ފަޔަށް ލިބުނު އަނިޔާއަކާއި ގުޅިގެން ޤައުމީ ޓޭބަލް ޓެނިސް ޓީމުގެ އައިޝަތު ރަފާ ނާޒިމް މަހެއްހާ ދުވަހަށް ކުޅުމާ ދުރުގައި ހުންނަން ޖެހިއްޖެއެވެ.
ކުރިއަށް އޮތް އިންޑިއަން އޯޝަން އައިލެންޑް ގޭމްސްއަށް ތައްޔާރުވަމުންދާ ރާއްޖޭގެ ޓޭބަލް ޓެނިސް ޓީމާއެކު ފަރިތަކުރަމުންދާ ރަފާ އަކީ 2017ވަނަ އަހަރާއި 2018ވަނަ އަހަރުގެ ޤައުމީ ޓޭބަލް ޓެނިސް މުބާރާތުގެ އަންހެން ސިންގަލްސް ޗެމްޕިއަން ކުޅުންތެރިޔާއެވެ.
އަދި މިއަހަރުގެ ފައިނަލްގައިވެސް ރަފާ ވަނީ ވާދަކޮށްފައެވެ.
ފަނަރަ އަހަރުގެ ރަފާއަކީ ޤައުމީ ޓޭބަލް ޓެނިސް ޓީމުގެ މުހިއްމު ކުޅުންތެރިއެކެވެ. އަދި މިފަހަރުގެ އިންޑިއަން އޯޝަން އައިލެންޑް ގޭމްސްގައި ދައްވެގެން ރިހި މެޑަލް ހޯދުމުގެ އަޒުމުގައި ތަމްރީން ހަދަމުންދާ ދިވެހި ޤައުމީ ސްކޮޑުގެވެސް އެންމެ އިތުބާރު އެއް ކުޅުންތެރިއާއެވެ.
ރަފާއަށް އެނބުރި ފަރިތަކުރުންތަކަށް ނިކުމެވޭނީ މިއަންނަ ޖޫން މަހުގެ ތެރޭގައެވެ.
ރާއްޖޭގެ ޤައުމީ ޓޭބަލް ޓެނިސް ޓީމް މިހާރު ތަމްރީން ހަދަމުންދަނީ އިންޑިއާގެ ޕެނިކަލް އެކަޑަމީގެ ކޯޗަކާއެކުއެވެ. ދުވާލަކު ދެއިރު ޕްރެކްޓިސްތައް ކުރިއަށްގެންދާއިރު ގާތްގަނޑަކަށް ޖުމްލަ ހަ ގަޑިއިރު ހުރިހާ ކުޅުންތެރިންވެސް ދަނީ ޕްރެކްޓިސް ކުރަމުންނެވެ.