މާލޭގައި އިއްޔެ ހަވީރި ދެ ސައިކަލެއް ޖެހި ހިނގި އެކްސިޑެންޓްގައި ޒަހްމަވި ޒުވާނާގެ ހާލު ރަނގަޅުކަމަށް އައިޖީއެމްއެޗުން ބުނެފިއެވެ.
އިއްޔެ ހަވީރު ދަރުބާރުގޭގެ ކައިރިން ހިނގި މި އެކްސިޑެންޓްގައި ޒަހަމްވެފައިވަނީ އުމުރުން 22 އަހަރުގެ މުހައްމަދު އައްފާންއެވެ.
ކުޑަކުއްޖަކު ގޮވައިގެން ސައިކަލް ދުއްވާލަން ނުކުމެ އުޅެނިކޮށް ހިނިގި މި އެކްސިޑެންޓަގައި ސައިކަލް ދުއްވަން އިން ޒުވާނާއަށް އަނިޔާވި ނަމަވެސް ސައިކަލް ފަހަތުގައި އިން ކުއްޖާއަށް އަނިޔާއެއް ލިބިފައެއް ނުވެއެވެ.
އައިޖީއެމްއެޗުން ބުނީ އެކްސިޑެންޓް ވި ޒުވާނާގެ ހާލު ސީރިއަސް ނޫންކަމަށެވެ. އެހެންނަމަވެސް ނޭފަތުގެ ކަށިގަނޑު ބިންދައިގެން ގޮސްފައިވާކަމަށާއި އެޑްމިޓްކޮށްގެން ފަރުވާ ދެމުން އަންނަކަމަށްވެސް އައިޖީއެމްއެޗުން ބުނެއެވެ.
އިއްޔެ ހަވީރު 16:30 ކަންހާއިރު އަމިނީމަގު ދަރުބާރުގެ ކައިރީގައި މި އެކްސިޑެންޓް ހިނގާފައިވަނީ ދެ ސައިކަލެއް ޖެހިގެންނެވެ. މި އެކްސިޑެންޓްގައި އަނެއް ސައިކަލް ދުއްވަން އިން 23 އަހަރުގެ ޒުވާނާއަށް އެއްވެސް އަނިޔާއެއް ލިބިފައެއް ނުވެއެވެ.
މި ރޯދަމަ މަހުގެ ފުރަތަމަ ދުވަހު ހިނގި ފަހުން ނުރައްކާތެރި އެކްސިޑެންޓެއްގައި ބަހެއް ދަށުވެ ފަތުރުވެރިޔަކު ވަނީ މަރުވެފައެވެ.
ފަހަކަށް އައިސް އެކްސިޑެންޓްގެ އަދަދު ވަނީ އިތުރުވެފައެވެ. މިިދިޔަ ހަފްތާގައި އެކަނިވެސް މާލޭ ސަރަހައްދުގައި 56 އެކްސިޑެންޓް ހިނގާފައިވާކަމަށް ފުލުހުން ތަފާސް ހިސާބުތަކުން ދައްކައެވެ. އަދި މި އެކްސިޑެންޓްތަކުގައި 11 މީހުންނަށް އެކިވަރުގެ އަނިޔާތައް ލިބިފައިވާކަމަށް ފުލުހުން ބުނެއެވެ.