އެއް ހާސް މީހުންނަށް އެއްފަހަރާ ނަމާދު ކުރެވޭނެ ގޮތަށް ވިލިމާލޭގައި އިމާރާތްކޮށްފައިވާ "މަސްޖިދުލް ބިއްރި" ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު މިއަދު ރަސްމީކޮށް ހުޅުއްވައިދެއްވައިފިއެވެ.
މިމިސްކިތް ހުޅުއްވައިދެއްވުން އޮތީ މިއަދު މެންދުރުފަހު ވިލިމާލޭގައި މިކަމަށްޓަކައި ބޭއްވެވި ޚާއްސަ ރަސްމިއްޔާތެއްގައެވެ.
މިސްކިތް ހުޅުވުމަށް ބޭއްވި ރަސްމިއްޔާތުގައި އިސްލާމިކް މިނިސްޓަރ ޑރ.އަޙްމަދު ޒިޔާދު ދެއްކެވި ވާހަކަފުޅުގައި ވަނީ މިމިސްކިތަކީ އަމިއްލަ ފަރާތަކުން ބިނާކުރިމިސްކިތެއްކަން ފާހަގަކުރައްވައި މިސްކިތް ބިނާކުރުމުގެ މާތްކަމުގެ މައްޗަށް އަލިއަޅުއްވާލައްވައި ވާހަކަފުޅު ދައްކަވާފައެވެ. އަދި އެއީ ދިގުދެމިގެންދާ ޞަދަގާތެއްކަމަށްވެސް މިނިސްޓަރ ފާހަގަކުރެއްވިއެވެ.
"ރަސޫލާ ހަދީޘް ކުރައްވާފައިވާ ބަސްފުޅެއްގެ މާނާގައިވޭ މީހަކު ﷲއަށްޓަކައި މިސްކިތެއް ޢިމާރާތްކޮށްދެއްވައިފިނަމަ ނުވަތަ އެފަދަ ތަނަވަސްކަމެއް ނެތްމީހާ މިކިތުން ބައެއް ނޫނީ ކުޑަތންކޮޅެއް ޢިމާރާތްކޮށްދެއްވައިފިނަމަ ﷲ ސުބުހާނަހޫ ވަޠަޢާލާ އެމީހަކަށް ސުވަރޫގައި ގަނޑުވަރެއް ބިނާކޮށްދެއްވާނެ" މިނިސްޓަރު ވިދާޅުވިއެވެ.
މި މިސްކިތަކީ އެންމެ ޒަމާނީ ފެންވަރަށް ތަރައްޤީކޮށްފައިވާ މިސްކިތެކެވެ. އޭސީ ކޮށްފައިވާ މި މިސްކިތުގައި އަންހެނުންނަށް ނަމާދުކުރެވޭނެ އިންތިޒާމް ކުރިއަށް އޮތް ދިހަ ދުވަހުގެ ތެރޭގައި ހަމަޖައްސާނެކަމަށް އިސްލާމިކް މިނިސްޓްރީން މަޢުލޫމާތުދެއްވައެވެ. މި މިސްކިތުގެ ގޯތިތެރޭގައި ޤުރުއާން އުގަންނައިދޭ ކްލާސްރޫމެއްވެސް ހުރެއެވެ. އިސްލާމިކް މިނިސްޓްރީން ވިދާޅުވީ، ސަރުކާރުގެ ސިޔާސަތުގައި މިސްކިތްތަކުގައި ކީރިތި ޤްރުއާން ކިޔަވައިދިނުން ހިމަނާފައިވާއިރު، ވަރަށް އަވަހަށް އެ މިސްކިތުގައިވެސް އެކަށް ފަށްޓަވާނެކަމަށް. 2015 ވަނަ އަހަރުގެ ތެރޭގައި ޢިމާރާތްކުރަން ފެށި މި މިސްކިތް ޑިޒައިންކޮށްފައިވަނީ ވިލިމާލެ ދާއިރާގެ މެންބަރު އަޙްމަދު ނިހާން ޙުސައިން މަނިކުއެވެ.
މި މިސްކިތަކީ ޒަމާނީ ފެންވަރަށް ޢިމާރާތްކޮށްފައިވާ މިސްކިތެކެވެ. މިއީ އަމީން ކޮންސްޓްރަކްޝަންގެ އަމިއްލަ ޚަރަދުގައި ވިލިމާލޭގައި އިމާރާތްކޮށްފައިވާ މިސްކިތެކެވެ. މި މިސްކިތުގެ ބިންގާ އަޅާފައިވަނީ 2015ވަނަ އަހަރުގެ ތެރޭގައެވެ. މިސްކިތް ހުޅުއްވައިދެއްވުމަށްފަހު، މިސްކިތުގައި ކުރި ޢަޞްރު ނަމާދުގެ ޖަމާޢަތުގައި ރައީސުލްޖުމްހޫރިއްޔާ ވަނީ ބައިވެރިވެވަޑައިގަންނަވާފައެވެ.