ހުޅުމާލޭގައި ޓެކްސީއަކަށް ބަނގުރާ އަރުވަނިކޮށް ފުލުހުން ހިފެހެއްޓުމުން އެ ޓެކްސީގެ ޑްރައިވަރު ފިލައިފިއެވެ.
ފުލުހުން ބުނީ ރޭ ދަންވަރު 03:25 ކަންހާއިރު ހުޅުމާލޭ ފަޅުގައި އޮތް ޑިންގީއަކުން އެއްޗެހިތަކެއް ބާލައިގެން ޓެކްސީއަކަށް އަރުވަނިކޮށް އެ ޓެކްސީ ހުއްޓުވާ ބަލާ ފާސްކުރި އިރު 60 ފުޅި ބަނގުރާ ފެނިފައިވާކަމަށެވެ. އަދި އެވަގުތު ކާރުގައި ދެ މީހުން ތިބި ކަމަށާއި އޭގެ ތެރޭގައި ހިމެނެނީ ކާރު ދުއްވަން އިން ދިވެހި ޑްރައިވަރާއި ބިދޭސީއެއްކަމަށެވެ.
މި މައްސަލާގައި ކާރުގައި އިން އުމުރުން 39 އަހަރު ބިދޭސީ މީހާ ވަނީ ހައްޔަރުކޮށްފައެވެ. އަދި ކާރު ދުއްވަން އިން ޑްރައިވަރު ފިލާފައިވާކަމަށް ފުލުހުން ބުނެއެވެ. މި މައްސަލަ ހުޅުމާލެ ޕޮލިސް ސްޓޭޝަނުން ދަނީ ތަޙުޤީޤު ކުރަމުންނެވެ.
ދާދީ ފަހުން ފުލުހުން ހިނގި އޮޕަރޭޝަނެއްގައި ގއ ފަޅު ރަށެއްގައި ވަޅުލާފައި ހުރި 150 ކިލޯގެ މަސްތުވާތަކެތި އަތުލައިގަނެ އެ މައްސަލާގައި 5 މީހަކު ވަނީ ހައްޔަުކޮށްފައެވެ. އަދި ރާއްޖެއަށް މަސްތުވާތަކެތި އެތެރެކުރަން އުޅުނު އިރާނުގެ ބޯޓެއްވެސް ވަނީ ފުލުހުން އަތުލައިގެންފައެވެ. މި ބޯޓުންވެސް 50 ކިލީގެ މަސްތުވާތަކެތި ފެނިފައިވާކަމަށް ފުލުހުން ވަނީ ބުނެފައެވެ.