ކުރިއަށް އޮތް ދުވަސްތަކުގައި ކަރާގެ އަގު އުފުލުން އެކަށީގެންވާ ކަމަށް ދަތުރުވެރިންގެ މާރުކޭޓުގައި ތަކެތި ވިއްކާ ފަރާތްތަކުން ހާމަކޮށްފިއެވެ.
ރަމަޟާންމަހުގެ ފުރަތަމަ ދެ ހަފްތާއަށް ބަލާއިރު، ލޯކަލް މާރުކޭޓުގެ ގޮޅިތަކުގައި ވިއްކަމުން އައި ކަރާގެ އަގުތައް ވަނީ ދަސަށްގޮސްފައެވެ. އެގޮތުން މިދިޔަ ހަފްތާ ތެރޭ ބާޒާރުގައި ކަރާ ކިލޯއެއް 18 ރުފިޔާއަށްވެސް ލިބެން ހުއްޓެވެ. އެހެން ނަމަވެސް މިއަދު ބާޒާރުގައި ކަރާ ކިލޯއެއް ލިބެން ހުރީ 20 ރުފިޔާއާއި 25 ރުފިޔާއާއި ދެމެދުގެ އަގުތަކެއްގައެވެ.
ދަތުރުވެރިންގެ މާރުކޭޓުގައި ތަކެތި ވިއްކާ ފަރާތްތަކުން ބުނާގޮތުގައި ކުރިއަށް އޮތް ދުވަސްތަކުގައި ކަރާގެ އަގު އުފުލުން ގާތެވެ. މިގޮތުން މިހާރުވެސް ދުވަހަކަށް ވުރެ ދުވަހެއް ކަރާ ކިލޯއެއްގެ އަގަށް އެއްރުފިޔާ ނުވަތަ ދެ ރުފިޔާ އިތުރުވަމުންދާކަމަށް ދަތުރުވެރިްނގެ މާރުކޭޓުގެ ގޮޅިތަކުގައި ތަކެތި ވިއްކާ މީހުން ބުނެއެވެ.
ދަތުރުވެރިްނގެ މާރުކޭޓަށް އެންމެ ގިނަ އަދަދަކަށް ކަރާ ގެންނަނީ ތޮއްޑޫއިންނެވެ. އަވައްޓެރި އިންޑިއާއިންވެސް ކޮންމެވެސް ވަރަކަށް ބާޒާރަށް ކަރާ ގެނެއެވެ. ތަކެތި ވިއްކާ ބައެއް ފަރާތްތަކުން ބުނީ ކަރާގެ އަގު އުފުލެމުންދަނީ އިންޑިއާ ކަރާ ބާޒާރުން ހުސްވެފައިވާތީ ކަމަށެވެ.
ދަތުރުވެރިންގެ މާރުކޭޓަށް ބަލާއިރު، ފަނި ގިރުމަށް ބޭނުންކުރާ ބާވަތްތަކުގެ ތެރެއިން އަގަށް ބަދަލެއް ނައިސް އެއް ހަމައެއްގައި ހިފެހެއްޓިފައި ހުރި އެކައްޗަކީ ފެޝަން ފުރުޓެވެ. އެގޮތުން މިއަދުވެސް ބާޒާރުގައި ފެޝަން ފުރުޓް ކިލޯއެއްގެ އަގު ހުރީ 75 ރުފިޔާއަށް އަދި 80 ރުފިޔާއަށެވެ.
ފަނިގިރުމަށް ބޭނުންކުރާ ބާވަތްތަކުގެ ތެރެއިން ދެން އެންމެ ފާހަގަކޮށްލެވެނީ ކުރުނބާއެވެ. ރަމަޟާންމަސް ފެށިގެން އައިއިރު، ދަތުރުވެރިންގެ މާރުކޭޓުގައި ކުރުނބާގެ އަގު ހިފެހެއްޓިފައި ހުރުމަށްފަހު މިހާރު ކުރުނބާގެ އަގު ވަނީ އުފުލެން ފަށާފައެވެ.
ކުރުނބާ ވިއްކާ މީހުން ބުނާގޮތުގައި ކުރުނބަލަށް އޮންނަ ޑިމާންޑް ދުވަހެއް ދުވަހަކަށް އިތުރުވަމުން އަންނައިރު، މިހާރު އެންމެބޮޑު ކަންބޮޑުވުމަކީ ޑިމާންޑާއި އެއްވަރަށް ކުރުނބާ ލިބުމުގައި އޮތް ދަތިކަމެވެ.