ކެޕްޓަން ވިންސެންޓް ކޮމްޕާނީގެ ގޯލުން މޮޅުވެ މެންޗެސްޓަރ ސިޓީން ލީގު ދިފާޢުކުރުމާއި ފިޔަވަޅަކަށް ގާތަށް ޖެހިލައިފިއެވެ. މި ސީޒަންގައި ކޮމްޕެނީ ޖެހި ފުރަތަމަ ގޯލުން މޮޅުވެ ސިޓީ އަމިއްލަ ބާރު ހޯދީ ލީގުގެ 1ވަނައިގައި 1 ޕޮއިންޓްގެ ލީޑު ދަމަހައްޓައިގެންނެވެ. އެކެއް ސުމަކުން ލެސްޓަރ އަތުން މޮޅުވީ ކޮމްޕެނީ 25 ޔާޑު ދުރުން ޖެހި ހިތްގައިމު ގޯލުންނެވެ. އިނގިރޭސި ޕްރިމިއަރ ލީގުގައި ބާކީ އެއް މެޗު އޮތްއިރު އެއްވަނައިގައި އޮތް ސީޓީއަށް ލީގު ކާމިޔާބުކުރުމުގެ އަމިއްލަ ބާރު އެބައޮތެވެ.
ލީގުގެ 2ވަނައިގައި އޮތް ލިވަޕޫލަށް އޮތް ފުރުސަތަކީ ފަހު މެޗުގައި ސިޓީއަށް ބްރައިޓަން އަތުން މޮޅު ނުވެވި އެޓީމް ވުލްވްސް އަތުން މޮޅުވުމެވެ. ލިވަޕޫލް އެއްވަރުވެ ނުވަތަ މެޗުން ބަލިވެއްޖެނަމަ ޗެމްޕިއަންކަން ލިބޭނީ މެންޗެސްޓަރ ސިޓީއަށެވެ. ސިޓީ ބްރައިޓަން އަތުން މޮޅުވެއްޖެނަމަ ސިޓީއަށް ތަށި ދިފާއުކުރެވޭނެއެވެ. މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނީ 7 ޕޮއިންޓް ފަހަތުގައި އޮތްއިރުވެސް އުއްމީދު ގެއްލުވާ ނުލާކަމަށާއި، އެންމެ ފަހު ވަގުތު މިހާރު ތަށި ދިފާއުކުރުން މިއޮތީ އަމިއްލަ އަތްމަތީގައިކަމަށެވެ. ފަހު މެޗުގައި ވާންވީގޮތް ސާފުކޮށް މިހާރު އެނގިއްޖެކަމަށާއި، ލިވަޕޫލްގެ ނަތީޖާއަށް ނުބަލައި ބްރައިޓަން ބަލިކޮށް ތަށި ދިފާއުކުރެވޭނެކަމުގެ އިތުބާރު އެބައޮތްކަމަށެވެ. ލެސްޓަރ ކޮޅަށް ގޯލް ޖެހި ކޮމްޕަނީއަށް ތައުރީފްކުރަމުން ގާޑިއޯލާ ބުނީ ޓީމަށް ކެޕްޓަނެއްގެ ބޭނުން ޖެހުނު އެންމެ މުހިންމު ދަނޑިވަޅުގައި ކޮމްޕާނީ އެ ދެއްކީ ނަމޫނާއެއްކަމަށާއި، މިއީ ސިޓީގެ ތާރީޚުގައިވެސް ފާހަގަކޮށްލެވޭނެ ދުވަހެއްކަމަށެވެ.