ރޯދަ މަހަކީ އާންމުގޮތެއްގައި ފަތުގެ ބާވަތްތަކަށް އޮންނަ ޑިމާންޑް އިތުރުވާ މަހެކެވެ. ކޮންމެ އަހަރެއްގެ ރަމަޟާންމަހު ފަތްޕިލާވެލީގެ އަގުތައް ބާޒާރުގައި އުފުލޭކަން ފާހަގަކުރެވެއެވެ. އެހެންނަމަވެސް މިއަހަރުގެ ރޯދަމަސް މިހާހިސާބަށް އައިއިރު ބާޒާރުގައި ފަތުގެ ބާވަތްތަކުގެ އަގުތައް ވަނީ ރަމަޟާންމަސް ފެށުނުއިރާ އަޅާބަލާއިރު ދަށަށް ގޮސްފައެވެ.
ދަތުރުވެރިންގެ މާރުކޭޓުގައި މިއަދު ފަތުގެ ބާވަތްތައް ތިޔާގިކަން ފާހަގަކޮށްލެވެއެވެ.
އެގޮތުން ދިވެހިން އެންމެ ގިނައިން ބޭނުންކުރާ ފަތުގެ ބާވަތްތައް ކަމަށްވާ ކޮޕީފަތް، ލެޓިއުސް އަދި ކުއްޅަފިލާފަތް ބާޒާރުގައި ވަރަށް ތިޔާއްގެވެ. މިއަދު ބާޒާރުގައި ކޮޕީފަތް ލިބެންހުރީ 3 ފަތުގެ ބޮނޑިއެއް 10 ރުފިޔާއަށް އަދި 5 ފަތުގެ ފަތް ބޮނޑިއެއް 15 ރުފިޔާއަށެވެ.
ދަތުރުވެރިންގެ މާރުކޭޓުގައި ތަކެތި ވިއްކާ ފަރާތްތަކުން ހާމަކުރާ ގޮތުގައި ކާށިދޫއިން ކޮންމެ ދުވަހަކު ގިނަ އަދަދަކަށް ކޮޕީފަތް ގެނެއެވެ. އެހެންކަމުން މި ރޯދަމަހު ބާޒާރުން ހުސްނުވެ ކޮޕީފަތް ލިބެން ހުންނާނޭކަމަށް ތަކެތި ވިއްކާ ފަރާތްތަކުން ބުނެއެވެ. ކުރިއަށްއޮތް ދުވަސްތަކުގައި ކޮޕީފަތުގެ އަގު އިތުރަށް ދަށަށްދިޔުން އެކަށީގެންވާކަމަށްވެސް ތަކެތި ވިއްކާ ފަރާތްތަކުން ބުނެއެވެ.
ރޯދަމަސް ފެށުނުއިރު ލެޓިއުސް ކިލޯއެއްގެ އަގު ހުރީ 180 ރުފިޔާއަށެވެ. ކުއްޅަފިލާފަތް ބޮނޑިއެއްގެ އަގު މިއަދު ހުރީ 10 ރުފިޔާއަށެވެ.
ދިވެހިން ރޯދަމަހު އާންމުގޮތެއްގައި ބޭނުންކުރާ އެހެން ބާވަތްތަކަށް ބަލާލާއިރު އާންމުގޮތެއްގައި ހުރިހާ ބާވަތެއްގެ އަގުތައް ވަނީ ދަށަށް ގޮސްފައެވެ. ކަރާ އަދި ކަނޑޫދޫ މިރުހުގެ އަގުވެސް ވަނީ ދަށްވެފައެވެ. ކަނޑޫދޫ މިރުސް މިއަދު ބާޒާރުގައި ލިބެންހުރީ 100 ގުރާމް 60 ރުފިޔާއާއި 45 ރުފިޔާއާއި ދެމެދުގެ އަގެއްގައެވެ. ރޯދަމަސް ފެށުނުއިރު ބާޒާރުގައި ކަނޑޫދޫ މިރުހުގެ 100 ގުރާމް ލިބެންހުރީ 90 ރުފިޔާއާއި 120 ރުފިޔާއާއި ދެމެދުގެ އަގެއްގައެވެ. ބާޒާރުގައި ކަނޑޫދޫ މިރުސް މިއަދު އެހައި ތިޔާގި ނޫންކަންވެސް ފާހަގަކުރެވެއެވެ.