އައްޑޫ އިންޓަރ ސްކޫލު - 12އ ދަށް: މަރަދޫ ސްކޫލާއި ހުޅުދޫ ސްކޫލު އެއްވަރުވެ، ހިތަދޫ ސްކޫލަށް ފަސޭހަ މޮޅެއް
މަމެން އައްޑޫ އިންޓަރ ސްކޫލް ފުޓްބޯޅަ މުބާރާތުގައި 12 އަހަރުން ދަށުގެ އުމުރުފުރާގައި މަރަދޫ ސްކޫލާއި ހުޅުދޫ ސްކޫލު މެޗް އެއްވަރުވިއިރު، ހިތަދޫ ސްކޫލު ބޮޑު ތަފާތަކުން މޮޅުވެއްޖެއެވެ.
މިމުބާރާތުގައި އީއްޔެ ފުރަތަމަ ކުޅުނީ، މަރަދޫ ސްކޫލާއި ހުޅުދޫ ސްކޫލެވެ. ދާދި ހަމަހަމަ ކުޅުމެއް ފެނިގެން ދިޔަ މިމެޗުގެ ފުރަތަމަ ލަނޑު ހުޅުދޫ ސްކޫލަށް ކާމިޔާބު ކޮށްދިނީ 12 ވަނަ މިނެޓުގައި އެޓީމުގެ ޖާޒީ ނަމްބަރު 7 އަލީ ޔަޒާންއެވެ. ނަމަވެސް އޭގެ މިނެޓެއް ފަހުން މަރަދޫ ސްކޫލުގެ ޖާޒީ ނަމްބްރު 7 އަދި މިމެޗުގެ މޭން އޮފް ދަ މެޗް އަބްދުﷲ އުޙް-އާދު ވަނީ އެސްކޫލަށް ނަތީޖާ ހަމަހަމަ ކޮށްދީފައެވެ. ފުރަތަމަ ހާފް ނިމިގެން ދިޔައީ 1-1ގެ ނަތިޖާއިން ދެޓީމު އެއްވަރު ވެގެންނެވެ. މެޗުގެ ދެވަނަ ހާފު ފެށިގެން މަރަދޫ ސްކޫލުން ލަނޑެއް ޖަހައި ކުރި ހޯދިއެވެ. ނަމަވެސް ހުޅުދޫ ސްކޫލުން ކުޅުން ރަނގަޅު ކޮށް ވަނީ ނަތީޖާ ހަމަހަމަ ކޮއްފައެވެ. ފޯރި ގަދަ މިމެޗް ނިމިގެ ދިޔައީ 2-2 އިން އެއްވަރު ވެގެންނެވެ.
މެޗަށް ފަހު ޕީއެސްއެމް އާއި ވާހަކަ ދައްކަވަމުން ދެޓީމުގެ ކޯޗުން ވެސް ބުނެފައިވަނީ މެޗާއި މެދު ހިތްހަމަ ޖެހޭ ކަމަށެވެ. މިގޮތުން މެޗާއި ގުޅޭ ގޮތުން މަރަދޫ ސްކޫލް ޓީމް މެނޭޖަރ އަލީ ނާއިމް ބުނެފައިވަނީ އެޓީމަށް މިއަދު އެންމެ ބޮޑަށް ދިމާވީ ހޫނުވުމުގެ މައްސަލަ ކަމަށެވެ.
އީއްޔެ ދެވަނަ މެޗަކަށް ކުޅެވުނީ ހިތަދޫ ސްކޫލާއި މަރަދޫ-ފޭދޫ ސްކޫލު ވާދަ ކުރި މެޗެވެ. މިމެޗު ހިތަދޫ ސްކޫލް ގެންދިޔައީ ބޮޑު ތަފާތަކުން މަރަދޫ-ފޭދޫ ސްކޫލު ބަލި ކުރުމަށްފަހުއެވެ. މިމެޗް ފެށިގެން 2 ވަނަ މިނެޓް ތެރޭ މެޗުގެ ފުރަތަމަ ލަނޑު ހިތަދޫ ސްކޫލުގެ ޖާޒީ ނަމްބަރު 21 އަހުމަދު މައިމޫން ރޫހުލް-އަމީން ޖެހިއެވެ. މެޗުގެ މޭން އޮފް ދަމެޗް ވެސް ހޯދި މައިމޫން ވަނީ އެޓީމަށް ތިން ލަނޑު ޖަހައިދީ ހެޓްރިކްވެސް ހަދާފައެވެ. ހިތަދޫ ސްކޫލުގެ ދެވަނަ ހެޓްރިކް ހެދީ ޖާޒީ ނަމްބަރު 8 އައްސާން ނަޖްދުއެވެ. މެޗުގެ މަރަދޫ-ފޭދޫގެ ހަމައެކަނީ ގޯލް ޖަހާފައިވަނީ އެޓީމުގެ ޖާޒީ ނަމްބަރު 14 އަހުމަދު ޝަމީޒް ސައީދެވެ. މެޗު ނިމިގެން ދިޔައީ 10-1 ގެ ނަތީޖާއިން ހިތަދޫ ސްކޫލު މޮޅުވެގެންނެވެ.
މެޗަށް ފަހު މަރަދޫ-ފޭދޫ ސްކޫލުގެ ކޯޗު ބަދުރުއްދީން ނާސިރު ޕީއެސްއެމް އާއި ވާހަކަ ދައްކަމުން ބުނީ، މެޗުގައި އެޓީމުގެ ހުނަރު ގޯސް ނޫން ކަމަށާއި، އާބާދީ ކުޑަ ސްކޫލެއްގެ އެކުގަ ކުޅޭނެ ކުދިން މަދުވުމުން ބޮޑެތި ސްކޫލްތަކާއި ވާދަ ކުރަން އުނދަގޫ ވާނެ ކަމަށެވެ.
މިމުބާރާތުގައި މިއަދު ކުޅޭނީ 16 އަހަރުން ދަށުގެ އުމުރު ފުރައިގެ މެޗެކެވެ. އެމެޗުގައި ބައްދަލު ކުރަނީ، ސ؛ އަތޮޅު ސްކޫލާއި ޝަރަފުއްދީން ސްކޫލެވެ.