ދައުލަތަށް ޓެކްސް ދައްކަންޖެހި ނުދައްކާ ހުރި ރިސޯޓްތަކަށް ޓެކްސް ދައްކައި ނިންމުމަށް ބާރަ މަސްދުވަހުގެ މުއްދަތެއް ދީފައިވާކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
އެމްއެމްޕީއާރުސީ މައްސަލައިގައި ދޫކުރި ރިސޯޓްތަކާއި ގުޅޭގޮތުން މައުލޫމާތު ދިނުމަށް ޓޫރިޒަމް މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޓޫރިޒަމް މިނިސްޓަރު ވިދާޅުވީ، ޓޫރިސްޓް ރިސޯޓްގެ ގޮތުގައި ތަރައްޤީކުރަން ދީފައިވާ ބައެއް ތަންތަނުން ދައުލަތަށް ދައްކަންޖެހޭ ޓެކްސް ދެއްކުމުގައި އިހްމާލު ވަމުންދާކަމަށެވެ.
މިނިސްޓަރު ވިދާޅުވީ ދައުލަތައް ޓެކްސް ނުދައްކާ ރިސޯޓްތަކާއި ގުޅޭގޮތުން ސަރުކާރުން މިހާރު ނިންމަވާފައިވަނީ، އެފަރާތްތަކަށް އިތުރު އެއް އަހަރުދުވަހުގެ މުއްދަތެއް ދިނުމަށްފަހު ހަމަޖެހިފައިވާ އުސޫލުން އެފަރާތްތަކާއިމެދު ފިޔަވަޅު އެޅުމަށްކަމަށެވެ. ޓޫރިޒަމް މިނިސްޓްރީން ވަނީ، ދައުލަތައް ދައްކަންޖެހޭ ޓެކްސް ދެއްކުމަށް 7 ރިސޯޓަކަށް ނޯޓިސް ފޮނުވާފައެވެ.
ޓެކްސް ދެއްކުމަށް ނޯޓިސް ފޮނުވި ރަށްތައް:
- ޑްރިފްޓް ތެލު ވެލިގާ ރިޓްރީޓް ރިސޯޓް
- ހޮނޑާފުށި އައިލެންޑް
- ކިހާ މޯލްޑިވްސް
- ޕާމްބީޗް
- މެދުފުށި އައިލެންޑް
- ފިލިތެޔޮ އައިލެންޑް
- ވެލިދޫ އައިލެންޑް
ޓެކްސް ނުދައްކައިގެން ޓޫރިޒަމް މިނިސްޓްރީން 7 ރިސޯޓަކަށް ނޯޓިސްދީފައިވާއިރު، މީގެތެރެއިން ބައެއް ތަންތަނުގެ މައްސަލަ ދައުލަތުގެ ޓެކްސް އިދާރާއިން ސިވިލްކޯޓަށް ވައްދައި، ބައެއް މައްސަލަތައް މީރާއާއި އެއްކޮޅަށް ވަނީ ނިމިފައެވެ.
މީގެ ތެރެއިން އެންމެ ފާހަގަކޮށްލެވެނީ، ތްރީއޭ އެންޑް ޓްރޭޑިންގ ކުންފުނިން ހިންގާ ފިލިތެޔޮ އައިލެންޑް ރިސޯޓާއި، މެދުފުށި އިންވެސްޓްމަންޓް ޕްރައިވެޓް ލިމިޓެޑުން ހިންގާ މެދުފުށި އައިލެންޑް ރިސޯޓްގެ މައްސަލައެވެ.
ފިލިތެޔޮ ރިސޯޓް
ޓެކްސް އިދާރާގެ ތަފާސްހިސާބުތަކަށް ބަލާއިރު، ދައުލަތައް ޓެކްސް ނުދައްކާ ރިސޯޓް ހިންގާ ކުންފުނިތަކުގެ ތެރެއިން އެންމެގިނަ އަދަދަކަށް ފައިސާ ދައްކަންޖެހޭ އެއް ކުންފުންޏަކީ، ތްރީއޭ އެންޑް ޓްރޭޑިންގ ކުންފުންޏެވެ.
މީރާއިން ވަނީ މީގެކުރިން ފިލިތެޔޮ އައިލެންޑްގެ ރެންޓް އަދި ލީސް ރެންޓްގެ ގޮތުގައި 8.5 މިލިއަން ޑޮލަރު ނުދައްކައިގެން 2013 ވަނަ އަހަރު އެކުންފުނީގެ މައްސަލައެއް ފައިލްކޮށްފައެވެ.
ނަމަވެސް މި މައްސަލަ ފަހުން ވަނީ ކޯޓުން ބޭރުގައި ހައްލުކޮށްފައެވެ. އެއަށްފަހު މީރާއިން ތްރީއޭ އެންޑް ޓްރޭޑިންގގެ މައްސަލައެއް ސިވިލްކޯޓަށް ވައްދާފައިވަނީ މިދިޔަ އަހަރުގެ ޖޫންމަހުއެވެ. އެފަހަރު މީރާއިން އެކުންފުނީގެ މައްސަލަ ކޯޓަށް ވައްދާފައިވަނީ ލީސް ރެންޓާއި، އެ ނުދެއްކުމުން އަރާފައިވާ ޖޫރިމަނާ ނުދައްކައިގެންނެވެ.
މައުލޫމާތު ލިބިފައިވާގޮތުގައި ތްރީއޭއިން ހިންގާ ފިލިތެޔޮ ރިސޯޓުން މިހާރުވެސް ދައުލަތައް ބީޕީޓީ، ޖީއެސްޓީ، ޓީޖީއެސްޓީ އަދި ގްރީން ޓެކްސްގެ ގޮތުގައި 3 މިލިއަނަށްވުރެ ގިނަ ޑޮލަރު ދައްކަން ޖެހެއެވެ. މިއީ ދިވެހި ފައިސާއިން ބަލާނަމަ 47 މިލިއަނަށްވުރެ ގިނަ ރުފިޔާއެވެ.
މެދުފުށި އައިލެންޑް
މެދުފުށި އައިލެންޑް ރިސޯޓާއި ދެކޮޅަށް މީރާއިން ސިވިލްކޯޓަށް ވެއްދި މައްސަލައިގައި ކޯޓުން ވަނީ 2017 ވަނަ އަހަރުގެ ޑިސެމްބަރުމަހު އެ ރިސޯޓް ހިންގާ ކުންފުނީގެ މައްޗަށް ދެ މިލިއަނަށްވުރެ ގިނަ ޑޮލަރު ދައުލަތައް ދެއްކުމަށް ހުކުމްކޮށްފައެވެ. މިއީ ދިވެހި ފައިސާއިން ބަލާނަމަ 42 މިލިއަނަށްވުރެ ގިނަ ރުފިޔާއެވެ.
ނޯޓިސްގެ މުއްދަތު ހަމަވުމަށްފަހު؟
ޓެކްސް ނުދައްކައިގެން ނޯޓިސް ދިން ރިސޯޓްތަކާއި ބެހޭގޮތުން ޓޫރިޒަމް މިނިސްޓަރު އަލީ ވަހީދު ވިދާޅުވީ، ކަނޑައެޅިފައިވާ މުއްދަތުގައި ޓެކްސް ނުދައްކައިފިނަމަ، އެފަދަ ރިސޯޓްތަކުގެ މައްސަލަތައް ކަމާއިބެހޭ އިދާރާތަކުން ބައްލަވަމުންގެންދާނޭކަމަށެވެ. ޓެކްސް އަކީ ރައްޔިތުންގެ ފައިސާކަމުން މިކަމުގައި އިތުރަށް ސަރުކާރަށް ކޮށްދެވޭނޭކަމެއް ނޯންނާނޭކަމަށްވެސް މިނިސްޓަރު ވަނީ ފާހަގަކުރައްވާފައެވެ.