މާލެ ސްޕޯޓްސްއިން އަޒިޔާން އާއި ޝިއުޒްގެ ކާމިޔާބީގެ އަގުވަޒަންކޮށްފިއެވެ.
ރަމަޟާން ކްރިކެޓް ކާނިވަލްގެ ގުރުނެގުމަށް ބޭއްވި ޚާއްސަ ހަފްލާގައި މަލެ ސްޕޯޓްސްއިން ވަނީ އަޒިޔާން އާއި ޝިއުޒް މިއަހަރުގެ ތެރޭގައި ހޯދާފައިވާ ކާމިޔާބީގެ އަގުވަޒަންކޮށް، ރާއްޖޭގެ ރައީސުލް ޖުމްހޫރިއްޔާ، އިބްރަހިމް މުޙައްމަދު ޞާލިޙުގެ އަތްޕުޅުން ރަމްޒީ ފިލައެއް އަރުވާފައިއެވެ.
އަޒިޔާންގެ އަގުވަޒަން ކޮށްފައިވަނީ ނިމިދިޔަ އޭޝިއަން ކްރިކެޓް ކައުންސިލްގެ ނަވާރަ އަހަރުން ދަށުގެ ވެސްޓާން ރީޖަން މުބާރާތުގައި އޭނާ ހޯދާފައިވާ ކާމިޔާބީއަށެވެ. އޭނާވަނީ މިމުބާރާތުގައި އޭނާގެ ފުރަތަމަ އިންޓަނޭޝަމަލް ސެންޗަރީ ހަމަކޮށްފައިއެވެ. އަދި ފުރަތަމަ ބުރު ނިންމާލިއިރު މުބާރާތުގައި އެންމެ ގިނަ ލަނޑުހެދި ކުޅުންތެރިގެ ގޮތުގައި ހިމެނިފައިއެވެ.
އަދި މުބާރާތް ނިމުނުއިއިރު އޭނާއަކީ މުޅި މުބާރާތުން ދެވަނައަށް އެންމެ ގިނަ ލަނޑުހެދި ކުޅުންތެރިޔާއެވެ. އޭނާ މިމަގާމު ހޯދާފައިވަނީ 199 ލަނޑު ހަދައިގެންނެވެ.
އެވޯޑް ހާސިލް ކުރުމަށްފަހު ވާހަކަ ދައްކަމުން އަޒިޔާން ބުނީ، މިއީ އޭނާ ހަނދާނުން ފުހެވިގެން ނުދާނެ ވަގުތުކޮޅެއް ކަމަށާއި، މިފަދަ ކާމިޔާބީތަށް ގައުމުގެ އެންމެ އިސްވެރިން ޝާމިލްވާ ގޮތަށް ފާހަގަ ކުރުމުން ކްރިކެޓުގައި ކުރިއަށްދާން ވަރަށް ބޮޑަށް ހިތްވަރު ލިބިގެންދާކަމަށެވެ.
އަޒިޔާންގެ އިތުރުން ޝިއުޒް ފަރީދު، މިއަހަރުގެ އިންޓަ ސްކޫލް މުބާރާތުގައި ހޯދާފައިވާ ކާމިޔާބީގެ އަގުވަޒަންކޮށް ޝިއުޒްއަށްވެސް ވަނީ މާލެ ސްޕޯޓްސްއިން ޚާއްސަ ފިލައެއް އަރުވާފައިއެވެ.
ޝިއުޒްވަނީ އިންޓާ ސްކޫލް މުބާރާތުގައި އެއް މެޗެއްގައި އެންމެ ގިނަ ލަނޑުގެހެދި ކުޅުންތެރިޔާގެ ރެކޯޑް ހަދާފައިއެވެ. މިރެކޯޑް އޭނާހެދީ 78 ބޯޅައިން 224 ލަނޑު ހަދައިގެންނެވެ. މުޅި މުބާރާތުގައި އޭނާވަނީ 527 ލަނޑު ހަދާފައިއެވެ.
އެވޯޑް ހާސިލް ކުރުމަށްފަހު ވާހަކަ ދައްކަމުން ޝިއުޒް ބުނީ އޭނާހޯދި ކާމިޔާބީ މިފަދަ ގޮތަކަށް ފާހަގަ ކުރުމުން ވަރަށް ބޮޑަށް އުފާވާ ކަމަށާއި، ޚާއްސަކޮށް ރައީސްގެ އަތްޕުޅުން މިފަދަ އެވޯޑެއް ލިބުމަކީ ލިބުނު ވަރަށް ބޮޑު ޝަރަފެއް ކަމަށެވެ.
މި ހަފްލާގައި މާލެ ސްޕޯޓްސްއިން ވަނީ ރަމަޟާން ކްރިކެޓް ކާނިވަލް ބޭއްވުމުގައި އެކި ގޮތްގޮތުން އެހީތެރިވެދެއްވާ ފަރާތްތަކުގެ އަގުވަޒަންކޮށް އެފަރާތްތަކަށްވެސް އެވޯޑް އަރުވާފައިއެވެ.