މިދިޔަ ސީޒަންގައި ރޯމާ އަތުން ބަލިވެ ކެޓި ގޮތް ހަނދާން އެބަހުރިކަމަށާއި، ލިވަޕޫލާއި މެދު ސަމާލުވާނެކަމަށް ކޯޗު އާނެސްޓޯ ވަލްވާޑޭ ބުނެފިއެވެ. ޔުއެފާ ޗެމްޕިއަންސް ލީގުގެ ދެވަނަ ލެގުގައި ލިވަޕޫލާއި ބާސެލޯނާ މިރޭ ވާދަކުރާނެއެވެ. މި މެޗަށް ނިކުންނައިރު ކޯޗު ވަލްވޭޑޭވަނީ ކުޅުންތެރިން ސަމާލުވުމަށް ގޮވާލާފައިއެވެ. ސަބަބަކީ ތިން ގޯލްގެ ލީޑެއްގައި އޮވެ ދެވަނަ ލެގުން ބަލިވެ އެޓީމް މިދިޔަ ސީޒަންގައި ޗެމްޕިއަންސް ލީގުން ކެޓުމެވެ. ކޯޗު ވަލްވާޑޭ ބުނީ ރޯމާއިން ބާސެލޯނާ ކަޓުވާލި ގޮތަށް ލިވަޕޫލަށްވެސް އެކަން ކުރެވިދާނެކަމަށާއި، އެޓީމްގައި އެ ފެންވަރު އެބަހުރިކަމަށެވެ. ލިވަޕޫލްގެ ދަނޑުގައި މިރޭ ކުޅޭ މެޗުގައި ބާސާގެ ފޯވާޑް ލުއިސް ސުއަރޭޒަށް ސަޕޯޓަރުންގެ ފަރާތުން ޚޫނު މަރުޚަބާއެއް ނުކިޔާނެކަމަށް އެޓީމްގެ ކުރީގެ ކުޅުންތެރިންދަނީ ބުނަމުންނެވެ. ވަލްވާޑޭ ބުނީ ސުއަރޭޒްއަކީ ޕްރޮފެޝަނަލް ކުޅުންތެރިއެއް ކަމަށާއި، މީހުންގެ ފާޑުކިޔުންތަކަށް ރައްދުދޭން އޭނާއަށް އިނގޭނެކަމަށެވެ. މިރޭގެ މެޗުގައި ލަނޑެއް ޖެހިއްޖެ ނަމަ އުފާފާޅު ނުކުރާނެކަމަށް ސުއަރޭޒްވަނީ ބުނެފައިއެވެ. ބާސާގެ ދަނޑުގައި ކުޅުނު މެޗުގައި ގޯލް ޖެހުމަށްފަހު ސުއަރޭޒް އުފާފާޅުކުރުމުން ލިވަޕޫލްގެ ކުރީގެ ކުޅުންތެރިންނާއި ސަޕޯޓަރުން އަންނަނީ އޭނާއަށް ފާޑުކިޔަމުންނެވެ.