ހެޕީމާކެޓު ގޯދިއްޔާ ފުޓުސަލް ކަޕްގައި އެފްސީ ސްކޫޕް ކަންމަތިވެސް ބަލިކޮށް އެފްސީ ޒެފިޔާ ގްރޫޕްގެ އެއްވަނަ ހޯދާ މުބާރާތުގެ ދެވަނަ ބުރަށް ދަތުރުކޮށްފިއެވެ.
މި މެޗަށް ނުކުތްއިރުވެސް މި ދެ ޓީމް ކުރިން ކުޅުނު ދެމެޗުންވެސް މޮޅުވެ ކުއާޓަރ ފައިނަލަށް ދަތުރު ކޮށްފައިވުމުން ގްރޫޕްގެ އެއްވަނަ ޒެފިޔާ ހޯދީ ސްކޫޕް ކަންމަތި ތިނެއް ދޭކުން ބަލިކޮށްގެންނެވެ.
ވާދަވެރި ކުޅުމެއް ފެނިގެން ދިޔަ މިމެޗްގައި ފުރަތަމަ ހާފުގައި ލަނޑު ޖަހައި ލީޑު ނެގީ އެފްސީ ސްކޫޕް ކަންމަތިއެވެ. މެޗުގެ ފުރަތަމަ ހާފުގެ ކުޅުން ނިމުނީ އެކެއް ސުމަކުން ސްކޫޕް ކަންމަތި ކުރީގައި އޮވެގެންނެވެ. ދެވަނަ ހާފު ފަށައިގެން ގިނައިރެއް ނުވަނީސް އިތުރު ލަނޑެއް ޖަހައި އެޓީމް ވަނީ ލީޑު ފުޅާކޮށްފައެވެ. ސްކޫޕްކަންމަތިން ދެވަނަ ލަނޑު ޖެހިތާ ގިނައިރެއް ނުވެ ޒެފިއާ ވަނީ ލަނޑެއް ޖަހައި ފަރަގު ކުޑަކޮށްފައެވެ. އަދި އޭގެފަހުން ގިނަ އިރުތަކެއް ނުވަނީސް ޒެފިޔާ ވަނީ އިތުރު ދެ ލަނޑު ޖަހާ މެޗް ކާމިޔާބުކޮށްފައެވެ.
މިމެޗުގެ މޮޅުކުޅުންތެރިއާއަށް ހޮވުނީ ޒެފިއާގެ ކޯޗު އަދި ކުޅުންތެރިޔާ، ޖާޒީ ނަމްބަރ 8 ޝަމްވީލް ޤާސިމް (ބޮންޑާ) އެވެ. އޭނާ ވަނީ މިމެޗުގައި 2 ލަނޑު ޖަހައިފައެވެ. ޒެފިއާގެ އަނެއް ލަނޑު ޖެހީ އެޓީމުގެ ޖާޒީ ނަމްބަރ 10 ޙަސަން އިރުފާނެވެ.
މި މުބާރާތުގައި މިރޭ ކުޅެވިގެން ދާނީ ގްރޫޕް ސްޓޭޖްގެ ފަހު ދެމެޗެވެ. ފުރަތަމަ މެޗްގައި ބައްދަލުކުރާނީ ގްރޫޕް ބީގެ އެފްސީ އަފިރިންނާއި ޔަންގް ވަންސްއެވެ. ދެވަނަ މެޗްގައި ބައްދަލުކުރާނީ ގްރޫޕް ޑީގެ މަލްޓި ޖީނިއަސް ސިޓީއާއި އެސްއެމްޓީ އެވެ.