ސިފައިންގެ ދުވަސް ފާހަގަކުރުމަށް ބާއްވާ ޝަރަފުގެ ހިނގާލުމުގައި ސިފައިންގެ އުޅަނދުތައް ދައްކާލުމަށް ނިންމައިފިއެވެ. 127 ވަނަ ސިފައިންގެ ދުވަސް ފާހަގަކުރުމަށް ބާއްވާ ޝަރަފުގެ ހިންގާލުން އޮންނާނީ މާދަމާ ހަވީރު 16:00 ގައި މާލޭގެ ސިޓީ މަގުތަކުގައެވެ.
އެމްއެންޑީއެފުން ބުނީ މި ހިނގާލުމުގައި ސިފައިންގޭގައި މިހާރު ބޭނުންކުރާ ބައެއް އުޅަނދުތަކުގެ ތެރެއިން ފަޔަރ ވެހިކަލްތަކާއި ސްޕެޝަލް ފޯސަސްގައި ބޭނުންކުރާ ބައެއް އުޅަނދުތައް ދައްކާލުމަށް ހަމަޖެހިފައިވާކަމަށެވެ.
ޝަރަފުގެ ހިނގާލުމުގެ ލަޝްކަރުގެ ފޯރމޭޝަންގައި، އެމްއެންޑީއެފް ކޯސްޓްގާޑް، މެރިންކޯ، ޑްރިލް ޓީމް، އެމްއެންޑީއެފް ބްރާސް ބޭންޑް، ސަޕޯރޓް ސަރވިސް، ސްޕެޝަލް ފޯސެސް އަދި އެމްއެންޑީއެފް ފަޔަރ އެންޑް ރެސްކިއު ސަރވިސް ހިމެނެއެވެ. މި ގެމަތަށް ބައިވެރިވަމުންދާނީ އެބަޔަކަށް ޚާއްޞަ ކުރެވިފައިވާ ޔުނިފޯރމުގަކަމަށާއި މި ޝަރަފުގެ ހިނގާލުމުގައި އަންހެން ސިފައިންނަށް ޚާއްޞަ ގެމައެއް ވެސް ހިމެނޭނެކަމަށް އެމްއެންޑީއެފުން ބުނެއެވެ.
މި ހިނގާލުމުގައި ފަސް ސަރަހައްދަކަށް މަޑުކުރުމަށްވަނީ ހަމަޖެހިފައެވެ. އެ ސަރަހައްދުތަކަކީ މުލިއާގެ ކައިރިއާއި ރޯޝަނީ މަގާއި ބޮޑުތަކުރުފާނުމަގު ގުޅޭ ކަންމަންޗާއި މަޖީދީ މަގާ ފާށަނާ ކިލޭގެމަގު ގުޅޭ ކަންމަންޗާއި މާފަންނު ސަހަރާ ޕާކިން ޒޯން ކައިރިއާއި އިއްޒުއްދީންމަގާ އާޒާދީ ހިންގުން ގުޅޭ ކަންމަންޗެވެ. ކޮންމެ ހުއްޓުމެއްގައިވެސް ސިފައިންގެ ބޭންޑުގައި ރީތި އެކި ރާގުތައް ކުޅުމަށް ވަނީ ހަމަޖެހިފަިވާކަމަށް އެމްއެންޑީއެފުން ބުނެއެވެ.