ނުކުޅެދުންތެރިކަން ހުންނަ ފަރާތްތަކާގުޅޭ ސިޔާސަތު ތަންފީޒުކުރުމަކީ މިސަރުކާރުގެ މުހިންމު ވަޢުދެކެެވެ. އެހެންނަމަވެސް މި ވަޢުދު ފުރިހަމަވުމުގައި ވަކިވަކި ފަރުދުންނާއި އަމިއްލަ ފަރާތްތަކުގެ ޒިންމާ ވަރަށްބޮޑުކަމުގައި ދަންނަވަންޖެހެއެވެ. ޢާއްމުން ބައިވެރިވާގޮތަށް ބާއްވާ ފޯރަމްތަކާއި ފެސްޓިވަލްފަދަ ކަންކަމަކީވެސް ނުކުޅެދުންތެރިކަން ހުންނަ ފަރާތްތަކަށް ފަސޭހައިން ޚިދުމަތް ހޯދޭ ގޮތަށް އިންތިޒާމްކުރާ ކަންކަންކަމަށް ވާންޖެހެއެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްގެ ސަރުކާރު ވެރިކަމާއި ހަވާލުވެވަޑައިގަތީ، ނުކުޅެދުންތެރިކަން ހުންނަ ފަރާތްތަކާއި ގުޅޭ ސިޔާސަތު ތަންފީޒު ކުރުމަށް މުހިންމު ވަޢުދުތަކެއް ވެވަޑައިގަންނަމުންނެވެ.
އެގޮތުން ނުކުޅެދުންތެރިކަން ހުންނަ ފަރާތްތައް މުޖުތަމަޢުގައި ބައިވެރިވުން އިތުރުކުރުކޮށްދިނުމާއި، ތައުލީމީ ފުރުސަތު އިތުރުކޮށްދިނުމާއި، ބޯ ހިޔާވަހިކަން ފޯރުކޮށްދިނުންފަދަ މުހިންމު ވަޢުދުތަށް ރައީސް ޞާލިޙާއި އެމަނިކުފާނުގެ ނައިބު ފައިސަލް ނަސީމްގެ ޖަޒީރާ ރާއްޖެ މެނިފެސްޓޯގައި ހިމެނެއެވެ.
މި ވަޢުދުތަކަކީ، 2010ވަނަ އަހަރު ތަސްދީޤްކުރި ނުކުޅެދުންތެރިކަން ހުންނަ މީހުންގެ ހައްޤުތައް ރައްކާތެރިކުރުމާއި، މާލީ އެހީތެރިކަން ފޯރުކޮށްދިނުމުގެ ޤާނޫނުގެ ދަށުން ޔަޤީންކޮށްދިނުމަށް ކަނޑައަޅާފައިވާކަންކަމެވެ. އެހެންނަމަވެސް، މިހާތަނަށް އައިރުވެސް މިކަންކަން ފުރިހަމަ ނުވުމުން ރައީސް ޞާލިޙް ވަޑައިގެންނެވީ މިމަސައްކަތްތައް ފުރިހަމަކުރުމަށް ގިނަ ޕްލޭންތަކެއް ހެއްދެވުމަށް ފަހުއެވެ.
މިވަޢުދުތަކުގެ ތެރެއިން ބޮޑުސަމާލުކަމެއް ލިބިގެން ގޮސްފައިވާ އެއްވަޢުދަކީ، ޢާންމު ޚިދުމަތްދޭ ހުރިހާ ޢިމާރާތްތައް އެކްސެސިބަލް ކުރުމުގެ ވަޢުދެވެ. އެގޮތުން ސަރުކާރުގެ އޮފީސްތަކާއި ޢާންމުން އެއްވެ އުޅޭ ސަރަޙައްދުތަކަކީ، އެންމެނަށް ފަސޭހައިން އުޅެވޭނެ ތަންތަނަށް ހެއްދެވުމަށް ސަރުކާރުން ވަނީ މަސައްކަތް ފަށްޓަވާފައެވެ.
ސަރުކާރުން މިކަމުގެ އެންމެ ބޮޑު ލާމަސީލު މިސާލެއް ދެއްކީ، މިހާތަނަށް ރާއްޖޭގައި ބޭއްވި ފުރަތަމަ އެންޖީއޯ ފެއަރ "ހަވެލި" ފެއަރއިންނެވެ. އެގޮތުން، މި ފެއަރ ބޭއްވި ދަރުބާރުގެ ފެއަރއަށް ތައްޔާރުކުރުމުގައި ސަރުކާރުގެ ވިސްނުމަކަށްވީ މި ފެއަރއަކީ އެންމެނަށްވެސް ފަސޭހައިން ޒިޔާރަތްކޮށް ބަލާލެވޭ ފެއަރއަކަށް ހެދުމަށެވެ. އެގޮތުން، މިނިސްޓްރީ އޮފް ހޯމް އެފެއަރޒުން އިންތިޒާމުކުރި މިފެއަރގައި ވީލް ޗެއަރ ބޭނުންކުރާ ފަރާތްތަކަށް ދަތުރުކުރެވޭގޮތަށް ރޭމްޕްތައް ދަރުބާރުގޭގައި ޤާއިމުކޮށް، ޔުނިވަރސަލް ފާޚާނާ ބަރިތަކެއް ދެ ޖިންސުގެ ފަރާތްތަކަށްވެސް ތައްޔާރުކުރިއެވެ. ނަތީޖާއަކަށްވީ މި ފެއަރގެ މަޤުބޫލުކަން ޢާންމުންގެ ތެރޭގައި އިތުރުވެ ތާރީޚުގެތެރޭގައި ރަން އަކުރުން ފަވާލެވޭ ވަރުގެ ވަރުގަދަ މޮޅު ފެއަރއަކަށް މި ފެއަރ ވެގެން ދިއުމެވެ.
"ހަވެލި" ފެއަރއަށްފަހު ދަރުބާރުގޭގައި ޢާންމުނަށް ހުޅުވާލައިގެން ބޭއްވި އެންމެ ބޮޑު ޙަރަކާތަކީ، މިހާރު "ލިކަމެކް"އިން ކުރިއަށްގެންދާ ރޯދަ ބާޒާރެވެ.
ސަރުކާރުން ދަރުބާރުގޭގައި ޤާއިމުކޮށްދިން ފަސޭހަތަކާއިއެކު، ނުކުޅެދުންތެރިކަން ހުންނަ ގިނަ ފަރާތްތަކެއް މި ބާޒާރަށް ދިޔައީ ނައިޓް މާކެޓެއްގައި ފަސޭހަކަމާއިއެކު އުޅެވޭނެކަމުގެ އުންމީދުގައެވެ.
އެހެންނަމަވެސް މަންޒަރު މިވަނީ ބަދަލުވެފައެވެ. ނުކުޅެންދުންތެރިކަން ހުންނަ މީހުންނަށް ފަސޭހައިން، ދަރުބާރުގޭ ރަންނަ ބަނޑޭރި މާލަމަށް ވަދެނުކުމެ އުޅެވޭނެހެން ހަދާފައި އޮތް ރޭމްޕް ވަނީ ނަގައި ކަނަކަށް ޖަހާފައެވެ. ނަތީޖާއަކަށްވީ އުންމީދުން ފުރިގެން ދިޔަ ބައެއް މީހުންނަސް ބާޒާރަށް ނުވަދެ މާޔޫސް ކަމާއެކު އެނބުރި ގެޔަށް ދާން ޖެހުމެވެ.
މިކަމުގެ ޝަކުވާ ގިނަ ފަރާތްތަކަކުންވަނީ ސޯޝަލް މީޑިއާގެ އެކި ޕްލެޓްފޯމްތަކުގައިވެސް ފާޅުކޮށްފައެވެ. ސަރުކާރުގެ އެކި ވުޒާރާތަށް ޓެގްކޮށް ޓުއީޓްކޮށް ހަދާފައެވެ. ޕީއެސްއެމް ނިއުސް ޓީމުން މިފަރާތްތަކާ ވާހަކަދައްކާލުމުން، އެފަރާތްތަކުގެ ހިތްހަމަނުޖެހުން އަޅުގަނޑުމެންނާއި ހިއްސާކޮށްފައިވެއެވެ.
ކޮންމެއަކަސް މިއީ އަޅުގަނޑުމެން އެންމެންވެސް ވިސްނާލުން މުހިންމު ކަމެކެވެ. މާތްﷲ އަޅުގަނޑުމެން އެންމެ ތަފާތު ގޮތްގޮތަށް ޚަލްޤުކުރައްވާފައިވާއިރު އަޅުގަނޑުމެން އެކަކު އަނެކަކަށް އެހީތެރިވުމަކީ ފަރުދީ ޒިންމާއަކަށް ހެދުން މުހިންމެވެ.