މަގުމަތީގެ އަދަބުތަކަށް ހުރުމަތްތެރިކޮށްހިތައި ދިވެހި ޅަ ދަރީންނަށް ނަމޫނާ ދައްކަންޖެހޭ- ނާއިބްރައީސް
ހުރިހާ އެންމެންވެސް މަގުމަތީގެ އަދަބުތަކަށް ޙުރުމަތްތެރިކޮށް ހިތައި، ދިވެހި ޅަ ދަރީންނަށް ނަމޫނާ ދެއްކުމަށް ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ގޮވާލައްވައިފިއެވެ. އެމަނިކުފާނު މިކަމަށް ގޮވާލެއްވީ ނެޝަނަލް ރޯޑްސޭފްޓީ އެކްޝަން ޕްލޭން އިފްތިތާޙް ކުރުމަށް ރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
މި ރަސްމިއްޔާތުގައި ނާއިބްރައީސް ވިދާޅުވީ، ރާއްޖޭގެ ރަށްތަކަށް ބަލާއިރު، ބޮޑެތި ރަށްތަކުގައި، ހިނގާ އެކްސިޑެންޓްތަކުގެ އަދަދު ގިނަކަމަށް ތަފާސް ހިސާބުތަކުން ދައްކާ ކަމަށެވެ. އަދި ރާއްޖޭގެ ރަށްތަކުގެ މަގުތައް ފަސޭހަކަމާއެކު ދުއްވޭނެހެން ހަދަމުންގެންދާއިރު މިއީ ފުންކޮށް ވިސްނަން ޖެހޭކަމެއްކަމަށް އެމަނިކުފާނު ވިދާޅުވިއެވެ.
ނާއިބްރައީސްގެ ވާހަކަފުޅުގައި، ކުރިން ރައްކާތެރިކަމުގެ ފިޔަވަޅު އެޅެންއޮތް ކަމެއްގައި އެކަން ނުކޮށް ތިމާގެ ދިރިއުޅުން ދޫކޮށްލުމަކީ ނުވަތަ މުޅި އުމުރަށް އެފަދަކަމަކާހުރެ ނުކުޅެދުންތެރިކަމަކާ ކުރިމަތިލުމަކީ އެއްވެސް މީހަކު ބޭނުންވާނެ ކަމެއް ނޫންކަން ފާހަގަކުރެއްވިއެވެ. އަދި ކޮންމެވެސް މީހެއްގެ ފަރުވާކުޑަކަމުން ނުވަތަ ދޭންޖެހޭ ސަމާލުކަން ނުދިނުމުގެ ސަބަބުން ހިނގާ ނުރައްކާތެރި ހާދިސާތަކުގެ ސަބަބުން ބޮޑެތި ގެއްލުންތަކާ ކުރިމަތިލާންޖެހޭކަމީ ކޮންމެ މީހަކުވެސް ވިސްނާލަންޖެހޭ ކަމެއް ކަން ފާހަގަކުރައްވައި މަގުމަތީގައި އުޅޭއިރު ނުވަތަ މަގު ބޭނުންކުރުމުގައި އެހެން މީހުންނާ ދޭތެރޭގައި ވިސްނުމަކީ މުހިންމުކަމެއް ކަމަށްވެސް ނާއިބް ރައީސް ވިދާޅުވިއެވެ.
ނާއިބްރައީސް ވަނީ ރޭ މި އިފްތިތާޙުކުރި ނެޝަނަލް ރޯޑްސޭފްޓީ އެކްޝަން ޕްލޭން ތަންފީޒުކުރުމުގައި ހުރިހާ މުއައްސަސާތަކުން ގުޅިގެން މަސައްކަތް ކުރުމަށް އިލްތިމާސްކުރައްވާފައެވެ. އަދި ސަރުކާރުގެ މަސައްކަތު ފުރަތަމަ 100 ދުވަހުގެ ތެރޭގައި ފުއްދެވުމަށް ނިންމަވާފައިވާ ވަޢުދުތަކުގެ ތެރޭގައި ހިމެނިގެން މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ގިނަ މަސައްކަތްތަކެއް ކުރެވިފައިވާކަމަށާއި އަދި އެ މަސައްކަތްތަކުގެ ނަތީޖާވެސް ރަގަޅުގޮތުގައި ފެންނަމުންދާކަން ނާއިބްރައީސް ވަނީ ފާހަގަ ކުރައްވާފައެވެ.