ކުރީގެ ނައިބު ރައީސް އަހުމަދު އަދީބަށް އިއްވާފައިވާ ޖަލު ހުކުމްތައް ބާތިލުކޮށް އަލުން ބަލަން ހައިކޯޓުން އަމުރުކުރި މައްސަލަތައް ނުބަލާ އެ މައްސަލަތައް ޕްރޮސެކިއުޓަރ ޖެނެރަލްގެ އޮފީހަށް ފޮނުވާލުމަށް ކްރިމިނަލް ކޯޓުން ނިންމައިފިއެވެ.
ޕީއެސްއެމަށް އެނގިފައިވާ ގޮތުގައި އެ މައްސަލަތައް ނުބެލުމަށް ނިންމީ ކުރިމިނަލްކޯޓްގެ ފަނޑިޔާރުންގެ މަޖިލީހުންނެވެ.
ދަށުކޯޓުން ނުބަލަން ނިންމާފައިވަނީ ހިޔާނާތުގެ މައްސަލާގައި އަދީބުގެ މައްޗަށް އުފުލި ދައުވާ އާއި ރިޔާސީ ލޯންޗުކޮޅުގައި އެއްޗެއް ގޮއްވާލި މައްސަލާގައި އަދީބުގެ މައްޗަށް ކުރި ޓެރަރިޒަމްގެ ދައުވާގެ މައްސަލައެވެ.
ޅ މާބިންހުރާއިން ދައުލަތަށް ލިބެންޖެހޭ 5 މިލިއަން ޑޮލަރަށް ހިޔާނާތްތެރިވި ކުށް ސާބިތުބެ 8 އަހަރަށް ޖަލަށް ލުމަށް ކުރިމިނަލްކޯޓުން ކުރި ހުކުމް މިދިޔަ ހަފްތާގައި ހައިކޯޓުން ވަނީ ބާތިލުކޮށްފައެވެ. ޢަދި އެ މައްސަލަ ބެލުމަށް ދަށުކޯޓަށް ވަނީ އަމުރުކޮށްފައެވެ.
މާބިންހުރާގެ ހިޔާނާތުގެ މައްސަލާގައި އަދީބުގެ ޖަލު ހުކުމް ހައިކޯޓުން ބާތިލުކުރިއިރު ހަމަ އެ މައްސަލާގައި އަދީބުގެ ގާތް އެކުވެރިންކަމަށްވާ އެމްއެމްޕީއާރުސީގެ ކުރީގެ އެމްޑީ އަބްދުﷲ ޒިޔަތާއި ވިޔަފާރިވެރިޔާ ހާމިދު އިސްމާއީލް އަށް ދަށުކޯޓުން އިއްވި ހުކުމަށް ހައިކޯޓުން ވަނީ މީގެ ކުރިންތާއީދުކޮށްފައެވެ.
ކުރީގެ ރައީސް އަބްދުﷲ ޔާމީން ދަތުރުކުރެއްވި ރިޔާސީލޯންޗްކޮޅުގައި އެއްޗެއް ގޮއްވާލާ ރައީސް ޔާމިން އަވަހާރަކޮށްލަން މަސައްކަތްކުރި މައްސަލާގައި އަދީބުގެ މައްޗަށް އިއްވާފއި އޮތް 15 އަހަރުގެ ޖަލު ހުކުމްވެސް ހައިކޯޓުން ވަނީ ބާތިލުކޮށްފައެވެ.
މި މައްސަލަތައް އަނބުރާ ޕީޖީއަށް ފޮނުވާލަން ކުރިމިނަލްކޯޓުން ނިންމީކީއްވެކަމެއް ސާފެއް ނުވެއެވެ.
އަދީބު ފިސްތޯލައެއް ގެންގުޅުނު މައްސަލާގައި އަދިބަށް އިއްވި 10 އަހަރުގެ ހުކުމްވަނީ ސުޕްރީމްކޯޓުން ބާތިލުކޮށްޢެވެ. ޢެހެންކަމުން އަދީބުގެ މައްޗަށް އިއްވި ހުރިހާ ޖަލު ހުކުމެއް މިހާރުވަނީ ބާތިލުވެފައެވެ