މަމެން އައްޑޫ އިންޓަރ ސްކޫލް ފުޓްބޯޅަ މުބާރާތުގެ 12 އަހަރުން ދަށުގެ އުމުރުފުރާގައި އިއްޔެ ކުޅުނު ފުރަތަމަ މެޗުން ހުޅުދޫ ސްކޫލު މޮޅުވެ، ސެމީ އަށް ދިއުމުގެ ފުރުސަތު ބޮޑު ކޮއްފިއެވެ. ހުޅުދޫ ސްކޫލާއި ފޭދޫ ސްކޫލު ބައްދަލު ކުރި ފޯރި ގަދަ މިމެޗް ހުޅުދޫ ސްކޫލް ކާމިޔާބު ކުރީ 3-1 އިންނެވެ. މިމެޗުގެ ފުރަތަމަ ހާފުގައި ދެޓީމުންވެސް ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކުރިއެވެ. މި މެޗުގައި ހުޅުދޫ ސްކޫލްގެ ފުރަތަމަ ލަނޑު އެޓީމަށް ޖަހައިދިނީ މުހައްމަދު ޒާހިލް ސަމީއުއެވެ. މެޗުގެ ދެވަނަ ހާފު ފެށިގެން ގިނަ އިރުތަކެއް ނުވެ ހުޅުދޫ ސްކޫލުގެ އަލީ ޔަޒާމް މުހައްމަދު ނާސިރު ލަނޑެއް ޖަހައި ލީޑު ފުޅާކުރިއެވެ. މެޗުގައު ފޭދޫ ސްކޫލުން ޖެހި ހަމައެކަނި ލަނޑު އެޓީމަށް ޖަހައިދިނީ ހަސަން އުލްވާން ރަޝީދުއެވެ. މެޗު ނިމުމުގެ ކުރީން ހުޅުދޫ ސްކޫލުގެ މާއިޒް މުޖްތަބާ މުހައްމަދު ދީދީ ވަނީ އިތުރު ލަނޑެއް ޖަހައި ޓީމަށް ހިތްހަމަޖެހުން ގެނެސްދީފައިއެވެ. މެޗަށްފަހު ވާހަކަ ދައްކަމުން ހުޅުދޫ ސްކޫލުގެ ކޯޗު އިބްރާހިމް ޝަރީފް ބުނީ ކުރީގެ މެޗުތަކާއި ބަލާއިރު މި މެޗުގައި މިސްޓޭކްތަށް ރަނގަޅުކޮށްފައިވާކަމަށެވެ.
މެޗާއި ގުޅޭ ގޮތުން ފޭދޫ ސްކޫލުގެ ކޯޗު މުހައްމަދު އަލީ ބުނީ މެޗުން ބަލިވެގެން ދިޔައީ ރަނގަޅު ޕްރެކްޓިސް އެށް ނުލިބުމުން ކަމަށެވެ.
މި ނަތީޖާ އާއި އެކު ފޭދޫ ސްކޫލަށް ވަނީ ކުޅުނު 3 މެޗުންވެސް ބަލިވުމާއި އެކު ސެމީ އަށް ދިއުމުގެ ފުރުސަތު އެއްކޮށް ގެއްލިފައިއެވެ. ނަމަވެސް ހުޅުދޫ ސްކޫލު ކުރިއަށް އޮތް މެޗް އެއްވަރުވިއަސް ސެމީގެ ޖާގަ ކަށަވަރު ވާނެއެވެ.