ރާއްޖެއިން ޓެރަރިޒަމާ ދެކޮޅަށް ކުރަމުންދާ މަސައްކަތް ކާމިޔާބު ކުރުމަށް އާންމުންގެ އެއްބާރުލުން ބޭނުންވާކަމަށް ނޭޝަނަލް ކައުންޓަރ ޓެރަރިޒަމް ސެންޓަރުން ވިދާޅުވެއްޖެއެވެ.
ކައުންޓަރ ޓެރަރިޒަމް ސެންޓަރުން ވަނީ، ނުރައްކަލެއްވެދާނެކަމަށް ހީވާކަހަލަ މަޢުލޫމާތެއް ނުވަތަ އާދަޔާ ޚިލާފް ކަމެއް ފެނިއްޖެނަމަ އެކަން ވީ އެންމެ އަވަހަކަށް އެ ސެންޓަރުގެ ހޮޓްލައިން 1615 މެދުވެރިކޮށް ނުވަތަ އެ ސެންޓަރުގެ އީމެއިލް [email protected] މެދުވެރިކޮށް ހިއްސާކުރުމަށް އާންމުންގެ ކިބައިން އެދިފައެވެ. އަދި އެފަދަ މަޢުލޫމާތު ހިއްސާކުރާ ފަރާތްތަކުގެ މަޢުލޫމާތު ސިއްރުކުރާނެ ކަމަށްވެސް އެ ސެންޓަރުން ވަނީ ވިދާޅުވެފައެވެ.
ކައުންޓަރ ޓެރަރިޒަމް ސެންޓަރުން މިހެން ވިދާޅުވެފައި މިވަނީ އަވައްޓެރި ސްރީލަންކާއަށް ޓެރަރިސްޓް ހަމަލާތަކެއް ދިނުމާ ގުޅިގެން ރާއްޖެ ހިމެނޭހެން އަވައްޓެރި ޤައުމުތަކުގެ ސަލާމަތީ ކަންކަން ވަރުގަދަކޮށްފައިވާ ދަނޑިވަޅެއްގައެވެ.
މި ހަމަލާތަކާ ގުޅިގެން މާލޭގެ ސަރަޙައްދުތައް މިހާރު ބަލަހައްޓާ މިންވަރަށްވުރެ ބެލެހެއްޓުން އިތުރުކޮށް، ޚާއްޞަކޮށް ފަތުރުވެރިކަމުގެ ސިނާއަތަށް ކުރިމަތިވެދާނެ އެއްވެސް ނުރައްކަލެއް ކުރިމަތިވިޔަ ނުދިނުމަށް ރާއްޖޭގެ ސަލާމަތީ ބާރުތަކުން ވަނީ ޚާއްޞަ ފިޔަވަޅުތަކެއްވެސް އަޅާފައެވެ. އަދި ރާއްޖޭގެ ވައިގެ ބަނދަރުތަކުގެ ސަލާމަތީ ކަންކަންވެސް ވަނީ އިތުރަށް ވަރުގަދަކޮށްފައެވެ.
ޓެރަރިޒަމްގެ ނުރައްކަލަކީ މުޅި ދުނިއެއަށް އޮތް ނުރައްކަލެއްކަން ފާހަގަކުރައްވައި ސަލާމަތީ ބާރުތަކުން ވަނީ މިދަނޑިވަޅުގައި ޓެރަރިޒަމަށް ހިތްވަރުދޭގޮތަށް އޮންލައިންތަކާއި ސޯޝަލް މީޑިއާގައި ޕޯސްޓްތައް ޝެއަރ ނުކުރުމަށްވެސް ގޮވާލާއްވާފައެވެ.