ރަށްރަށުގެ ބޯޓުތަކުން ގިނަ އަދަދަކަށް މާލެއަށް ކުރުނބާ ގެނެސްފިއެވެ.
ޕީއެސްއެމްނިއުސްއަށް މައުލޫމާތު ލިބިފައިވާ ގޮތުގައި މާލެއަށް އެންމެ ގިނައިން ކުރުނބާ ގެނެސްފައިވަނީ، ފުވައްމުލަކާއި ލ އަތޮޅުގެ ރަށްތަކުންނެވެ. މި ރަށްތަކުން މާލެ ގެނައި ކުރުނބާތައް މިރޭ އިރާކޮޅުގެ ވަގުތެއްގައި ބޯޓުތަކުން ބޭލުމަށްފަހު ވަނީ ދަތުރުވެރިންގެ މާރުކޭޓުގެ ގޮޅިތަކަށާއި، ގާޑިއާތަކަށް ގެންގޮސްފައެވެ. އޮޑިފަހަރުތަކުން ކުރުނބާ ހިފައިގެން އައި މީހުން ބުނާގޮތުގައި މިރޭ އެކަނިވެސް މާލެއަށް ތިންހާހެއްހާ ކުރުނބާ ވަނީ ބާލާފައެވެ.
ކުރުނބާ ހިފައިގެން ބޯޓުތައް މާލެ އައިސްފައިމިވަނީ، ދަތުރުވެރިންގެ މާރުކޭޓުގައި ކުރުނބާގެ އަގު ވަރަށްބޮޑަށް މައްޗަށްގޮސްފައިވާ ވަގުތެއްގައެވެ. ދަތުރުވެރިންގެ މާރުކޭޓް މިރޭ ބަންދުކުރުމުގެ ކުރިން އެންމެ ކުޑަކޮށްވެސް ކުރުނބައެއް ލިބެންހުރީ ފަންސަވީސް ރުފިޔާއަށެވެ.
މީގެ ދެދުވަސްކުރިން ދަތުރުވެރިންގެ މާރުކޭޓުގައި ހަތްދިހަ ފަސްރުފިޔާއަށްވެސް ވަނީ ކުރުނބާ ވިއްކާފައެވެ. ގޮޅިތަކުގައި ކުރުނބާ ވިއްކާ މީހުން އޭރު ބުނެފައިވަނީ، ކުރުނބާގެ އަގު ބޮޑުވަނީ ލިބޭ އަދަދު މަދުވުމުންނާއި، ގޮޅިތަކަށް ކުރުނބާ ގަންނަން ލިބޭ އަގުވެސް ބޮޑުވުމުންކަމަށެވެ.
ރަމަޟާންމަހު ދަތުރުވެރިންގެ މާރުކޭޓުގައި އެންމެ ރަނގަޅަށް ވިކޭ ތަކެތީގެ ތެރޭގައި ކުރުނބާ ހިމެނެއެވެ. ކުރުނބާ ފަންޏަކީ ރޯދަމަސް ނޫނަސް، އާއްމު މަސްމަހުވެސް ދިވެހިން ގެ އެއްނަމްބަރު ފަންޏެވެ.