ވިއު ބިލްޑަރސް ޕްރައިވެޓް ލިމިޓެޑުން ޖީއެސްޓީގެ ގޮތުގައި ދައުލަތަށް ހަތް މިލިއަނަށްވުރެ ގިނަ ރުފިޔާ ދެއްކުމަށް ހުކުމްކޮށްފިއެވެ.
ސިވިލްކޯޓުން މިގޮތަށް ހުކުމްކޮށްފައިވަނީ، ޖީއެސްޓީ ނުދައްކައިގެން ދައުލަތުގެ ޓެކްސް އިދާރާ، މީރާއިން ވިއު ބިލްޑަރސް ޕްރައިވެޓް ލިމިޓެޑާއި ދެކޮޅަށް ސިވިލްކޯޓަށް ހުށަހެޅި މައްސަލައިގެ ހުކުމްގައެވެ.
ސިވިލްކޯޓުން ކުރި ހުކުމުގައި ބުނެފައިވަނީ، ވިއު ބިލްޑަރސް ޕްރައިވެޓް ލިމިޓެޑަކީ 2015 ވަނަ އަހަރު މީރާގައި ރަޖިސްޓްރީކޮށްފައިވާ ފަރާތެއްކަމަށެވެ.
މިގޮތުން 8 އޭޕްރިލްގެ ނިޔަލަށް ޖީއެސްޓީގެ ގޮތުގައި 4,835,435 ރުފިޔާ ދައުވާލިބޭ ވިއު ބިލްޑަރސް އިން މީރާއަށް ދައްކަންޖެހިފައި އޮންނަކަން ހުށަހެޅިފައިވާ ލިޔުންތަކުންނާއި ދަޢުވާލިބޭ ފަރާތުގެ ބަހުން ޝަރީއަތަށް ސާބިތުވާތީ، 8 އޭޕްރިލްގެ ނިޔަލަށް ޖީއެސްޓީ އާއި ޖޫރިމަނާގެ ގޮތުގައި 7،755،423 ރުފިޔާ މިއަދުން ފެށިގެން 10 މަސްދުވަހުގެ ތެރޭގައި މީރާއަށް ދައްކައި ޚަލާޞްކުރުމަށް ސިވިލްކޯޓުގެ ހުކުމުގައި ވަނީ ބުނެފައެވެ.
މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ގެންދަނީ ދައުލަތައް ލިބެންޖެހޭ ފައިސާ ހޯދުމަށް ކޯޓު މެދުވެރިކޮށްވެސް މަސައްކަތްކުރަމުންނެވެ.
މިގޮތުން ދައުލަތައް ޓެކްސް ނުދައްކައިގެން މިދިޔަ އަހަރުވެސް ގިނަ ފަރާތްތަކެއްގެ މައްސަލަތައް ސިވިލްކޯޓަށް ހުށަހަޅާފައިވާކަމަށް މީރާއިން ބުނެއެވެ. މީގެ ތެރެއިން ގިނަ މައްސަލަތައް މީރާއިން ވަނީ ކާމިޔާބުކޮށްފައެވެ.