ޖަލު އޮޑިޓް ރިޕޯޓްގައިވާ ކަންކަން ތަންފީޒުކުރޭތޯ ބެލުމަށް ހޯމް މިނިސްޓްރީން ކޮމެޓީއެއް އެކުލަވާލައިފިއެވެ.
"ޕްރިޒަންސް ރިފޯމް މޮނިޓަރިންގ ކޮމިޓީ "ގެ ނަމުގައި އުފެއްދި މި ކޮމެޓީގެ ރިޔާސަތަކީ ހޯމް މިނިސްޓަރ ޢިމްރާން ޢަބްދުﷲއެވެ. 5 މެމްބަރުން ހިމެނޭ މި ކޮމެޓީގައި ދެން ހިމެނިވަޑައިގަންނަވަނީ މިނިސްޓަރ އޮފް ސްޓޭޓް ފޯރ ހޯމްއެފެއާޒް ޢަލީ ނަޛީރާއި އިނިސްޕެކްޓަރ އޮފް ކަރެކްޝަނަލް ސާވިސް އަޙްމަދު މުޙައްމަދު ފުޅާއި ސުޕްރިންޓެންޑެންޓް އޮފް ޕްރިޒަންސް މުޙައްމަދު އާޞިފް ގެ އިތުރުން ޗީފް އިނިސްޕެކްޓަރ އޮފް ޕޮލިސް އިޒްމިއާ ޒާހިރެވެ.
މި ކޮމެޓީގެ މަސައްކަތުގެ ތެރޭގައި ދިވެހިރާއްޖޭގެ ޖަލުތަކުގެ އޮޑިޓް ރިޕޯޓް 2019' ރިޕޯޓުގައި ފާހަގަކޮށްފައިވާ ކަންތައްތަކާއި، އިޞްލާޙްކުރުމަށް ހުށަހަޅާފައިވާ ކަންތައްތައް ކުރަމުންދޭތޯ ބެލުމާއި، އިޞްލާޙްތައް ގެނައުމަށްޓަކައި އެހީތެރިކަން ފޯރުކޮށްދީ، ތާވަލުކުރެވޭ ގަވާއިދަކުން އެކަންކަން ހިނގަމުންދޭތޯ ބެލުމެވެ.
ދިވެހިރާއްޖޭގެ ޖަލުތަކުގެ އޯޑިޓެއް ހެދުމަކީ ސަރުކާރުގެ 100 ދުވަހުގެ ލަނޑުދަނޑިތަކުގެ ތެރޭގައި ހިމެނޭ ކަމެކެވެ.
ޖަލު އޮޑޓް ކުރުމަށް އެކުލަވާލި ކޮމިޝަނުން އެ ކޮމިޝަންގެ މަސައްކަތް ނިންމާ ވަނީ 290 ސޮފްހާގެ ރިޕޯޓެއް ނެރެފައެވެ. މި ރިޕޯޓްގައި ޖަލުތަކުގައި އިސްލާހުކުރަންޖެހޭ 180 ވުރެ ގިނަ ކަންކަން ފާހަގަކޮށްފައިވެއެވެ. އަދި އެކަންކަން އިސްލާހުކުރުމަށް ކުރާ މަސައްކަތްތަކަށް އެއްވެސް ފަރާތަކުން ހުރަސް ނޭޅުމަށް ހޯމް މިނިސްޓްރީން ވަނީ ގޮވާލާފައެވެ.