައްކާތެރިކަން ކަށަވަރުކުރުމަށްވެސް ފުލުހުން ވަނީ އިލްތިމާސްކޮށްފައެވެ.
އީދު ބަންދަކީ ގިނަ ބަޔަކު އެކި ތަންތަނަށް ދަތުރުކުރާ ދުވަސްވަރަކަށްވާއިރު، ޢީދު ބަންދުގައި ވައްކަމުގެ މައްސަލަތައްވެސް ގިނަކަން ފުލުހުން ފާހަގަކުރެއެވެ. މިއަދުވެސް އެފަދަ ބައެއް ހާދިސާތައް ހިނގާފައިވާކަމަށް ފުލުހުން ބުނެއެވެ. އެގޮތުން އީދު ނަމާދަށް ދިޔަވަގުތު މާލޭގެ ގެޔަކުން މިއަދު ފަސްދޮޅަސް ހާހަށްވުރެ ގިނަ ރުފިޔާ ވަގަށް ނެގިކަންވެސް ފުލުހުން ވަނީ ހާމަކޮށްފައެވެ.
ފުލުހުން ބުނީ އީދު ބަންދާ ދިމާކޮށް ވައްކަމުގެ މައްސަލަތައް ފުލުހުންނަށް ހުށައަޅާ މިންވަރު އިތުރުކަމަށާ، އެހެންކަމުން ޗުއްޓީއާ ދިމާކޮށް ގެސްޓް ހައުސްތަކާއި އެނޫންވެސް ތަންތަނުގެ ސަލާމަތީ ކަންކަން ވަރުގަދަ ކުރުން މުހިންމުކަމަށެވެ.
މިދުވަސްވަރަކީ މުޅި ރާއްޖެއަށްވެސް މޫސުން ގޯސް ދުވަސްވަރެއްކަމުން ކަނޑުދަތުރު ކުރާ ފަރާތްތަކުންވެސް މޫސުމަށް ޚާއްޞަ ސަމާލުކަމެއް ދިނުމަށްސަލާމަތީ ބާރުތަކުން ވަނީ އިލްތިމާސްކޮށްފައެވެ. އެގޮތުން ރަށްރަށަށް ދަތުރުކުރާއިރު، މޫސުމަށް ޚާއްސަ ސަމާލުކަމެއް ދީގެން ސަލާމަތީގޮތުން ފުރިހަމަކުރަންޖެހޭ ކަންކަން ފުރިހަމަކޮށްގެން ދަތުރުތައް ކުރުމަށްވެސް ވަނީ އިލްތިމާސްކޮށްފައެވެ.
މީގެ އިތުރުން ފުރާ އުޅަނދުތަކަށް އަރާ ޤަވާޢިދާ އެއްގޮތަށްތޯ ބަލައި ފާސްކުރަމުންދާނެކަމަށްވެސް ސަލާމަތީ ބާރުތަކުން ބުނެއެވެ. އެގޮތުން ސިފައިނާއި ފުލުހުން ވަނީ ކަނޑު ދަތުރުކުރާ އުޅަނދުތައް ބަލާ ފާސްކުރުމުގެ ޚާއްޞާ އޮޕަރޭޝަނެއްވެސް ފަށާފައެވެ. ތިން ދުވަހަށް ކުރިއަށް ގެންދާ މި ޕްރޮގްރާމްގައި މާލޭގެ ބަނދަރު ސަރަހައްދުންނާއި ކަނޑުމަތިން އުޅަނދުތައް ބަލާ ފާސްކުރުމަށްވެސް ހަމަޖެހިފައިވެއެވެ.