ސައިކަލުން ޑިއުޓީ ބޮޑު ނުކުރުމަށާއި، އަންނައުނުގެ ބާވަތްތަކުން ޑިއުޓީ ނުނެގުމަށް އެކްސްޕޯޓް އިމްޕޯޓުގެ ޤާނޫނަށް މަޖިލީހުން ގެނައި އިސްލާހާއި އެކު އެޤާނޫނު ރައީސުލް ޖުމްހޫރިއްޔާ ތަސްދީގު ކުރައްވައިފިއެވެ.މިއަދު ރައީސް ތަސްދީގުކުރެއްވި އެކްސްޕޯޓު އިމްޕޯޓުގެ ޤާނޫނުގައިވާގޮތުން، ސައިކަލުން މިހާރު ނަގަމުން އަންނަ ޑިއުޓީ %150 އިންސައްތައިން %100އަށް ކުޑަކޮށް، އަންނައުނުގެ ބާވަތްތަކުން ނަގަމުންއައި ޑިއުޓީ %15އިން %0އަށް ކުޑަކުރެވޭނެއެވެ. އަދި ފަސިންޖަރުން އުފުލުމަށް ޚާއްސަކޮށް ހަދާފައި ހުންނަ އެއްގަމުގައި ދުއްވާ އެއްޗިހީގެ ތެރެއިން ކާރު، ޖީޕް، ވޭން، އޮޓޯ ސައިކަލާއި މޮޓޯ ސައިކަލް ފިޔަވައި އެހެން އުޅަނދުތަކުން %150 ޑިއުޓީއެއްނެގޭނެއެވެ.ސަރުކާރުންވަނީ، މިމަހުގެ އެއްވަނަ ދުވަހުން ފެށިގެން އެތެރެކޮށްފައިވާ ސައިކަލާއި އަންނައުނުގެ ބާވަތްތަކަށް މި ގާނޫނު ފާސްވަންދެން ޑިއުޓީގެ ގޮތުގައި ދައްކާފައިވާ ފައިސާއިން އިތުރުވާ މިންވަރެއް އަނބުރާ އެފަރާތަކަށް ދޭނެކަމަށް ވިދާޅުވެފައެވެ.